INGLOT eyeshadows : swatches and numbers' guide

مرحبا..

كثيييير تأخرت في هالموضوع بس أخيرا سويته..

اليوم راح أتكلم عن تجربتي في الظلال المضغوطة من ماركة إنجلوت

و تحذير عظيم.. تراني مفصلة كل شي عن ظلالهم.. يعني جيبوا معاكم سناك

و إذا كنتم واقفين إجلسوا خخ..

 

إنجلوت أو إنقلوت هي ماركة بولندية تعتبر جديدة بالنسبة لنا.. لكنها حسب ما قريت موجودة من أكثر من 25 سنة

كثير يعتبرونها تقليد لماك.. لكن بصراحة هي ماركة مستقلة بذاتها و تميزت عن ماك في كم شغلة

جودة أفضل في الوقت اللي تراجعت فيه جودة ماك

سعر أرخص بينما ماك كل فترة يرتفع سعرها أكثر و أكثر

حجم المنتج كبير و مناسب لسعرها.. لكن ماك صغرت و قللت كمية بعض منتجاتها و أقرب مثال البقمنت..

تنوع خيارات البالت في نظام الحرية أو freedom system و هالشي مو موجود في ماك..

(ملاحظة : أغلب الدرجات في أنجلوت لها علب منفردة ما تدخل في البالت)

ممكن تسوين أي بالت يخطر في بالك.. بعلب أقوى و أمتن و أسعار جميلة..

مو بس بالت ظلال.. ممكن ظلال و بودرة أو بودرة و بلش.. أو بلشرات و ظلال و هكذا..

و هنا بالرابط مثال لأشكال العلب اللي ممكن تسوينها بس مو من تصويري للأمانة

و هذي مجموعتي من بالتات إنجلوت :

 

 

و العلب متينة غطاها شفاف مغناطيسي قوي.. و ممكن تحطين البالتات اللي نفس المقاس فوق بعض و يلصقون

زي كذا يوم حطيت البالتين الصغار فوق بعض :

 

 

 

 

 أسعار البالت يختلف.. مثلا اللي لونين غير عن أبو بلش و ظلال و هكذا..

و هي مب غالية.. و الحلو فيها إن ممكن تشترين البالت اليوم مثلا

و تعبينه ع مهلك.. كل شهر ظل أو حسب ميزانيتك .. 

تعبئة الظل الواحد أو الـrefill بـ 37 إلى 40 ريال.. مو فاكرة بالضبط..

و هالطريقة أنا أسويها في إنجلوت دايم.. على أقل من مهلي..

لأن بصراحة المحل يحمسك تشترين هههههههه.. و أنا ما أبي أتهور

كل مرة أدخل أجرب أجررررررب و في النهاية آخذ واحد أو إثنين راضية عنهم تمام

و  كثير أفكر و أشوف سواتشات قبل أروح لهم و أعرف ليش أبي هاللون بالذات

و أراعي ما يكون مكرر عندي من قبل.. و هكذا لين كملت 18 ظل.. في 3 بالتات..

 

فيه شي مهم.. أغلب الظلال مكتوب عليها تاريخ صلاحية

بس كلنا نعرف إن منتجات البورة مثل الظلال و البلشرات و البرونزرات

إذا حافظنا عليها و سكرناها زين.. راح تبقى العمر كله معنا.. يعني لا تشيلين هم التاريخ

 

 إنجلوت ما تتعامل بالأسامي بس بالأرقام.. مثل ميك أب فور إيفر

لكن فرقها عن ميك أب فور إيفر إن قبل أي رقم فيه حروف اختصارات تبين نوع كل ظل..

و هالحروف و الكلمات هي اللي راح أشرحها لكم اليوم..

 

 

أول نوعية من ظلالهم هي المطفية و تلاقون جنب الرقم كلمة matte

هذي الظلال من اسمها ما فيها لمعة أبد و لا قليتر و لا شي.. لون واحد و بُعد واحد للون..

عندي منها هالدرجتين و تكلمت عنهم في مفضلاتي هنا

 

  

البيج نفس لون الجلد عشان كذا مو باين.. بس أنا أستخدمه ع الجفن و يبان ..

 

 

 

 

بعدين فيه نوعين من ظلالهم يتشابهون كثير و الفرق بينهم بسيط مرة

و هم من أفضل الأنواع عندي من إنجلوت..

و هم pearl و AMC shine

بالنسبة لـ pearl فهو ظل بشيمر يعني بلمعة..

و AMC shine نفسه بس فيه قليتر صغيييير و قليل ما يبان لين تدققون مرررة..

 و مرات يجي فيه لون بسيط متداخل مع اللون الأساسي

يعني مثلا بيج شيمر بس فيه لمعة ع ذهبي.. و هكذا..

بس تقريبا نفس الشي.. و هم أكثر نوعيات أنصح فيهم..

 

 

 

 

 

 

آخر نوعين و هم يتشابهون بعد و الفرق بسيط

هم DS و AMC

كلهم ظلال مطفية نوعا ما.. بدون لمعة..

لكن فيها قليتر صغير خفيف و جميل.. القليتر فيه كذا لون حسب اللي تبين

مثلا فيه أسود بقليتر ذهبي.. و أسود بقليتر فضي و واحد بأزرق و هكذا..

بس الأغلب فيه قليتر فضي.. و بعدين قليتر ذهبي..

القليتر مرة صغير مو حفلة..!!! لا تخافون خخ.. أصلا ما رح أحد يلاحظه إلا إذا قرب منك

الفرق إن AMC حسب ما بحثت إن فيها فيتامين E و مضادة للعرق

بس بصراحة عني أنا أحسهم نفس الشي و الله و لو رحتوا المحل بتشوفون بنفسكم..

هالنوعية يبي لها طريقة معينة في الإستخدام..

إذا انحطت لوحدها أو فوق برايمر عادي.. تصير مطفية تمام و يروح منها القليتر الخفيف

و إذا تبون القليتر يبان لازم ظل كريمي أو كونسيلر عشان يمسك فيه القليتر

 

 

كل السواتشات حقت الظلال الـ AMC و الـ DS سويتهم بدون برايمر.. طالعين مرة مطفيين

بالنسبة لي إذا أبي القليتر يبان أستخدم برايمر تو فيسد حق القليتر.. مرة ممتاز لهالنوعية من إنجلوت

 

 

و بس.. هذا اللي عندي من معلومات عن ظلال إنجلوت..

و من الصور راح تعرفون وش الألوان اللي أحبها أكثر و حفرتها حفر ههههههه XD

و إذا حابين شوي معلومات عن البقمنت اللي عندهم طلوا ع الريفيو حقي هنا

 

و إذا تبون تشوفون سواتشات لأي منتج من إنجلوت سواء ظلال أو بلشرات أو أكحال و غيره

شوفوا هنا رابط منتدى أجنبي متجمعين و مسوين سواتشات لأي شي يجربونه من إنجلوت

 

و هنا تلاقون ريفيو لي من زمااااان ع التمبلر عن قطرة ديورالاين

 

و ممكن تكتبون في اليوتيوب INGLOT و تتفرجون ع المشتروات و الدروس و الآراء

عندي منهم شوي مناكيرات و أرواج.. تبون ريفيو عنهم..؟!

و سلامتكم..

()