Apr 27, 2013

مفضلات أبريل April Favorites

السلام عليكم..

اليوم راح أحكي لكم عن الأشياء اللي حبيتها كثير و استخدمتها بحب طول شهر أبريل..
نبدأ هالمرة بالعناية و بعدين المكياج


فرشة أسنان من سنسوداين.. أنا كنت قبل أستخدم فرشة أسنان من أورال بي.. فيها زي المطاط و متطورة ببطارية و زحمة.. و كانت بصراحة خشنة أحس و تجرح لثتي..
رحت للصيدلية أدور شي ماهو معقد .. شي بسيط.. لقيت هذي و مكتوب عليها سوفت.. شريتها و مرررررررة حبيتها.. أحس ما عاد تتجرح اللثة لأنها ناعمة .. و تنظف الأسنان تمام.. سعرها حدود 15 من أي صيدلية.. اللي عندي مثل ما قلت لكم  soft
خذيت اللون الموف حسيته منعش و بناتي.. مع إن الأزرق كان أحلى بس يذكرني بالفرشة الخشنة اللي كانت قبل عندي ههههه

.     .     .     .     .
 
تونر موية الورد من ماركة بوتانكس اللي تنباع في صيدليات بووتس.. سعره ما أذكر حقيقة بكم بس مو غالي ممكن أقل من 30 ريال.. الحلو في الماركة هذي إن منتجاتها أغلبها طبيعية و صحية للبشرة و ما فيها مواد ضارة بالقدر الموجود في غيرها..
التونر هذا أحطه بقطنة بعد ما أنظف وجهي.. يشيل باقي الأوساخ و المكياج.. و يسكر المسامات.. و بعده أحط المرطب

.     .     .     .     .

نجي للكريم البرتقالي تحت .. هذا المشهور و المعروف من ماركة إليزابيث آردن اسمه آيت أور كريم.. من المنتجات اللي لازم تكون عند أي بنت بصراحة.. هالعلبة القزاز إصدار خاص.. بالعادة تلاقونها في أنبوب أبيض
هذا الكريم قوامه مثل الفازلين بس أخف شوي .. و بدون عطر..
بالتالي ريحته شيييينة مرة خخ.. أنا عني تعودت عليها و صارت عادي عندي.. بالعكس أحبها مرات تحسسني بالترطيب هههههه.. مشكلة الريحة الكل يشتكي منها بالبداية بس بعدين يتعودون.. يعني لا تشيلون هم الريحة..
من استخداماته :
 
-ترطيب الشفايف و الأكواع و الركب..
-ممكن تخففينه بلوشن و ينحط ع الجسم
-و ممكن ينحط ع الكتوف و اليدين و الرجلين لحاله يعطي لمعة
-ينحط فوق أي روج مثل القلوس
-ناس تحطه ع الرموش يعطي لوك لامع و يغذي الرموش
-و ممكن ينحط ع الالتهابات و الحروق بشكل خفيف
-ممكن ينحط هايلايت ع الخدود خفيف إذا ما بتحطين أساس
-ممكن ينحط فوق العين يعطي لوك العين الغرقانة خخ
و أنا أستخدمه بعد لوجهي مثل كريم الليل في الجفاف أو ع المناطق الجافة اللي تتقشر مثل الأنف و حول الشفايف.. و أحطه يوميا ع الشفايف قبل النوم..

.     .     .     .     .
 
اللي بعده زيت جوزي مارن..  هذا جاء حجم صغير سامبل
سمعت عنه كثيييييير للشعر و للبشرة.. بس قلت بلاش أضيعه ع شعري و هو غالي و حجمه صغير خخ.. صرت أستخدمه مرطب على كل وجهي قبل أنام.. و على بشرة نظيفة.. لاحظت بشرتي صفت شوي و صارت أنعم الصباح.. حبيته و راح أستمر عليه يمكن ألاقي له مفعول أقوى بعد مدة أطول ..

.     .     .     .     .

