Mar 31, 2014

Lip Balms Heaven

السلام عليكم و رحمة الله و بركاته..
 
 
كيف حالكم جميعا؟
الفترة الماضية كانت جدا صعبة بالنسبة لي.. جدتي المريضة توفت الله يرحمها
و يمكن هالشي كان أريح لها سبحان الله من التعب اللي جاها من شهور
جدتي ما كانت إنسانة عادية.. كان قوية و كانت مدرسة من الحكمة و مكانها خالي و الله
توقعت أنهار بعد وفاتها و أضعف.. بس الحمدلله ربي ربط على قلبي و ألهمني الصبر
و رحت شفتها و سلمتها عليها بعد الغسل و استودعتها الله و صلينا عليها في الحرم
أتمنى إنكم تدعون لها و لأموات المسلمين.. الله يرحمهم جميعا و يغفر لهم
و شكرا كثيرا و جزاكم الله خير ع التعازي و المواساة في الانستقرام و تويتر
كلامكم و دعاكم خفف عني الكثير.. حسيتكم معاي الله لا يحرمني منكم
و الله يحفظ لكم و لنا أهلنا و أحبابنا.. و يطيل في أعمارنا و إياكم على الطاعة..
 
 
اليوم إن شاء الله راح أشارككم تجاربي مع مرطبات الشفايف
اللي استخدمتها على مدار الخمس سنوات الماضية..
ما رح أدخل في المكونات و التركيب للمنتج.. قوقل موجود خخ
بأحكي لكم عن تجربتي و اللي لاحظته :)
 
 
 
 
1- كارمكس
هذا أسميه الحب خخ.. هذي العلبة الثالثة اللي أخلصها من هالمنتج
و أتوقع واضح عليها أثر الاستخدام..!! سعرها مرة رخيص
ممكن بدولارين.. يعني حول 10 ريال كذا
للأسف ما ينباع هنا بس ممكن بعض التاجرات يوفرونه
جربت منه كذا شكل و نكهة زي ما تشوفون :
 
 
بس الأصلي اللي في الصورة الأساسية رقم 1 هو أحسن نوع جربته منهم..
و ميزته غير الترطيب و حماية الشمس 15..
إنه معالج سريع.. سرييييييييع.. ساااارييييع
يعني لو شفايفك معدومة عدم.. في دقيقة ترجع طبيعية!!
زي السحر و الله.. أنا من اللي يحبون الأرواج المطفية كثير
و في نص النهار أحس شفايفي تنشف و يصير شكلها مو حلو زي الصباح
كل اللي أسويه إني أمسح الروج بالمنديل و أحط كارمكس
و بعد دقيقة أو دقيقتين أحط الروج المطفي مرة ثانية و يا سلام..!! D:
و اللي يخليني أحبه أكثر إنه يعطي شعور زي النعناع ع الشفايف
يقرص شوي خخ "tingle feeling".. أنصحكم فيه و بشدة..
 
 
2- بيرتس بييز
و برضو هالماركة مثل كارمكس لها أنواع و أشكال وألوان
و هذا الوحيد اللي جربته و مفعوله نفس كارمكس بالضبططططط
يمكن كارمكس يتفوق عليه في إنه كريمي أكثر.. و فيه حماية من الشمس
 اللي يميز ماركة بيرتس بييزعموما إن مكوناتهم طبيعية و صديقة للبيئة
سعره 4 دولار تقريبا يعني قولوا 16 أو 20 ريال
سمعت فيه محلات تبيعه في الشرقية مدري الرياض
أفيدوني بهالخصوص.. اللي عندي جابته لي أختي هدية من كم سنة
و للحين عندي و مفعوله ما تغير :$
 
 
3- كودالي
مرطب كودالي للشفايف سعره بالدولار 12 و تقريبا بالريال 50..
مو وجود عندنا بس ممكن تطلبونه من موقع سيفورا أو موقع الماركة نفسها
فيه مضاد للأكسدة و ترطيبه حلووو جدا.. قوامه ع الشفايف ناعم مرة
حبيته و عجبتني علبته البيضاء بصراحة >> سطحية خخ
 
