Garnier BB Cream

 

مرحبا..

اليوم راح أتكلم عن منتج كثير البنات يتكلمون عنه أو حابين يعرفون وش طبيعته..

هو البيبي كريم من قارنييه..

 

قبل كذا خلوني أكلمكم عن البيبي كريم عموما..

هو اختصار بليمش بام Blemish Balm

و هو في بدايته مستهدف لتحسين البشرة و زيادة نضارتها..

و فيه تغطية قوية و حماية عظيمة من الشمس توصل لـ 40 أو 50 ..!!

و يعطي لوك لماع و صحي.. و يستخدمونه الأسيويات كثير..

هذا البيبي كريم في مفهومه الصحيح.. و اللي بدأ في دول جنوب شرق آسيا

زي كوريا و اليابان و الفلبين.. و هالدول..

 

 

اللي منتشر الحين من كذا ماركة مثل قارنييه و لوريال و ريمل..! ماهو بيبي كريم أعتقد

هذا تينتد مويسترايزر في نظري..

لأنه ما فيهم تغطية.. و لا فيهم حماية قوية من الشمس.. و هذولي أهم خاصيتين في البيبي كريم

و فيهم مواصفات التنتد مويستشرايزر (المرطب الملون) و هي لون خفيف و ترطيب و حماية خفيفة من الشمس..!

هذا منطقي و مفهومي للبيبي كريم و التنتد مويستشرايزر..

 

 

نرجع لكريم البيبي كريم من قارنييه.. اللي في نظري أحسه مرطب ملون أو تنتد مويستشرايزر..

و هذا شكله :

 

 

فيه منه درجتين عندنا : فاتحة و وسط

سعره حدود 30 ريال في الصيدليات و السوبرماركتات

 

راح أتكلم عن الدرجة الفاتحة اللي عندي

الفاتحة مو كثير فاتحة.. عادي لو لونك وسط تشترينها

 

طيب.. راح أنقسم في كلامي قسمين..

تجربتي ع نفسي و تجربتي ع أختي و صحباتي

 

بالنسبة لي أنا بشرتي مختلطة.. و كنت حابة المنتج و متحمسة له

بس لما بديت أستخدمه انصدمت..!!

أول مرة أحس كريم يزعم إنه بيبي كريم يحسن شكل البشرة .. يبين بشرتي كبيرة و متعبة..!!

حسيته وضح سطح بشرتي كثيييير و مرة ما عجبني شكله علي.. و بعد ما فيه تغطية أبد

هذا مو السبب اللي خلاني أكرهه لسا ههههههه..

السبب اللي نفرني منه إنه خلى وجهي شكله مزيت و دهني مرررررة..

أنا أحب الدوي لوك أو المنظر الرطب للبشرة.. بس مو منظر الوجه بالزيت..

قلت ممكن لأنه فيه مرطب و بشرتي مختلطة.. فرحت مسحتها بتونك عشان تنشف شوي

و حطيته.. نفس المشكلة..!! مدري ليش..

يا ليت منظر مزيت و بشرة شكلها متعب و مرهق..

لا.. كمان ما يثبت أي نسبة رطوبة من عرق و لا موية يسيح و يصير هالمكان مايل ع أبيض..!!

حاولت أحط فوقه بودرة.. طلع حلو بس بعد ساعة رجعت نفس المشاكل

يا ربي عجزت في هالمنتج ههههههههههه

الطريقة الوحيدة اللي أستخدمه فيها الحين.. إني أخفف فيه الأساسات الثقيلة..

و جاري تدبير أمر قلعته هههههه >> مرة زعلانة أنا ..

 

 

 

طيب بالنسبة لأصحاب البشرة الجافة زي أختي و صحباتي..

GOOD NEWS

راح تحبونه ()

أختي نفسها في الدوي لوك .. و جربته هذا عطاها لوك راااائع مرة

رحت أتفحص وجه أختي لقيت بشرتها شكلها جميل من قريب مو مثلي..

و كمان إذا تعرض لأي رطوبة يبقى ثابت ما يصير أبيض نفس حالتي..!

 

حتى صديقتي مريم.. (هلا مريم كيفك؟) بشرتها جافة و كانت تسأل عن شي يعطيها مظهر لامع

و أبدت اعجابها فيه بعد ما جربته و شفته عليها فعلا عطاها نضارة و إشراقة..

 

باختصار

هذا رأيي في المنتج بكل صدق.. ممكن يكون مناسب لك حتى لو بشرتك مختلطة و يعجبك

و اللي بشرتها جافة ممكن يناسبها كثير و تحبه و يعطيها الدوي لوك اللي نفسها فيه

 

 

سلام ()