آخر شي كريم لوكستان لليدين بالورد.. ترطيبه خفيف و ريحته زينة
مو ثقيل و يصلح تحطينه في النهار تمتصه البشرة بسرعة بحيث تقدرين تمارسين حياتك عادي من دون ما تحسين بثقل و قرف خخ..


نجي للميك أب :

 
 
هالفترة رجعت أستخدم كثير بلشر نيكس تيراكوتا.. لونه برونز على وردي و فيه شيمر خفيف يغني عن الهايلايت و يخلي الخدود لماعة و جميلة خخ..
 و لأني ما عاد أحط ظلال في تحدي الشهر .. صرت أستخدم الأرواج الفاقعة و الملونة كثير و هذا يناسب و يهدي اللوك شوي خخ.. سعره 25 ريال تقريبا

.     .    .    .    .
 
و رجعت أستخدم البلشر الكريمي من نكس برضو اسمه روز بيتال..
لونه طبيعي جددددددا.. و خصوصا للبشرات السمراء و الوسط .. مرات أحطه طبطبة ع الشفايف بعد يعطي لون نود مطفي جميل..

.     .     .    .     .
 
هايلايتر ماري لو منايزر من ذا بالم.. هذا قصته قصة خخ
شريته أول ما طلع قبل رمضان السنة اللي فاتت.. و مرة نسيته بصراحة مدري ليش
و فجججججأأأأأة انشهر بشششكل..!! و شهرته ذكرتني إني شاريته و رجعت أستخدمه..
عندي هايلايترات و إضاءات كثيرة.. هالشهر حبيت هذا و استخدمته كثير
بس انتبهوا ترا اللون مرة قوي فيه.. انتبهوا تعبون الفرشة مرة وحدة منه
الحلو فيه يصلح ظل و لزاوية العين الداخلية و تحت الحاجب.. خذيته من صيدلية برا المملكة بسعر رخيص 90 ريال تقريبا.. مو زي الفحش اللي هنا في التاجرات الله يهديهن بس

.     .      .     .     .
 
هالشهر زي ما قلت لكم مو كثير أستخدم نود ع شفايفي.. بس هذا الوحيد اللي كنت أستخدمه إذا بغيت و حنيت للنود خخ..
(النود = روج مشابه للون الجلد بين البيج و الوردي و البني)
هو عينة من قيرلان من مجموعة  Kiss Kiss و اسمه 569 Rose Entetant
لونه مايل ع وردي شوي.. وفيه فروست أو شيمر خفيف فضي بس يحلي الشفايف و يبينها كبار و مليانين.. :$ :$
لقيت له سواتش في بوست أجنبي هنا

.      .       .      .     .
 
اللي بعده مسكرة ذي آر ريل من بينفت.. كثير نصحوني فيها البنات و سمعت عنها في اليوتيوب كثير.. حبيتها كثيييير.. بصراحة أنا ما أستخدم عاقصة الرموش.. تخوفني و قد قصت رموشي مرة خخ ..و ما أحس أحتاجها الحمدلله رموشي مو نازلة
لكن مع هالمسكرة رموشي بانت ملفوفة مرة كأني مستخدمة عاقصة..!!!!
و عطتني كثافة حلوة و ما تسيح.. عيبها الوحيد شوي تنظيفها صعب بس ما فيه شي يعجز عنه البايوديرما خخ

.      .      .     .     .
 
مسكرة بوبا الشفافة.. فرشتها صغيرة و هي مخصصة للحواجب تثبتها مكانها
أستخدمها بعد ما أعبي حواجبي بأي ظل بني بارد.. و يثبت الحاجب و لا يخليه يخرب مع الغطوة و الحر.. مرة ممتاز و علبته كيوت :$ :$


.     .     .     .     .

