Sep 28, 2014

EMPTIES! منتجات خلصتها :D

السلام عليكم و رحمة الله

 
اليوم راح أشارككم منتجات خلصتها و رأيي فيها..
سويت موضوع مشابه له السنة الماضية هنا لو حابين تشوفونه

 
 
يالله نبدأ؟
 
 
زبدة ذا بودي شوب بالخوخ.. ممتازة مرة و عموما أغلب زبداتهم تعجبني
سعرها 70 ريال تقريبا ..يعجبني فيها ترطيبها و ريحتها اللذيذة
و الحين شريت وحدة ثانية منها و قربت تخلص خخ
 
الزبدة الثانية عطوني إياها هدية في محل أرجوان السويدي..
و شفتها تباع في النهدي.. بس مرررة ما حبيتها لأنها ثقييييييلة
و ما تمتصها البشرة أبد.. بالقوة خلصتها و ما برجع أشتريها
 
 
 
برايمر بينيفت.. حلو و جميل و عندي منه واحد ثاني الحين أستخدمه
زين و يعبي المسامات.. و يخلي الأساس flawless
 
سيروم seaweed من ذا بودي شوب للمسامات..هو  علاج مو مكياج
أحطه قبل المرطب و لاحظت المسامات صغرت بالاستمرار عليه
و تقييمه عاااااالي في موقع ذا بودي شوب الأمريكي..
بأرجع أشتريه إن شاء الله
 
مزيل المناكير من ماركة فارمسي بالليمون..
الحلو فيه إنه رخيص و حجمه صغير ينفع للسفر و الدوام
فيه منه بالفراولة خلص و رميت علبته ما صورتها للأسف
موجود في السوبرماركتات زي الدانوب و بندة..
 
مزيل مناكير سيفورا المشهوووور.. أول ما شريته حبيته كثييير
بس لأن أغلب مناكيري غامقة بعد فترة صار المنتج من جوا غامق
و يجي اللون ع أصابعي و ما عاد تنظف أظافري زين
و إذا جيت أمسح مناكير القليتر يتقطع الاسفنج اللي داخله :(
لو أنت مناكيرك دايم فواتح بيعجبك لأنه سريع و سهل
بس بالنسبة لي ما أتوقع أشتريه مرة ثانية
 
 
 
سيروم Absolue Precious Cells Concentrate
من لانكوم.. مكتوب عليه إنه يخلي البشرة نضرة و ممتلئة و يخفف التجاعيد
مم.. ما لاحظت أي تغيير أو تحسن في بشرتي.. غير إن قوامه ثقيل ما تمتصه
البشرة.. عموما خلصته و ما برجع أشتريه
 
كريم مرطب من ماركة سيبو اسمه
Sea Buckthorn Nourishing Facial Cream
شريته من أمريكا.. و متوفر أونلاين.. مكوناته طبيعية
و زينة للبشرة.. و حبيييييييته كثييير لأنه خفيف ع البشرة
و تمتصه بسرعة.. إذا سافرت بارجع أشتريه
 
مزيل مكياج العين ماركة no miss مكوناته طبيعية شريته من أمريكا
ما أعجبني أبببد.. يحرق العين مرة.. و فوق هذا ما ينظف مكياج العين أبد
صرت استخدمه لوجهي لين خلص.. و ما رح أشتريه خلاص توبة خخ
 
بعده بلسم أخذته من أمريكا من ماركة Avalon Organic
بالزيتون و بذور العنب.. حلو و يرطب الشعر..
بأرجع أشتريه إن شاء الله بس بأجرب أنواع ثانية من الماركة
ممكن تلاقونه أونلاين بعد..
 
 
 
بخاخ De Slik من إربن ديكاي مثبت للمكياج و يسيطر ع الدهون
اشتريت حجم صغير عشان أجربه و أعجببببني كثيييير..
موجود في بعض فروع سيفورا عندنا بس الحجم الكبير
أنصحكم تجربونه بيعجبكم أكيد.. و بارجع اشتريه إذا خلصت
بخاخاتي اللي عندي الحين..
 
