Nov 22, 2017

iherb Haul مشتريات موقع آي هيرب



السلام عليكم
كيف حالكم؟ و كيف الأجواء الشتوية الحلوة؟

قبل أسبوعين طلبت من آي هيرب طلبية صغيرة و حبيت أشاركها معاكم و حطيت لكم في نهاية الموضوع كود الخصم حقي لو حابين تستخدمونه.. و استخدمت شركة سمسا في الشحن و الحمدلله وصلت الأغراض سليمة في ٨ أيام تقريبا..
 بسم الله نبدأ:
 

دائما أسمع عن فرش إيكو توولز EcoTools إنها ذات جودة و سعرها معتدل.. طلب هذي الفرش أجربها.. الفرشتين على اليمين يجون مع بعض بعلبة وحدة و مكتوب إنها للكونتور و الإضاءة و سعرهم سوا ٣٨ ريال.. السبب اللي حمسني لها إن فرشة الإضاءة عريضة و منفوشة تشبه فرشتي المفضلة من ميك أب فور إيفر.. فرشة الكونتور حلوة و ممكن تستخدم للبلشر كمان.. فرشة البودرة (على اليسار) سعرها ٢٩ ريال و توقعتها كبيرة مرة لكن خاب ظني و طلع حجمها متوسط.. ما جربت الفرش للحين بس مبدئيا من ملمسها و كمية الشعيرات أحس جودتها لا بأس فيها و ممكن استخدمها لكن مب وااااو مرة.. باختصار تستحق التجربة عشان سعرها حلو و الله



أخذت زيتين من ماركة ناو فوودز Now Foods و كلهم بالحجم الكبير الزيت الأول هو Lemongrass سعره ٤٥ ريال و ريحته ليمون قوي مرة و لها كذا استخدام.. أنا أحط منه قطرات في زوايا الغرف عشان النمل يكره ريحته و الاستخدام الثاني بعد تمسيح المطبخ أقطر شوي على الرخامة يعطي المطبخ ريحة انتعاش و نظافة و برضو يبعد الحشرات.. الزيت الثاني هو Citronella و سعره ٤٤ ريال و ريحته قريب من البرتقال و الليمون و استخدم منه قطرات على أطراف مفارش الأسرة  عشان يمنع الناموس و ريحته منعشة كمان.. هم تقريبا نفس الاستخدام و ممكن تستغنين بواحد عن الثاني بس أنا فيني طفاسة و أخذتهم كلهم هههههههه.. في التعليب هذا عيب بسيط.. هو رأس العلبة عادي جدا إذا انفتح و ما فيه قطارة تسهل التوزيع و يمكن لو خلصتهم أجرب ماركة ثانية يكون فيها قطارة.. 

و أخذت بخاخ لليدين من Clean Well بريحة البرتقال و الڤانيليا.. حاليا قاعدة أستخدم منه الريحة الأساسية و حبيتها و قلت أجرب هذي الريحة كمان.. الحلو فيه اقتصادي مرة ما يخلص بسرعة و لأنه بخاخ سهل استخدامه لتعقيم كراسي الأطفال و الألعاب في المطاعم و الأماكن العامة.. سعره ١٢ ريال

جربت عند أختي زمان بودرة تنظيف الأسنان Eco-Dent و حبيتها فـ طلبتها و لأن حجمها صغير فهذا شي ممتاز كمان في نظري و سعرها ٢٧ ريال..

حبوب الكولاجين و فيتامين سي ممتازة مرة و جربتها قبل سنتين و شوي بس تركتها مع الحمل و الولادة و الرضاعة .. عموما مكتوب عليها زينة للشعر و البشرة و الأظافر و العظام و المفاصل.. فيه منها نوع بودرة تذوبينها في عصير أو حليب بس أنا أحب الحبوب لأنها عملية و سريعة.. أكثر شي لاحظته أثناء استخدامي لها زمان هو تحسن بشرتي.. صرت ما أحتاج أحط مكياج كثير معها..الكولاجين مناسب أكثر للبنات فوق ٢٦ أو ٢٧ سنة.. لأن حسب علمي الكولاجين في الأعمار الصغيرة يفرز بشكل ممتاز و ما رح تلاحظين أي فرق إذا استخدمتي الحبوب بعمر صغير.. كاتبين على العلبة و في الموقع المحاذير و طريقة الاستخدام بالتفصيل و سعرها في تاريخ كتابة الموضوع ٦٥ ريال لأن عليها خصم ممتاز..


أخذت كمان ملح الهمالايا الوردي للطبخ لأنه أصح بكثير من الملح العادي و هذا الكيس مطحون ناعم و فيه تقريبا نص كيلو ب٢٣ ريال.. 



