Jun 29, 2013

gold and bronze eyeshadows for SUMMAA XD

السلام عليكم..
اليوم راح أكمل سلسلة الألوان اللي سويتها قبل
و خلوني أذكركم بالألوان اللي تكلمت عنها من فترة
اليوم راح أتكلم عن الظلال الذهبية و البرونزية.. هالألوان مناسبة كثير للصيف
و تصلح لجميع درجات البشرة .. و تنفع للمناسبات الكبيرة و مع ألوان الأرواج الناعمة و الصارخة..
نشوف الظلال ؟

INGLOT 404

Too Faced honey pot 
اللون البني اسمه cocoa puff

NYX ORO

MD pigment
هذي الماركة رخيصة و جميلة.. بس اللون انمسح اسمه للاسف إذا حابين ريفيو عن منتجاتي من هالماركة عطوني خبر ع تويتر

INGLOT 34

INGLOT 08

Bare Minerals True gold

 و هنا سواتشات من اليمين لليسار بنفس الترتيب اللي فوق


فيه بعد بقمنت ذهبي صارخ من ميك أب فور إيفر تكلمت عنه بالتفصيل هنا
و فيه لون كمان نسيت أصوره.. اللي هو موجود في بالت نيكد 1 و 2
اسمه half baked من أجمل الألوان الذهبية كمان..


و اللي حابة تاخذ فكرة عن ظلال إنجلوت و أنواعها تجي هنا
و بس
() 

Jun 25, 2013

Empties :D

السلام عليكم
كيف حالكم..؟ 

اليوم راح أتكلم عن تجاربي ويا منتجات خلصتها خلاص.. و إذا أنصح فيها و لا لا..
بالنسبة لي أحب أجرب منتجات كثيرة و منوعة عشاني أحب أعرف وش الجديد
فـ مو كثير أرجع أشتري نفس الشغلات مو لأنها سيئة .. لا..
بس لأني زي ما قلت أحب أجرب.. لكن إذا منتج لفتني من جد و ما لقيت في نتيجته بديل أرجع أشتريه مرارا و تكرارا خخ
مثل كحل ميبلين الكريمي مثلا!



أنا أكثر شي يخلص عندي البلسم و القناع حق الشعر.. لأن شعري طويل و مجعد خخ
المهم و أشتري منها من كل نوع و شكل.. و غالبا من بوتس


1- قناع الأفوكادو و المكديميا من بوتس.. بـ 15 ريال و دايم عليه عرض
قد جربت اللي بالفراولة كمان من نفس اللاين و اللي بالحنا بعد
أنا ما أعتبرهم قناع لأنهم كثير خفاف.. أستخدمهم مثل البلسم
و ما فيهم شي مرة عظيم.. ترطيب و مفعول عادي زي أي بلسم..
يعني ما يحدث فرق كبير
بين فترة و الثانية أرجع أشتريهم و خصوصا لما يكون عليهم عروض..


2- قناع الحنا للشعر البني و الغامق.. من بوتس برضو و مو متذكرة سعره..
بس كان عليه عرض و قلت أجربه.. حلوووو مرة و أستخدمه مرتين بالأسبوع
ملمس شعري يصير ناعم و يصير سهل التصفيف إذا نشف.. أنصحكم فيه



3- بلسم ماين إن تايل .. من السوبرماركتات الكبيرة.. سعره تقريبا 35 ريال
فيه من شامبو.. مررررة حلو هالمنتج و انتشر كثير في المنتديات و المواقع قبل فترة
أحسه يعطي مفعول ممتاز إذا استخدمته مع شامبو من نفس الماركة
بس لأني نادرا ألاقيه أدور على منتجات غيره..