 
آخر شي و لأني زي ما قلت كثير أستخدم الأرواج الفاقعة هالشهر.. صرت أستخدم كحل بني من ميبلين.. و على فكرة هالكحل بررررررييييييء من إشاعاتكم عن جفافه بالعلبة خخ.. هذا البني عندي من سنة و شوي و لسا زي أول ما شريته ..
ممكن ما تسكرون العلبة زين أو تخلونه مفتوح مدة طويلة.. مدري عنكم خخ
طبعا لونه بني الكحل معه قليتر خفيف بس ما يبان ع الجفن.. ثابت طبعا مثل الأسود
و مخططة أشتري الأزرق و البنفسجي منه بعد!! سعره حدود 40 ريال
و أستخدمه مع فرشتي المفضلة للكحل و هي سيقما إي 05
 
.     .     .     .     .

و بس.. :$
أشوفكم قريب إن شاء الله
تحبون نسوي أسبوع كل يوم بوستات عن المسكرات بس؟!
ردوا لي هنا أو ع تويتر..
و لا تنسوون تتابعوني هنا عشان لو وصلت لـ 500 متابعة راح أسوي قيف أواي كبير إن شاء الله :)
 
peace

Apr 23, 2013

NARS blushes : orgasm and taj mahal

السلام عليكم..
 
كيف حالكم..؟ عذرا ع التأخير..
 
 
اليوم راح أكلمكم عن بلشرات نارس.. خصوصا اللونين اللي عندي و هم
أوقازم orgasm و تاج محل taj mahal
 
 
 
بصراحة تاج محل كنت أبحث عنه من زماااااان.. من يوم كانت تباع نارس في سيفورا عندنا بالسعودية.. و لا ألاقيه إلا تيتسر .. أجربه و أتحسر و أطلع :""
و مرة تيسر لي أطلبه من نوردستروم و وصل الحمدلله..
 
 
أما أورقازم فما طرى لي أشتريه أصلا خخ.. أسمع عليه مدح كثيييييييير ..
في المواقع و المدونات و اليوتيوب.. شوي و يقولون علاج الموت خخ
و عندي كم بلشر يشبهون له.. و قلت ماله داعي
لكن سمعت وحدة ماني متذكرة مين بالضبط في اليوتيوب.. تقول نفس كلامي..!
بعدين يوم جربته تغيرت نظرتها له و صارت تعشقه و كذا خخ
 
المهم لين ذاك الحين و أنا ما فكرت أشتريه.. و يوم طلبت علبة منتجات سيفورا
جاء معها بلش أورقازم حجم كبير.. أحسه يقولون جربيه يختي يمكن تغيرين رايك خخ..

 
و هذولي صورتهم :
 
 
راح أوصف لكم كل لون الحين و نبدأ بتاج محل :
 
 
تاج محل لونه برتقالي و يخوف في العلبة.. بس يوم ينحط ع الخد يعطي لون مشمشي منعش و خفيف.. و فيه لمعة ذهبية بسيطة.. بصراحة يوم شفت صور لناس تحطه لقيت إن السمر محظوظين في هاللون طالع عليهم عجييييب..!!
و اللي مسوين تان بيعجبهم أكثثثر..
أنا حبيته علي.. صحيح كان نفسي يكون مبين برتقالي أكثر  بس ما عليه يظل حلو..
اللي يعجبني في هاللون إنه ممكن ينحط ظل و ينفع للدمج في كسرة العين مع أي لون ثاني.. و ينفع لحاله بعد.. أحسه منتجين في واحد.. ظل و بلشر..
 
 
أما أورقازم.. وردي ع شوي كورال و فيه شيمر ذهبي
 
 
يوم جربته حسيته حلوو صح و لونه مناسب للجميع..
بس مو لدرجة المدح الكثييييييييير اللي عليه..
هو حلو و زين و يهبل ..لا تفهموني غلط!
بس فيه كثير بلشرات من نارس مثل مادلي madly و سِن sin أحسهم أحلى و لا لقوا مدح و تقدير و إعجاب مثل هذا .. أعيييد و أكرر عاجبني و راح أستخدمه .. بس أحسه مب وااااااو مرة.. و ما بموت لو ما شريته خخ..
 