في النص أسوأ منتجين خخ.. منظف مكياج العين من ماركة سمبل في بووتس
و مزيل المكياج من ماركة كودالي.. شخصيا ما ناسبوني أبدا
ما أحس يسوون شي.. كأنهم قوارير موية عادية!! 
مع إن مكياجي مو ثقيل في الغالب.. بس للأسف ما فيه فايدة
استخدمتهم لمكياج الوجه لين خلصوا و ما رح أرجع أشتريهم
 
المنتج ع اليسار زيت ترطيب من ماركة كودالي للوجه و الجسم و الشعر
بما إنه غالي شوي استخدمته ع وجهي بس قبل النوم.. حلو و يرطب
بس إذا جاء بالمنطقة اللي حول العين يحرررق مرة..
يمكن أشتريه أقين بس ما رح أستخدمه ع وجهي.. بأحطه ع الشعر و أشوف
 
 
 
 
مناديل إزالة المكياج من ماركة بيرتس بيز..
مم.. ناشفة شوي و ما تنظف البشرة زي الناس خخ
ما بأرجع أشتريها باختصار ههههههههه
 
و أخيرا قطن من ماركة تارقت الشكل المستطيل.. شريته من أمريكا
يالله يا بنات مررررررررررة حلللللوووووو و حبيته
و سعره مناسب و كميته كبيرة.. بالله إذا لكم أحد رايح
أمريكا و استراليا و عندهم تارقت في مدينتهم خلوه يشتري لكم منه


 
هذي طبعا تجاربي الشخصية.. ممكن اللي أعجبني ما يناسبك
و اللي أكرهه يكون مفضل عندك.. فبدون زعل يا جماعة خخ


 
و بس
لا تنسون التكبير و الذكر في العشر.. و ادعو لي :$

 
PEACE
 

Sep 23, 2014

benefit tinted lip balms review and swatches


السلام عليكم..
كيف حالكم؟ هاااااانت خلاااااااص قرررربت الإجازة خخ
:""
 
 بينفيت أطلقت مجموعة مرطبات جديدة ملونة للشفايف
و هي بنفس ألوان التنت (tints) الأربعة حقتهم المشهورة
تلاقونها في وجوه و سيفورا و ديبنهامز
 
عندي منها 3 ألوان بس..
 

bene balm - cha cha balm - lolli balm

 
 
bene balm - cha cha balm - lolli balm


lolli balm

 
أول شي لاحظت في المنتج هو شكل العلبة الأنيق..!!
و فيه ريحة ورد خفيفة و حلوة.. و كمية المنتج ممتازة في العلبة..
 و ترطيبها ممتاز جدا..

بس اللي ما حبيته فيها إن اللون فيها جددددا خفيف!! كأنها قلوس
يعني لازم تعيدين عليها كثييير عشان يبان اللون
 
و أقوى تركيز بالنسبة للون موجود في الدرجة الحمراء bene balm
و بعدها lolli balm و هي الدرجة المفضلة عندي منهم..
أما  الدرجة اللي شبه شفافة و ما حبيتها هي cha cha balm
 
إذا أنت تبين شي خفيف و ما تحبين تحطين أرواج قوية و في نفس
الوقت محتاجة ترطيب راح تعجبك هذي..
 
bene balm - cha cha balm - lolli balm

 
لو عندك التنت من قبل ممكن تستخدمين هذا فوقه يعزز اللون و يرطب..
لأن التنت ينشف الشفايف.. أتوقع عشان كذا ابتكروا هالمرطبات خخ


بالنسبة لي راح أستخدمهم بما إنهم عندي و أخلصهم إن شاء الله
لكن إذا خلصت ما أتوقع أرجع أشتري منها..
 و في رايي إذا أبي ترطيب قوي و لون واضح راح استخدم أرواج ريفلون لب بتر
 اللي سويت عنها تقرير هنا قبل سنتين تقريبا..