4-بلسم من في أو فايف VO5 .. تكلمت عنه في مفضلاتي قبل كم شهر
مرررررررة يخلي ملمس الشعر نااااعييييم و يعطي لمعة للشعر
حبيته كثير و سعره حدود 20 ريال.. هذي ثاني علبة منه و خلصتها خخ





5- فايبر لاش من ميك أب فور إيفر .. هذا برايمر للرموش
لونه أبيض و فيه زي الوبر خفيف.. يعطي تطويل و تكثيف للرموش
حبيته كثير و حكيت عنه زمان في التمبلر قبل ما أسوي مدونة
أنصحكم فيه و سعره حدود الـ 100 ريال


6- آآآآآآآآآآآه.. هذا الغراااام هذا .. هذا سيروم شانيل اللي حكيت لكم عنه في التمبلر زمان
قد ما أتكلم ما رح أوفي هالمنتج حقه.. خفيف ع البشرة و يرطب كثير..
سعره شوي غالي.. 500 ريال بس يستاهل كل هللة لي فترة أبي أرجع أشتريه و ما ألاقيه
يا خوفي قطعوه من الأسواق :(



7- كريم الليل من مجموعة Nutriganics™ من ذا بودي شوب
أول ما شفت علبته حسيته منتج رجالي خخ.. المهم استمريت عليه ممكن شهرين أستخدمه قبل النوم..و أهلي لاحظوا تحسن في بشرتي و صفاء..!! و يوم خلص الكريم شوي تغيرت بشرتي و ما عادت ممتازة مثل يوم كنت أستخدمه..
و هذا خلاني أتأكد إن هالكريم بطل..!! سعره قريب الـ 100 ريال و فيه منه حجم صغير للسفر إذا حابين تجربونه


8- هيلارونك آسيد من صيدلية آسيوية تلاقونها في كوريا و اليابان و ماليزيا اسمها ساسا.. المهم الهيلارونك أسيد (آسيد acid = حمض)
هذا الحمض اللي اسمه هيلارونك كثير يستخدم في مكونات المنتجات الآسيوية..
فايدته يحبس الرطوبة في البشرة لساعات و يخليها تستفيد من المرطب على أكمل وجه..
يعني تبون ترطيب يدوم إقروا مكونات الكريمات إذا لقيتوا فيها هالمكون خذوه
هالمنتج اللي عندي هيلارونك آسيد لحاله مركز مثل القطرات.. ينحط قبل أي مرطب و قطرة منه تكفي.. ممكن تشترونه من هنا


9- إيربن ديكي برايمر بوشن .. برايمر للعين ينحط قبل الظلال..
مرة جميل و حبيته.. هالعلبة الصغيرة جت ويا بالت نيكد لما شريته من سنتين..
يعجبني أكثر لما أستخدم ظلال كريمية.. أنصحكم فيه و خصوصا بالعلبة العصار الجديدة.. بس لازال ولائي لبرايمر تو فيسد خخ


10 - لوشن خفيف للجسم بالفراولة من ذا بودي شوب..
كثير سمعت في اليوتيوب عن لوشنات الـ (بيوريه) اللي تنباع في ذا بودي شوب
و إنها كثير خفيفة و تمتصها البشرة بسرعة .. و كانت فرصة أجرب هالمنتج بالحجم الصغير لما جاء هدية ويا مجموعة مشتروات أخذتها منهم رمضان اللي فات.. حقيقة المنتج حلو و خفيف .. بس ريحته مو كثير حبيتها.. الفراولة عموما صعب ألاقي شي يعجبني فيها خخ.. فيه منه بالفل و أعتقد إني لو جربتها راح أحبها أكثر




11- مرطب بحماية من الشمس و خفيف و يصغر المسامات من ماركة Elemental Herbology نفس ماركة القناع السحري اللي تكلمت عنه للوجه قبل أسبوعين
خذيته من برا و الله بس ممكن تشترونها من هنا
الحلو فيه إنه مرة خفيف للنهار و أدمجه مع شوي واقي .. و لاحظت فعلا مسامات وجهي صغرت شوي و تحسن مظهرها.. من كثر ما أستخدمه انمسحت الكتابة اللي عليه حتى ههههههههه.. هنا صورته أوضح:



12- زبدة مقسمة قسمين من ذا بودي شوب.. آآآآآه ريحتها جميييييييلة..
الزبدة أكيد سمعتوا فيها قبل كذا و معروفة.. عبارة عن قسمين قسم خفيف مرة للجسم
و قسم ثقيل و سميك للأكواع و الركب و الكعوب و أي منطقة مرة جافة..
أعجبتني و لحستها لحس من قوة ما خلصتها هههههههههههه.. ما أذكر سعرها و الله بس حول الـ 50 ريال.. بس أنصحكم فيها.. فيه منها روائح ثانية حسب اللي يعجبكم :)