نشوف السواتشات ؟
 
 
أنا مثقلتها مرة عشان تشوفون الألوان و اللمعة حقتها..
بس في الواقع خففوه شوي ما يحتاج أقول لكم :)

أخيرا ثبات البلشرات فوق الخيال..!! أنا أحطهم و أتوضأ و لا يروحون من خديداتي
و السواتشات اللي سويتها لكم ع يدي : تروشت و توضيت كم مرة
و لا راحت إلا خفيف

و بس
 
حابين تعرفون عن هايلايت نارس (ألبتراس) تفضلوا هنا
و إذا ودكم تشوفون البرونزر الشهير (لاقونا) و سواتش له تفضلوا هنا
 
أشوفكم الأسبوع الجاي في مفضلات شهر أبريل :)
 
peace

Apr 15, 2013

TerTer Talk : no heat - no eyeshdows - no shopping and more

مرحبا
 
فكرت أسوي بوستات بعنوان ترتر تتكلم خخ..
راح تكون غالبا سوالف و نقاش و خصوصا إني فتحت الردود للجميع يعني إن شاء الله الكل يقدر يبدي رأيه و يتفاعل معاي..
أنا هالفترة أحس مره مرهقة و مضغوطة من شغل المدرسة.. عندي درس نموذجي السبت و عندي معرض صور لطالباتي الثلاثاء..
و غير إننا على نهاية تيرم و نبي نختم أشغالنا و نخلص أمورنا بدري..
هالشي خلاني أفكر أرتاح و أريح جسمي و بشرتي شوي.. و قررت شغلتين اعتبرتهم تحدي لي
 
إني ما أستخدم أي حرارة على شعري لمدة شهر ( لا استشوار و لا فير و لا ليس)
و إني ما أستخدم ظلال على جفوني أبد بس كحل عشان عويناتي ترتاح شوي خخ..
و صار لي تقريبا أسبوع و شوي من بديت هالتحدي.. و اللي حمسني إن الصيف جاي و الشعر و المكياج بيكون في أوج تألقه وقتها ههههههه.. ففرصة يرتاح شعري و عيني هالفترة..
 
و لقيتها فرصة إنه أستخدم هالزيت من جوزي مايرن..

هو جا عينة صغيرة مع مشتروات سيفورا هنا
كثير يمدحونه للشعر و الجسم و الوجه في اليوتيوب..
جربته كم مرة لأطراف شعري و للحين ما حسيت بفرق كبير. عادي يعني. يمكن مع الاستمرار.. لكن جربته على وجههي و يا سلااااام.. حسيته يرطب فعلا .. حطيته في الليل و نمت عليه..
ما أقدر أحكم الحين عنه لين أجربه كم مرة بعد
وقتها راح أسوي ريفيو مفصل هنا في المدونة..
 
بالنسبة لتحدي الشوبنق .. راح تقريبا 3 شهور و أسبوعين ما اشتريت أي شي له علاقة بالتجميل و العناية.. إلا الشغلات الضرورية اللي خلصت .. اشتريت شامبو لأن اللي عندي خلص و اشتريت بلسم 3 مرات و خلصوا و بروح أشتري قريب واحد جديد.. غير كذا ما اشتريت لا مكياج و لا مرطب و لا عطور الحمدلله
 
و في هالفترة خلصت مسكرة و باقي شوي في كريم الترطيب حق النهار و باقي شوي في كريم الليل و باقي قليل في كريم العين..
و إذا خلصوا ما رح أشتري لأن عندي باك أب كريمات بأفكهم و أستخدمهم ..
 
مم.. وش بعد أبي أقول لكم.. فيه كتاب إنجليزي مرة جميييل يتكلم عن التجميل و يجاوب على أسئلة الناس و فيه بعد تاريخ بداية بعض الماركات و المنتجات..
حابين أترجم لكم منه..؟
 
و فيه في بالي تاقات كثيرة أبي أسويها.. وش رايكم؟
 
 
و يا ليت تصوتون لي على اليمين بخصوص أفضل نوعية موضوعات تعجبكم.. عشان أقدر أطور المدونة .. و لا تنسون تتابعوني ع تويتر و إنستقرام و في المدونة..
 