 
 
4- مرطب إي أو إس eos
هو حلو في شكله و ترطيبه و مكوناته طبيعية و فيه مضاد للأكسدة
و سعره حلو 4 دولار يعني تقريبا 20 ريال و تلاقونه عند التاجرات
بس فيه عيب ممكن ما يكون مشكلة لكم بس أنا بدا يضايقني
طعمه حالي و جميل بس أحس صار يجيب لي غثيان
لا تقولون لي لا تخلينه يدخل في فمك..!!! طيب كيف هو ع شفايفي
إلا لابد يجي شي منه في فمي خخ
صرت أستخدمه برا البيت عشان أنشغل عنه و ما أحس بطعمه
إذا تعرفون نكهة منه ما فيها طعم سكر خبروني بليز :"

 
 
5- زبدة التوت الأزرق الجديد من ذا بودي شوب
لو تعرفوني من أيام التصوير الفوتوغرافي >> يا رب أرجع زي زمان :(
صورت هالزبدة حقت الشفايف من 2009..!!! و كانت عاجبتني مرة
 
 
 
و كانت إصدار محدود وقتها و يوم خلصت حزنت عليها بجد :(
و لما نزلت الزبدة الجديدة بالتوت الأزرق و جربتها بغيت أنبهل خخ
نننفففففففسسسسسس الزبدة القديمة بالتمام
و لأنها زبدة يعني الترطيب فيها مضاعف
و في نفس الوقت مو ثقيلة ع الشفايف و ريحتها حلوة
و طعمها حالي بس مو يجيب الغثيان و قوي خخ
بس انتبهوا لنقطة مهمة.. كل المرطبات اللي تكلمت عنها اليوم شفافة
 إلا هذي الزبدة لونها أبيض
يعني ممكن لو تبين تفتحين لون روج معين ممكن تحطينه قبله أو بعده
بس لوحده يعطي شكل مو حلو كأنك حاطة روج أبيض
بالنسبة لي أنا أحطه قبل النوم و ما تفرق معاي لو شفايفي بيضاء خخ
و أقوم الصباح ألاقي شفايفي نااااعمة و رطبة
سعره حدود 25 ريال و الظاهر إنه اصدار محدود
يبي لي أروح أخذ لي وحدة ثانية قبل تخلص
 
 
 
6- مرطب العسل من ذا بودي شوب
جميل جدا و طعمه حالي بس ما يجيب لي غثيان خخ
سعره حدود 25 ريال.. تكلمت عنه هنا
 
 
 
7- فازلين
أنا من سنيييين ما استخدمت فازلين لشفايفي مدري ليش
بس ما قدرت أقاوم ذا العليبة الصغيّرة >> لا من جد من جد سطحية خخ
ترطيب الفازلين قوي مرة و ثقيل أحسه يصلح لليل..
و ميزة الفازلين إنك ممكن تستخدمينه للجسم فـ عصفورين بحجر واحد
الحجم النونو هذا خذيته من أمريكا
بس طبعا باقي الأحجام عندنا هنا و عارفينها أنتم أكيد :)
 
 
بشكل عام كلهم حلوين مرة و أحبهم و أستخدمهم دايم
بس تبوني أرتبهم لكم من الأفضل عندي للأقل أفضلية؟؟!
طيب من عيوني @_@
 
1- كارمكس
2- زبدة التوت الأزرق
3- كودالي
4- بيترس بييز
5- مرطب العسل
6- فازلين
7- إي أو إس
 
الترتيب مو يعني إن رقم 6 و 7 مو حلوين..
بس أحب اللي قبل أكثر
 
و فيه منتج ممتاز لو تذكروني تكلمت عنه زمان
اللي هو إليزابيث آردن أيت أور كريم
بس لأنه خلص خلاص و رميت العلبة قبل أكتب الموضوع هذا 
 فـ ما قدرت أصوره لكم..
لكنه ممتااااز للشفايف بعد و تكلمت عنه زمان هنا
 
 
و سلامتكم.. ()
لا تنسوني من دعاكم و لجدتي الله يرحمها
و لجميع أموات المسلمين
 
PEACE
 
 

Mar 16, 2014

Inglot Lipstick Palette Review

 
السلام عليكم..
 