13- كريم اليدين من لوكستان بزبدة الشيا.. ريحته ريحة كريمات زمان خخ..
و قوامه يميل إنه ثقيل شوي.. و يصلح للترطيب العميق.. و بالنسبة لي أحب أستخدمه قبل النوم لأنه ثقيل و ما تمتصه اليد بسرعة و صعب أمارس حياتي و شغلي و هو على يدي..فأحطه قبل النوم :$ .. هذا حجم صغير و فيه منه كبير ما أذكر أسعارهم و الله



14 - عينة مرطب من جيفنشي اسمها سباركلنق او شي زي كذا
ترطيب خفيف للنهار و تمتصه البشرة بسرعة.. حلو للي بشراتهم دهنية و مختلطة
فيه شيمر خفيف يعطي نور للوجه..



15- برايمر و واقي الشمس من ميك أب فور إيفر اسمه يو في برايم
بشرتي مع واقي الشمس دايم تدهن و يسيح هو و المكياج اللي عليه..
لكن هذا خفيف مرة ما يكتم البشرة و يسيح.. و لأنه برايمر في نفس الوقت يساعد المكياج يثبت و يظل مدة أطول



هالمنتجات مجمعتها من فترة عشان هالبوست و آن الأوان أرمي العلب في الزبالة زاحمت الدنيا علي خخ..

أشوفكم قريب.. دعواتكم :$

peace 



Jun 19, 2013

e.l.f. Studio SPF 45 Sunscreen UVA/UVB Protection

سلام عليكم



لأن الصيف جاء و الشمس ولعت و صار لازم علينا نستخدم كل منتج ممكن يحمي بشرتنا من أشعة الشمس.. و لأن كثير بنات يبوني أتكلم عن منتجات إيلف اللي حبيتهم.. راح أقول لكم اليوم عن هذه البودرة و هي من مجموعة الأستويو من إيلف و سعرها 6 دولار..
مرات ممكن تستخدمون أكواد الخصم و تصير بـ 3 دولار..


فيها فلاتر حماية من الشمس و مكتوب فيها خلاصة الصبار و خلاصة بذور العنب و تجي لون واحد شفاف يلائم كل البشرات.. يعني ما فيها تغطية .. و بالنسبة لي و لأختي هالبودرة جدددا عجيبة..!! خفيفة ع الوجه بشكل

ممكن تستخدمينها لحالها مثل الواقي.. أو فوق الأساس تثبته
ما تتكتل و لا تتشقق و تعطي لوك ناعم satin للبشرة

أحطها بكابوكي من إيلف برضو.. أهم شي ما تكثرون منها..!!
إذا كثرتوا تعطي لون رمادي خفيف.. يعني انتبهوا
و ممكن تاخذونها معاكم إذا بشرتك دهنية و محتاجة تحطين بودرة بين فترة و الثانية
يجي معها زي القطنة أو بف.. أنا ما أستخدمها حقيقة بس حاطتها عشان ما تطلع البودرة من الفتحات و تنحاس بكل مكان..



نشوف الصور..؟

العلبة محيوسة شوي من كثر الاستخدام خخ



أتمنى يكون هالبوست الصوغنن فادكم..

و هذي مجموعة بوستات سويتها لمنتجات من ماركة إيلف :
ظلال المينيرال من إيلف
بلشرات إيلف من مجموعة الأستوديو
برونزرات من ضمنها منتجين من إيلف
قلم محدد لتثبيت الروج من إيلف


و خبروني وش حابين تعرفون من منتجات إيلف .. إذا كانوا عندي راح أتكلم عنهم هنا و إذا مو عندي راح أبحث لكم عنها و أعطيكم روابط تفيدكم.. أفكر المرة الجاية أكتب عن الفرش حقتهم.. وش رايكم؟

peace

Jun 15, 2013

Flormar and The Body Shop haul

مرحبا.. كيف حالكم ..؟

طبعا خلص مشروع نو شوبنق و الحمدلله كثير وفرت فلوس و تعرفت على أشياء عندي ما استخدمتها كفاية.. و قررت إني أشتري بحكمة ههههههه

قبل كم يوم فلورمار الماركة التركية كانت مسوية خصم 70 مدري 75 في المية..
ع كل شي في المحل..!! كانت فرصة أجربها بحكم إنه البنات كثير يمدحونها و خصوصا المناكير.. حتى الأجنبيات طايحين في مناكيرهم..!! المهم سويت تويتة سريعة عن الخصم (تابعوني عشان تعرفون معلومات عن الخصومات أول بأول)
و دخلت المحل و زحممممممة.. اللحم في اللحم هههههه..

