NY Haul : INGLOT

السلام عليكم..

 

كيف حالكم مع الشتاء و الأجواء الجميلة..؟

 

 

 

قبل ما أبدأ في مشترياتي البسيطة أحب أشكركم ع متابعاتكم..

وصلت بفضل الله ثم تواجدكم لـ 10 آلاف إضافة في الانستقرام!!

شكرا لكل وحدة علقت و أضافتني أو سوت لي لايك و شاركتني تجاربها

ممكن هذا بالنسبة للبعض رقم ماله قيمة

بس بالنسبة لي هذا دليل قوي إني ماشية صح و إني أفدت كثير

و لله الحمد.. استمروا و ادعموني و شجعوني

و الله لا يحرمني منكم :$ :$

 

 

أنا من البنات اللي تعشق إنجلوت و فكرة الفري سستم حقهم

و كتبت عن ظلالهم في هالرابط.. و كتبت عن البقمنت حقهم في هذا الرابط

 

 

 

حاولت إني ما أتهور لما دخلت فرعهم في نيويورك

و كنت كاتبة كل الألوان اللي عندي في الجوال لأن أحيانا

سبحان الله من الحماس و اللخمة ممكن تاخذين لون عندك أصلا

 

 

 كنت حاطة في بالي أشتري ظل نفسي فيه من مجموعة نوبل

Noble Collection  و رقمه 153

لونه جددددا مميز.. توب ع فضي وغريب فيه قليتر صغير برونز

ممز بصراحة و ما عندي مثله

و قد صورته مع المجموعة كاملة بالسواتشات في الاستقرام

 

 

 

اللون الثاني أخذته من مجموعة اسمها Bronze Collection

و رقمه 606.. لونه تقريبا برونز فاتح مايل للبني

حبييييته و الله.. في الصورة كأنه برتقالي بس في الواقع أهدى شوي

 

 

و حبيت أجرب ظلال من مجموعة Rainbow الجديدة اللي بشيمر

و كان نفسي في لون تركواز فاااااتح مرة و لقيت هذا فيه الدرجة اللي أبغاها

و درجتين أغمق حلوات بعد.. جميلين جددددا و الله

رقمه 134R

 

 

 

آخر شي هو الكحل الكريمي الأسود..

سمعت كثيييير عنه و كيف سواده و ثباته

و يسعدني أقول لكم إنه احتل مكان كحل ميبلين في قلبي خخ

أسسسسسود سواد و ثابت.. و مطططفي..

خوفي بس إنه ينشف بسرعة لأني لسا ما جربته و اختبرته كثير

بس إذا نشف عادي بأحط عليه قطرة ديورالاين و يرجع تمام

 

 

 

 

سمعت كثير عن فرق الأسعار هنا و في أمريكا..

و لما كنت في نيويورك قلت أشوف بنفسي

و فعلا!! الظل الواحد تقريبا عندنا تقريبا 40 ريال

و هناك يعادل 23 ريال!!!!

و الظل الثلاثي الواحد عندنا ما أدري بكم بس هناك تقريبا 32 ريال

و الكحل الكريمي سعره تقريبا 50 ريال!!

 

كل مشترواتي اللي فوق كلفتني 35 دولار

يعني 140 تقريبا

 

و بس.. إن شاء الله البوست الجاي بيكون ريفيو عن أرواج :)

 

 

سووا لي فولو ع تويتر @TaRaNeeM
و ع انستقرام @terter_thinks
و شاركوا المدونة مع صحباتكم و أقاربكم و قروباتكم في الواتس

و لا تنسوني و جدتي من دعاكم

 

 

Peace