اليوم راح أشارككم تجربتي مع أرواج إنجلوت
بس قبل ما أبدأ أحب أذكركم بموضوعات سابقة لي عن إنجلوت:
تقرير عن الظلال مع السواتشات هنا
تقرير عن البقمنت الدوو كروم هنا
مشترواتي الأخيرة من إنجلوت هنا
 
 
 
أوكي أدري شكل البالت "مفقع" و حالته حاله هههههه
ما نظفته و لا رتبته لأني كسولة أولا..
و ثانيا أحس شكله في التصوير كذا حلو :$ :$
 
 
طيب.. أنا شريت هالبالت ممكن من 6 سنوات!!
مو متذكرة متى بالضبط بس زماااان مرة..
الحين ما عاد فيه هذا الشكل من البالتات
و لا عاد عندهم في إنجلوت أي شي في شكل دائري
كله صار مربعات و السعر ارتفع شوي
و الأرقام بعضها تغير.. بس الحلو في الموضوع
إن الجودة بطلة ما تغيرت لأني رحت قبل يومين محلهم
و جربت بعض الدرجات ع يدي
 
 
 
بالنسبة للبالت.. عندك خيارات كثيرة في العدد
ممكن بالت تحطين فيها روجين
ممكن بالت بأربع أرواج و ممكن خمس و ممكن عشر..
و الألوان ع كيفك تحطين اللي تبين
عندهم درجات كثيرة في الأرواج حتى الأزرق و الأخضر و الأصفر خخ
 
 
نشوف السواتشات بشكل عام عشان تعرفون قوة الألوان
و إذا أرقام الدرجات نفسها ما غيروها راح أعدل الموضوع و أحطها 
 
 
 
 
طيب نجي للحكي المهم
الأرواج كريمية جدا و ما تنشف الشفايف و تمشي معاك بسرعة
و تركيز اللون عالي فيها و ما رح تحتاجين كثير
و أحب أنبهكم إن الألوان الوسط و الغامقة أفضل في تركيبتها
من الفواتح.. مع إن الفواتح جميلة بس حبيت الدرجات المتوسطة و الغامقة أكثر
لأنها إذا راحت يبقى منها تنت (لون خفيف) ع الشفايف..
 
ثباتها زي ثبات أي روج كريمي .. من 3 إلى 4 ساعات
إذا أكلتي و شربتي كثير ممكن تحتاجين تعيدين عليها
و إذا عندك مشكلة الروج يطلع برا الحدود أنصحك تستخدمين محدد
مع الألوان الفاقعة مثل الأحمر و الفوشي..
 
الأرواج مثل ما قلت قديمة و لازالت في حالة جيدة
و قوامها ممتاز يعني لا تخافين من ناحية تاريخ الصلاحية..
 
الحلو في البالت إن كمية الروج في كل مربع قليلة
يعني يمديك تخلصينها و تجربين ألوان غير و كذا
و نصيحتي لكم اختاروا ألوان مختلفة و مو متقاربة..
مثلا لو يرجع الوقت ممكن الدرجات اللي في النص في بالتي
أكتفي بواحد منهم بس لأنهم متشابهين جدا خخ
و أحط ألوان مختلفة مرة عشان أقدر أدمج و أطلع ألوان أكثر
 
ما عندي فكرة واضحة عن الأسعار حاليا
لأنهم غيروا العلب و كل شي زي ما قلت لكم
بالنسبة لي لقيت إنجلوت في أمريكا رخيييصة مرة..!!!!
هنا أسعارها زينة بس مو نفس الرخص هناك
يعني إذا لكم أحد هناك و لا شي وصووهم هههههههه
 