رحت في بالي ظلين أبيهم من فترة و خلاص
كانوا بـ 25 و صاروا بـ 8 ريال تقريبا..

يوم جيت عند الكاشير أشوف السلال حقت البنات مليانة مناكير..!!
سألت وحدة قلت المناكير صارت بكم..؟ قالت لي بـ 3..
أغمى علي شوي و قمت هههههههه.. رحت للمناكيرات و أخذت 5 ألوان


في الصورة المناكير من اليمين :
فوشي ع موف مرة جميل 445
أحمر غامق مرة مايل شوي ع عنابي 385
بني بلمعة وردية ع برتقالية 414
تركواز غامق لماع كثير سألوني عنه يوم حطيته 441
ذهبي على لمعة مشمشي أو فوشي 308 
أحسه أحسن فوق أي لون ثاني مو لحاله لأنه شفاف تقريبا

و الظلال مطفية اللي كنت أبيهم:
العلبة السوداء رقم 05 بيج مايل ع وردي
و العلبة البيضاء رقم 16 بيج مايل ع أصفر
مدري وش الفرق بينهم و ليش علبة سوداء و بيضاء..!! بس هم كلهم مطفية
و سعرهم مثل ما قلت 8 ريال بعد الخصم

بعدين قلوس من مجموعة Pretty
لونه نود بلمعة قوية مرة.. جربته مرة للحين فوق الروج و حبيت ثباته و لمعته
بعد الخصم بـ 9 ريال و مدري بكم كان قبل بس أكيد فوق 25 ريال

و شفت علبة البخاخ اللي ينشف المناكير بسرعة..
بعد الخصم بـ 16 ريال و حجمها كبييييير مثل علبة السبري حق الشعر..!!
جربته مرة مع مناكير شانيل و شكله بطل.. ريحته حلوة بعد خخ

بعدين رحت لذا بودي شوب.. لأني من شهر استخدمت منتجات شعر من بوتانكس
اللي تنباع في بوتس.. و طيحت شعري بشكل..!! مدري منها و لا وش
مع إن منتجات الوجه حقتهم بطلة مرة.. مدري وش اللي حصل بس قررت أرجع أشتري منتجات الشعر من ذا بودي شوب زي زمان و أشوف إذا المشكلة مستمرة راح أراجع دكتور ممكن فيه شي جواتي مو تمام :(


أخذت بلسم الموز حبيبي اللي تكلمت عنه هنا  و سعره 24 ريال
و خذيت هالشامبو للشعر الجاف.. قبل خذيت للشعر المصبوغ و عجبني بس قلت أجرب حق الشعر الجاف لعله يرطب شعري المسكين شوي.. و سعره 30 ريال تقريبا



آخر شيء خذيته من ذا بودي شوب هو قلم الزيت حق الأظافر سعره 45 ريال
وحدة في اليوتيوب تمدحه كثيييييير و سمعت بنات يمدحونه.. قلت أجربه و أشوف
آخر شيء مجموعة حلقان (أقراط - خرصان - تراكي) لأني مدمنة عليهم بصراحة
خذيت القلوب من فورإيفر21 بـ 19 ريال
و الباقيات من إكسيسورايز ..الصغير المدور بعد الخصم صاير بـ 27 ريال
و المربع الفضي بعد الخصم بـ 20


زي ما قلت لكم تابعوني ع تويتر @TaRaNeeM
أو ع إنستقرام @terter_thinks
عشان تعرفون عن الخصومات و المنتجات الجديدة
و صور سواتشات و مشتروات و شوي شغلات ثانية خخ
و بس

Jun 11, 2013

e.l.f Studio Blushes: review and swatches

السلام عليكم

كيف حالكم..؟

أول شي حابة أشكركم كثيييييير ع وجودكم و كلامكم الجميل لي هنا و تويتر و الانستقرام.. أوقات جد أكون محبطة و طفشانة و حزينة و بعد ما أقرا ردودكم أتحمس و أحس إني مو لوحدي و فيه أحد يشجعني و واقف معاي
الله يسعدكم و لا يحرمني منكم..