باختصار هي حلوة للترطيب بس.. و ما تحتاجين يكون عندك كل الألوان منها

و بس
البوست الجاي إن شاء الله عن منتجات خلصتها و رأيي فيها
ألاقيكم قريب بإذن الله.. لا تنسوني من دعاكم..


PEACE

Sep 11, 2014

NYC haul 2: hair and skin care

السلام عليكم و رحمة الله و بركاته 
كيف الدوام للحين..؟ هاااانت باقي شوي ع إجازة الحج خخ

 + + + +
 
 
اليوم راح أكمل لكم الجزء الثاني من مشترواتي من نيوروك
و بيكون عن الكريمات والعناية و شغلات الشعر
ما أتذكر كل الأسعار للأسف .. يالله اذكروا ربي
و خلونا نبدأ!
 أي شي مكتوب بالأخضر اشتريته من سوبرماركت Whole Foods
و هو أكبر سوبرماركت يبيع منتجات طبيعية و عضوية في أمريكا




Sep 5, 2014

ILLAMASQUA Cream Pigments

 
السلام عليكم..
 
 أنا مررررررررررة معصصصصبة :@
كتبت موضوع الجزء الثاني من مشتروات نيويورك
و حفظته.. و جيت الحين ما لقيته!!! ^%$#*)@!&
قد تعبت عليه و كتبت كثير :(
يالله الحمدلله ع كل حال..

المهم عشان نفسيتي ما تتعب بأرجع أكتبه بعد كم يوم
و اليوم حبيت أسوي لكم تقرير عن البقمنت الكريمي من إيلاماسكا
اللي وعدتكم فيه من زماااااااان (بس الكسل و ما يسوي خخ) :$
 
 
Hollow - Emerge - Delerium
 
 
هذا المنتج مو جديد.. موجود من 5 أو 6 سنوات تقريبا
أول ما طلع اشتريته من موقع أسوس.. ما أتوقع يباع
في أسوس الآن .. بس تلاقونه في موقعهم هنا
و فيه في محلات بلومنق ديلز أتوقع
 
سموه بقمنت كريمي لأن تركيز اللون فيه قوي جدددا
و ممكن يستخدم ع أي مكان بالوجه و الجسم..
سعر الواحد تقريبا 130 ريال.. نشوف السواتشات و نكمل؟
 
Hollow - Emerge - Delerium
 
طبعا اخترت 3 درجات أقدر أستخدمها للعيون و الوجه
(ديليريم) لونه موف مايل للبني .. (إيميرج) مشمشي فاتح
و (هولو) بني فاتح مايل للرمادي.. ما فيهم شيمر
 
زي ما قلت لكم شريتهم من 5 سنوات تقريبا و للحين أستخدمها
صحيح ما هي كريمية مرة زي زمان.. بس للآن حلوة و سهلة بالدمج
أحطهن بإصبعي بالطبطبة.. و ممكن تستخدمون معها فرشة ظل منفوشة
 بس أنا أشوف حرارة الإصبع تسهل توزيعهم دمجهم أكثر
 
لما أستخدمهم ع عيوني أحرص أحط برايمر قبل عشان ما تتكتل
لأنها عادية مو ضد الموية!
و أحبببببب أحط فوقها البقمنت عشان يثبت و يبرز لونه
و لأن جفوني غامقة استخدم (إيميرج) المشمشي غالبا عشان يخفف السواد
و يخلي لون الظلال يبان حقيقي و ما يتغير ع جفوني..
 
كل الألوان اللي فوق استخدمهم بلشر كريمي
و (هولو)  يصلح للكونتور إذا بشرتك فاتحة.. أنا استخدمه للكونتور
و ملائمني كثير و ما يميل ع برتقالي فيبان طبيعي جدا..
 
أنصحكم فيها.. و بصراحة ما ندمت عليهم أبد..
 و ناوية ع لونين ثانية منهم (Androgen) و (Depravity)

يالله أتمنى لكم ويكند سعيد..
و بداية عام دراسي جميل


PEACE