هنا رابط ممكن يساعدكم في اختياركم لمنتجات إنجلوت
هو من منتدى أجنبي مسوين سواتشات و تقارير لمنتجات الماركة

وش تبون تشوفون المرة الجاية؟
1- مرطبات الشفايف
2- ظلال إليماسكا الكريمية
3- ظلال ديبرا ميلانو
4- سيروم حمض الهيلارونك


و أشوفكم قريب..
دعواتكم ()



PEACE

Mar 10, 2014

The Body Shop Shimmer Cubes Review and Swatches

 
السلام عليكم
 

ياااااه قد إيش أحس بزحمة في حياتي الفترة الأخيرة
و شغل وراء بعض ما يخلص..
و البال فيه مليون شي و شي..!! الله يبارك لي و لكم في الوقت
 
ما تدرون قد إيش التدوين هنا يسعدني و مشاركتكم لحظاتي في الإسنتقرام و تويترو ردودكم الجميلة تدخل البهجة و الأمل ع أيامي.. الله لا يحرمني منكم
و شكرا ع دعمكم لي في كل مكان.. ()
 
اليوم راح أحكي لكم عن تجربتي مع ظلال المكعبات اللماعة
من ذا بودي شوب .. لاحظتوا الترجمة بس خخ
هي اسمها Shimmer Cubes
 
و عندي منها هاللونين :
 
 
ع اليمين الدرجة الجديدة رقم 26 و ع اليسار رقم 06
الحلو في هالمنتج إن كل لون ممكن يطلع لوحده بدون العلبة
و كل لون له علبة و غطاء له لوحده..
 يعني تقدرين تاخذين لون أو لونين معاك بدون البقية
و كمان ممكن تسوين علبة فيها 4 ألوان من كذا علبة
لو عندك أكثر من وحدة..
و كمية اللون كاااابييييرة و بعيد الشر بتموتين و أنت ما خلصتيها خخ
 
 
 
بالنسبة للدرجة الطبيعية رقم 06 شريتها من سنة تقريبا
لأنها هي من أفضل المكياج مبيعا في ذا بودي شوب
شوفوا الريفيوهات في موقعهم الأمريكي هنا
أما الدرجة الجديدة الوردية  26 فهي من مجموعة الربيع اللي توها نازلة  
 
نشوف السواتشات و نكمل حكي؟
 
 
أول شي الظلال جدا ناعمة و جميلة
و لما جربتها بكذا طريقة حبيتها بالأصابع أكثر
بالفرش جميلة بس تخلي اللون شفاف و هادي
أما الأصابع تخلي اللون قوي و واضح
 
 
بالنسبة لي حبيت الدرجة 06 أكثر و أستخدمها دايم
و نفسي في الدرجة 23 اللي تدرجات البنفسجي و الفضي
و فيه درجة جديدة رقم 30 شكلها حلوة بس تشبه رقم 06
 
 
 نجي لموضوع الثبات في هذي الظلال و أرجع أقول لكم
إن جفوني دهنية و دايم أستخدم برايمر مع أي ظل في الحياة
عشان يبقى ثابت و ما يخرب و لا يتكتل..
فـ هنا نفس الشي.. حطيت برايمر و حطيت الظل
و قعد معاي تقريبا 5 ألى 6 ساعات
و أتوقع يطول أكثر إذا فوق البرايمر شوي ظل كريمي
و ع فكرة.. ممكن اذا استخدمتوه رطب يكون اللون أقوى..

 
سعر المنتج الواحد ب 100 ريال تقريبا..
و جربوها في المحل و شوفوا بأنفسكم
 
 
دعواتكم لي و لجدتي ربي يشفيها و يطول في عمرها
و يفرحنا برجعتها بالسلامة :"
 
 
PEACE