اليوم راح أتكلم عن بلشرات إيلف من مجموعة الأستوديو..
سعر الواحد بـ 3 دولارات يعني تقريبا 12 ريال و خذيتهم من موقعهم
eyeslipsface

عندي منها 5 ألوان.. و هذي سواتشاتهم :


نبدأ من اليمين درب الغانمين خخ:

Blushing Rose
هذا اللون لو متابعيني ع انستقرام قد نزلته و هو من الألوان اللي أحبها من إيلف..
لونه بين البني و المشمشي و نقطة ع الموف.. لما ينحط ع البشرة خصوصا الوسط و الغامقة يطلع طبيعي و يندمج مع البشرة بشكل جميل.. فيه شيمر خفيف بس ع الوجه ما يبان أبد..

Candid Coral
هذا اللون مقارب للبلش من نارس اللي اسمه deep throat بس حق نارس مايل ع وردي أكثر.. هاللون مشمشي صيفي.. فيه شيمر ناعم ما يبان كثير ع الوجه
حلووو اللون بصراحة و مرغوب كثير حسب ما تجيني من تعليقات و ردود..

Peachy Keen
هذا أحسه إضاءة أكثر من كونه بلش.. ممكن ع البشرات الفااااتحة مرة يبان
لونه ذهبي ع مشمشي فاتح.. بالنسبة لي أحطه بطبقة خفييفة فوق أي بلش عشان يعطيه لون ذهبي.. لأني إذا كثرته يبان اللون بس تصير اللمعة الذهبية قوية و تبين المسام ..
فـ  أحسه يصلح إضاءة أكثر من كونه بلش و البشرات السمراء راح يطلع عليها خرااااافة.. و بحكم لونه الصعب مو كثير أستخدمه ..

Fuchsia Fusion
هذا ثاني أفضل لون عندي بعد بلشنق روز اللي تكلمت عنه أول واحد..
لونه فوشي ع وردي غامق و مايل لموف.. فيه قليتر فضي خفيف يبان حلو ع الوجه مرة.. و إذا دمجتيه زين ع خدودك يروح و يبقى اللون الجميل..!
أحسه مرة غريب و مميز.. مو كثير بلشرات تكون مايلة ع موف و هو مقارب كثير لبلش من نارس اسمه Angelika بس نارس أغمق نقطة منه..

Pink Passion
هاللون يوم تشوفينه بالعلبة وردي فسفوري..!! يخوف ههههههه
بس يوم ينحط ع الوجه يبان زي أخر سواتش ع اليسار وردي ناعم..
اللون مطفي تماما.. و يناسب البشرات الفاتحة و الوسط أكثر.. كثير ناس تقول إنه مقارب لبلشر نارس Desire .. في العلبة حق نارس أغمق بس يوم يندمجون ع الخدود يطلعون تقريبا نفس الشي.. عني أنا ما أميل للبلشرات الوردية .. فما أستخدمه كثير بس هو جميل و ما به شي..

نجي الحين للثبات.. أنا بصراحة لاحظت عموما إن البلشرات تثبت علي..!
لأني في الغالب أستخدم برايمر للوجه.. بس ثباتهم بدون برايمر زين.. مو ثبات رهيب و خرافي.. عادي يعني زي البلشرات عموما.. بس ما يروح بسرعة و يختفي مع اليوم.. إلا إذا الجو حر و هيك ممكن يروح
و بس..

أشوفكم مرة ثانية.. مع مشترواتي من فلورمار و ذا بودي شوب ()
و يا رب أشتري لاب توب حلو عشان أشتغل أكثر ع المدونة..
عطوني إقتراحاتكم.. يهمني شغل الجرافيكس و الفيديوهات و الأوفيس و ميزانيتي لين 5 آلاف..
لا تقولون آبل لأني أشتغل كثير ع الأوفيس للمدرسة و شوي سالفة ع الآبل

Jun 7, 2013

MUA palette and single eyeshadows !