 
و احتمال إذا وصل عدد الفولورز في المدونة لـ 500 أسوي قيف أواي
عشانكم :$
 
 
بأقول لكم زي ما تقول لي أمي : "لا تنسون الأذكار"
و أشوفكم وقت ثاني قرييييييب
 
()

Apr 13, 2013

my PERFUMES عطوراتي :)

السلام عليكم..
كيف حالكم اليوم..؟ :)

حبيت أشارككم مجموعة عطوراتي اليوم اللي على هيئة بخاخ..
و أنا و أخواتي و أمي بصراحة نتبادل العطور كثير .. فالحين هذي اللي عندي
بعضها قديم مرة و بعضها قديم شوي خخ.. و ما أفتكر الأسعار كلها بس راح أحاول أعطيكم تقريب لها..

مشكلة وصف العطورات صعب علي شوي..
فـ راح أجيب وصفها التقريبي من موقع مرة جميل للعطور
فيه أغلب العطور و يعطي شوي تقريب للروايح و بالنسب كمان..
و الحلو فيه يعطيك عطور أعجبت ناس ذوقهم مقارب لك عشان لو حبيتي تجربينهم..
أول عطر هو زارا روز..
ريحته مرة ناعمة و سعره رخيص ممكن 70 ريال أو أقل شوي
يعتبر عطر صيفي و ينفع للنهار أكثر من الليل..
فيه ورد من اسمه طبعا و فيه ياسمين و شوي مسك

 _____________________________________
هذا ورد طائفي بخاخ من جنيد.. ريحته مرة مركزة و قوية و أحب أبخ منه قليل مرة
و بعدين أحط أي عطر ثاني معه
مو كثير يحبون الورد الطائفي .. أنا أحبه و أحطه دهن ع شعري..
بس هذا مرة ثقيل و ما أستخدمه كثير لأنه من جد مررررة مركز و مو حلو لحاله.. لازم معه عطر ثاني ..
 _____________________________________
هذا عطر راهي من الماجد.. سعره 150 تقريبا
و في الخصم خذيته بـ 80 ممكن.. أو 70
العطر الوحيد اللي لفتني و حسيته مميز و غير عن البقية في الماجد
 ينفع رجالي و نسائي
ريحته مقاربة لتوم فورد بلاك أوركد.. شرقي جميل و الله .. أحبه
 _____________________________________ 
هذا عطر جاني هدية من فترة من إسكادا اسمه Island Kiss .. هذي العلبة الصغيرة
شكل العلبة يسحر.. ريحته فواكه استوائية مشمش و منقا و شوي ورد و خفيف مسك..
منعش مرة و يعتبر صيفي و نهاري
 _____________________________________ 
هذا العطر المشهور من لوكستان.. العنبر أو amber .. مدري أتوقع تغيرت علبته الحين
هذا ريحته عنبر مع قليل مسك و فانيليا.. مررررررة حلو و ينفع للنهار و لليل.. دافي مرة هالعطر.. و مناسب للرجال بعد
 _____________________________________
الحين هالعطر من إيف سان لوران اسمه baby doll.. قديييم مرررة..
 يذكرني بالطفولة.. كان أول عطر أقتنيه لي و اشتراه لي أبوي .. أذكر إني اخترته عشان اسمه زمان خخ
خلص طبعا في ذيك الأيام يوم كنت بسادس.. بس شفته و حنيت و شريته قبل فترة..
هالعطر بالنسبة لي يعتبر تركيبة متوازنة من الفواكه و الورد فيه شوي فانيليا خفيفة و خشب الصندل..
منعش مننننععععععش.. و كثير يسألوني عنه إذا حطيته.. يعتبر صيفي و نهاري.. كفاية علبته تأسر :$
 _____________________________________
هذا العطر من توم فورد اسمه وايت باتشولي white patchouli .. ريحته شرقية بحته..
كأنه مخلط عود و قليل ورد .. ينفع للعزايم الكبيرة و الزواجات و الأعياد و أحسه ثقيل ما يعتبر خفيف و هادي ..
 _____________________________________
هذا عطر بربري سمر Burberry summer .. بربري كل صيف تطلع عطر بهالإسم
و لا عاد ينزل.. و كل سنة عطرهم يحلى و يحلى.. اللي عندي حق 2011..
أغلب عطور بربري سمر من اسمها صيفية و خفيفة و تكون مزيج من الورد و الفواكه
متحمسة أشم حق هالسنة أكيد حلو..
 _____________________________________
هذا عطر كلوي و اسمه Chloe Eau de Parfum  .. العلبة صغيرة جت مع كوليكشن ..
ريحته منعشة و أنثوية.. مزيج من الورود و نتفه فواكه.. منعشة ريحته و يصلح صبح و ليل ..
 _____________________________________
العطر الغرام .. كوتور كوتور اسمه Couture Couture Luxury Edition 
هذا العطر كثير دافي مزيج من الورد و الحمضيات و شوي فواكه و فانيليا..
ريحته قوية بس أحس تنفع للنهار و الليل..
 _____________________________________
عطر جوفان مسك.. فيه نوعين واحد اسمه وايت مسك و هذا المسك..
المسك أحسن بكثيييير .. ريحته منعشة نفس شامبو جونسون للأطفال
سعره بحدود ال30 ريال و يباع في بنده و الدانوب..
ريحته أبدا ما تثبت ههههههه.. بس منعشة بشكل كبير لدرجة ما عندي مشكلة أبدا أبخ منه كل شوي
 _____________________________________
هالعطر خذيته من سوق نايف في دبي.. اسمه ملكة طبعا هههههههه..
هذا أقسم لكم نفسسس ريحة مس ديور شيري.. نفففففسسسسسسسه بالتمام..
بس سعره أرخص كثير ممكن بـ 50 .. من محل اسمه الزعفران أعتقد..

 _____________________________________


إلين هنا و تعبت.. راح أكمل لكم العطور في جزء ثاني قريب..
و عطوني اقتراحاتكم لعطور خفيفة يكون فيها شوي فواكه و ورد..


Apr 9, 2013

Coral\Pink eyeshadows for SUMMER :D

السلام عليكم
 
مرة شكرا ع التفاعل الكبير اللي غمرتوني فيه ..
و الحمدلله إنكم استفدتوا و قدرت أساعد بعضكم في أمور التجميل

كثير جتني طلبات على مكياج مناسب للصغار و المبتدئات ..
و فكرت بما إن الصيف جاي.. و هذي اللونين دايم نشوفهم بالصيف
أتكلم عنهم لكل الفئات ..

هم الكورال (البرتقالي المايل ع الوردي)
و الوردي الناعم..
 
البوست كان المفروض ينزل أمس بس الفوتوشوب يستهبل
و اللاب توب مصاب و الحال كسيفة خخ..
 
 
نشوف الظلال بالتدرج من الوردي للكورال و البرتقالي :
 
SEPHORA shimmer no1
 
هذا ما عاد موجود في موقعهم الأساسي بس لسا محلات سيفورا في السعودية تبيع هالمنتج
هو عبارة عن قليتر صغير مرة فضي مع بقمنت وردي.. أحب أحطه طبطبة بالإصبع..
خذيته في تخفيضات سيفورا قبل فترة مع لون ثاني بيج.. سعرهم وقت الخصم ممكن 20 ريال أو أقل
 
 
e.l.f mineral pigment in Sweet
 
شهادتي في بقمنت إيلف المينيرال مجروحة..!! كثييير يعجبني قوامها و لمعتها و ثباتها روعة..
سويت عنها ريفيو زمان تلاقونه هنا
هذا اللون وردي مايل ع فضي.. ع الجفن يبان أفتح من العلبة.. و ممتاز كإضاءة للوجه بعد
 
 
NYX chrome pigment in PRINCESS no 29
 
هذا البقنت أحب أستخدمه على نفسي و على قريباتي الصغار..
لونه وردي ع كورال.. و فيه لمعة ذهبية جمييييييييلة.. 
 