السلام عليكم

كيف حالكم..؟ اليوم راح أحكي لكم عن الظلال اللي شريتهم من بريطانيا من ماركة إم يو آي MUA ..و كثير قالوا لي أعطيهم رأيي بعد التجربة ..



 نبدأ أول شي في هالبالت و اسمه Heaven and Earth
فيه 12 لون و كلهم شيمر ..ألوانهم طبيعية و كثير يقارنونها ببالت نيكد 1 من إربن ديكي
الألوان مرة جميلة و قوامها حلو.. ناعمة و تعطي لوك جميل و تصلح للنهار و الليل
الشيمر (اللمعة) اللي فيهم خفيفة مو قليتر و لا شي كثير..
سعرها تقريبا 6 باوند يعني 36 ريال تقريبا من موقع سوبر درق superdrug
و هنا السواتشات :
اللي عليهم دوائر أصعب لونين في الاستعمال يبي لهم جهد لين يبان لونهم تمام..
أما البقية تمام ما شاء الله.. اللون اللي تحت يمين في الزاوية استخدمته لحواجبي
وعجبني بعد.. مقارب كثير لنيكد 1 بس نيكد 1 فيه أسود و رمادي و هذا لا
نجي للظلال المنفردة  اللون البنفسجي رقم 9 و الزيتي رقم 7 نوعهم pearl

سعر الواحد 1 باوند..!!! يعني 6 ريال يا نااااس هههههههههههه
هذي فيها لمعة قووووويييييية و عجيييييبة (فروست)..!! حبيتها كثيييير خصوصا البنفسجي..حطيته مرة و الكل سألني عنه..! لمعتهم فضية و تنعكس ع النور بشكل جميل
هنا سواتش للألوان :
قوامها شوي غريب.. هي ظلال بودرة بس مرة ناعمة كأنها كريمية.. جربتها بالفرشة و ما ضبطت معاي و حزنت و الله ههههههه.. بس يوم جربتها باصبعي..!! OMG مرة حللللللللووووووة..


و بس.. تحمست أجرب درجات ثانية من البالت و الظلال و إن شاء الله ألاقي حد جاي من بريطانيا و أوصيه

و أشوفكم وقت ثاني
()


Jun 4, 2013

H&M Gorgeous Tan Powder


أهلا فيكم
 

بودرة قورجس تان من إتش أند أم سببت ضجة ههههههه
هبوا فيها البنات فجأة..!! و أذكر إني جربت التيستر في المحل من سنة
و لقيت لونه نفس لوني تمام اللهم أغمق درجة.. ما شفت جدوى إني أشتريه
سعره الظاهر 30 ريال أعتقد..
 
المهم قبل كم شهر في خصومات إتش آند أم صار بـ 10 ريال
عاد أنا و هوسي بالمكياج قلت فرصة أجربه أشوف ليش البنات حابينه هالكثر
و شريته طبعا و عرضته في مشتروات قبل كذا
نشوف السواتش أول و بعدين نحكي عنه..؟
 

 
مثل ما شفتوا لونه مو كثير مبين ع بشرتي يمكن أغمق شوي
و جربته مثل البلش و عجبني كثيييير.. لونه برونز بس مايل شوي ع وردي
ما عطاني لون كثير بس عطى خدودي عمق أكثر ..
و مرة حطيته ع كل وجهي بشكل خفيف مثل التان
مررررة حبيته أكثر..!!


 
بس فيه مشكلة صغيرة.. هو تمام لونه و ثباته و كل شي..
بس إذا جته شوي رطوبة من عرق و أو موية يسيح و يخرب..!!
هالعيب ما رح يمنعني أستخدمه و الله.. بس قلت أعطيكم خبر
و أتوقع درجة اللون حقته تناسب البشرات الفاتحة.. أو الوسط مثلي
البنات  السمر راح يبان كأنه بودرة عادية مو برونز
 
 
و بس.. أشوفكم البوست الجاي و أنتم بخير و صحة و إجازة  خخ