 
MUFE star powder no. 969
 
هذا بالضبط نفس لون بقمنت نكس اللي قبله بس فيه قليتر صغييييير ذهبي..
جميل و الله
 
 
BOURJOIS intense no.03
 
ظل من مجموعة إنتينس.. وردي ع كورال فاتح.. بقليتر فضي صغير..
رووووعة.. خالي من البيربن بعد..
 
 
MUFE no. 153
 
هذا اللون هادي جدا.. طبقة خفيفة منه يصير كأنه قريب ع البيج
و إذا كثرتي يبان نفس اللي بالعلبة.. و ينفع بلشر للبشرات الفاتحة.. تكلمت عنه زمان في التمبر هنا
 

 
smashbox FLAMINGO 
 
الظل الوحيد عندي من سماش بوكس.. جميل و قوامه زي الزبدة ناااااعم..
بس مو كل ظلالهم كذا يوم جربتهم بسيفورا 
عموما هذا اللون صحيح مبين بالعلبة برتقالي.. بس هو كورال يعني لمعة ذهبية خفيفة..
حلو كـ بلشر بعد.. أنصحكم فيه
 
 
 SEPHORA mono color in shimmering sunset no.53
 
هاللون كان عليه خصم قبل فترة و صار سعره بـ 32 ريال و قبل كان بشي و 70 ريال..
خلوا عيونكم دايم على خصوماتهم.. لأنهم ينزلون كل مرة على ظل أو ظلين و كم محدد و مناكير بعد..
نرجع للظل خخ.. هذا لونه شوووي و يصير برتقالي بس إذا اندمج يعطي لوك كورال ع نحاسي
و لمعة ناعمة ذهبية.. هو و اللي قبله من سماش بوكس بيطلعون مرررة حلوين ع البشرات الوسط و السمراء
و هاللون بعد ينفع بلش ..
 
 
و بس
يا رب تكون أعجبتكم الظلال..
إن كان نفسكم في ظلال عودية ادخلوا هنا
و إذا حابين إقتراحات للظلال التوبية تفضلوا هنا راح تعجبكم و تناسب الكثير بعد
 

PEACE
()
 

Apr 5, 2013

How to : Cat \ Winged Eyeliner !

مرحبا..
كيف حالكم..؟
اليوم أنا كثير متحمسة .. راح أسوي شي كان نفسي فيه من زمان
إن شاء الله أبدا أسوي دروس تجميل.. راح أحاول تكون أسبوعية
و هو كان تلبية لطلب وحدة حبوبة و نفسها تتعلم كيف أسوي رسمة عيني :$
و أكيييد بيفيد الكثيرات
 
. . . . . . . . . . . . .
 
و الفضل لله أولا.. ثم للفنانة نورا با عقيل اللي رسمت لي وجه خاص فيني و مدونتي ..
أو مثل ما يسمونه face chart
غمرتني بصبرها و فنها ربي يسعدها..
هنا حسابها ع تويتر : @nowa_88  .. يا ليت تسوون لها فولو و تتمتعون بكلامها و صورها عن الديكور
 
. . . . . . . . . . . . .
 
 اضغطوا ع الصورة و تكبر
 
اليوم درس الميك أب هو شي معروف كثير بس لازلت ألاقي بنات ودها تتعلمه..
و قلت أشارككم فيه و يكون مقدمة زينة لدروس الميك أب إن شاء الله..
و هو كيف ترسمين الكحل المعروف بـ الكات آيز
بأسهل طريقة ممكنة و هي اللي أسويها دايم
 
. . . . . . . . . . . . .
 
بالنسبة لي كنت أحس هالرسمة حلم خخ..
و يوم تعلمتها كانت تاخذ مني 10 دقايق أو ربع ساعة
الحين ما تتعدا الدقيقة و أكون راسمة العينين و مخلصة ..
و مع التدريب المستمر راح تضبط معاكم أنتم بعد
غالبا أحب أستخدم كحل ميبلين الكريمي.. مع فرشة سيقما E05 أو E10 ..
هنا استخدمت E10 في الدرس..
و ممكن نفس الطريقة تسوينها بأي نوع كحل سايل أو كريمي أو قلم..
أهم شي الطريقة وحدة ما تفرق نوع الكحل.. 
 و يا ليت يكون عندكم مراية تشوفين فيها عيونك الثنتين سوا..
عشان يوم ترسمين العين الثانية تشوفين الأولى و تحاكينها..
و تكون نفسها مو مختلفة أو طالعة أو نازلة و كذا..
لأن المرايات الصغيرة مرة تخليك تشوفين كل عين لوحدها حلوة و مرتبة
 بس ما يكونون نفس الشكل النهائي
 
. . . . . . . . . . . . . 
 
يالله بسم الله نشوف كيف..؟
 
أول شي فتحي عينك و ابدي خط من بداية العين للخارج يكون على امتداد خط الرموش السفلي..
مثل اللون الأخضر.. كأن الخط يكمل خط الرموش السفلي.. انتبهي لا تطلعين مرة أو تنزلين مرة زي الخطوط الحمراء
عشان ما يبان الشكل غريب أو ممكن يبين عيونك حزينة أو ذبلانة أو أصغر ..
 

 
و كذا أول خطوة
 
 
 
بعدين غمضي عينك
 
 
و من نهاية الخط اللي رسمتيه على برا إنزلي لجهة الرموش
و بيصير معك شي يشبه المثلث مثل كذا :
 
 
و بعدين بالكحل عبي الفراغ.. مهم كثييير الكحل يوصل للرموش ما يكون فيه فراغ بين الرسمة و الرموش
و بعدين ابدي بشويش ارسمي خطوط صغيرة شوي شوي على جوا..
لو رسمتي و أنت مبتدئة خط واحد متصل ممكن تكون رسمتك عريضة شوي..
عشان كذا شوي شوي لين توصلين بداية العين ..زي كذا :
 
 
 
 
لو شكله ما ضبط من أول مرة ما عليه.. يمديك تعدلين الطرف اللي فوق و يكون تمام..
و الحين فتحي يا مكحولة العين خخ.. و راح يكون معاك الشكل كذا :
 
 
 
 
ممكن لين هنا و تكون رسمتك خالصة .. يعني رتبي شوي فيها و انتهينا..
بالنسبة لي أحب العيون مسحوبة أكثر و ذا.. و أعبي المكان للي كنه حرف v .. 
 محددته لكم بالأخضر :
 
 
زي كذا النتيجة تكون إذا عبيته :
 
 
 
و خلصنا..!!!
 
 إذا حابين ممكن تكملون الكحل من تحت و يكون كأنه يكمل الرسمة اللي فوق.. و توقفون للنص زي كذا :
 
 
 
و ممكن تقفلون الرسمة زي كذا :
 
 
 
 
مهم جدا تكون رسمتك من برا عريضة و من داخل نحيفة..
و كل ما سحبتي الكحل لبرا أكثر راح يعطيك إتساع..
 
اللي عيونهم مدورة يعرضون الرسمة و يكثفونها من برا 
و اللي عيونهم صغيرة شوي أو العيون الآسيوية يعرضونها من النص شوي عشان تعطيهم تدوير للعين و توسيع..
 
. . . . . . . . . . . . .
 
و هذا كل اللي عندي لليوم..
 
قولوا لي رأيكم في موضوع الدروس.. هنا أو ع تويتر أو انستقرام أو ع الإيميل ..
و شاركوه مع صحباتكم و قريباتكم..

 
و شكرا مرة ثانية يا نورة.. شعور حلو يكون لي فيس تشارت مختلف عن البقية :$
 
peace
()