و أخيرا هذا البار من Cliff Bar بزبدة الفول السوداني المجروش لذييييييذ مررررة و يشبع و فيه منه نكهات واجد بس اللي جربتها و حبيتها للآن هي هذي النكهة و نكهة براوني الشوكلاتة و نكهة الشوكلاتة البيضاء.. لقيت الحبة الواحدة في الدانوب هنا بـ ١٦ ريال!!! و هذا الكرتون فيه ١٢ حبة سعره في تاريخ كتابة الموضوع ٧٢ ريال يعني أوفر بكثير.. 


و بس يا جماعة.. أتمنى فادكم الموضوع و لقيتوا فيه أشياء جديدة.. و بالنسبة لكود الخصم حقي هو: HEG2557 لو حابين تخصمون على مشترياتكم.. و شاركوني مفضلاتكم في التعليقات عشان أجرب اللي يناسبني منها المرات الجاية بإذن الله..


لا تنسوني من دعاكم و لأمي بالشفاء العاجل

PEACE



Nov 1, 2017

Collective Haul (Beauty & skincare)


السلام عليكم و رحمة الله

كيف حالكم جميعا؟ كنت مخططة أصور لكم موضوع يوم من حياتي بالتفصيل زي ما طلبتوا في سناب لكن ظروفي تكركبت كثير الفترة الماضية بس الحمدلله على كل حال و راح أصوره لكم قريب بإذن الله.. أما اليوم حابة أوريكم منتجات اشتريتها خلال الشهرين اللي فاتوا.. و راح أبدأ بالمكياج هالمرة لأنه قليل (على غير العادة خخ) و بعدين العناية بالبشرة و الشعر

لما راحت صديقتي بيان لكندا في أغسطس و حضرت الأيماتس كنت موصيتها في بعض الأشياء و الله يسعدها جابتهم لي.. أول شي هو بالت فليكسي إيكو صديق البيئة من إنجلوت.. للأمانة الشديدة أنا ما أحتاجه أبدا بس عجبني مرة لما شفته بالنت و قلت بأشتريه أحط فيه ظلالي المفضلة من بالتات إنجلوت الثانية أو يمكن يوسوس لي الشيطان و أشتري بلشرات و أخليه بالت بلشرات؟ مدري و الله بس مبسوطة إنه عندي..

 الشي الثاني هو بيقمنت من ميك أب فور إيفر رقم ١٩ حبييييته مرة و حسيته مميز.. عاد نزلوا قريب ألوان زيادة من البقمنت لكن لسا ما شفتهم بتركيز و لا مخمخت عليهم.. هذا أعجبني لونه زي الحبر و ناصع.. فيه شيمر خفيف حلو و قررت آخذه من الأيماتس لأنه أرخص بكثيير من المحلات العادية 

و آخر شي من الأيماتس هو البيوتي بليندر.. عندهم عرض هناك كيس فيه ٦ حبات بـ ٦٠ أو ٧٠ دولار تقريبا و الوحدة في سيفورا سعرها ٢٠ دولار!! اشترت بيان هالعرض و تقاسمته معي و مع مجموعة من معارفها.. لو حابين معلومات عن الأيماتس ممكن ترجعون لموضوعاتي الثلاث المفصلة عنه في نيويورك : ١ - ٢ - ٣ .. 
و الشيء اللي كثير اندهشوا لما قلت إني ما عمري اشتريته هو بودرة لورا مارسييه الشفافة.. و بصراحة ما كنت بأشتريها لين جربتها عند بيان و أعجبتني مرة.. ملاحظين تأثير بيان السلبي على فلوسي هههههههه؟

 و آخر شي كونتور رمادي من سيفورا اسم الدرجة ترانكويل و له قصة طريفة.. زمان أول ما بديت اهتمامي بالتجميل كانت شانيل منزلة بودرة كونتور إصدار خاص لونها رمادي و إنها تحاكي لون الظل الطبيعي في البشرة بس وقتها كنت ماني متمرسة مرة و ما بغيت أدفع فلوس فيها و أبتلش إذا ما عرفت لها.. هنا رابط لموضوع كامل عنها من النت عنها للي حابين يشوفونها..و قبل سنة شفت بودوة سيفورا هذي في موقعهم الأمريكي.. جاني فضول أجربها و طلبتها علطول على بيت أختي هناك و لما وصلت لها دقت علي تهاوش تقول "سلامات!! هذا ظل مو كونتور ترى برجعه للمحل.." كنت أقول لها خليه أبيه و ترد "لا يعني لا ..هذا بيرجع اليوم و استخدمي من ظلالك الرمادية بداله!!" المهم قلت يمكن هذي إشارة ربانية و أمري لله ههههههه.. و مرت سنة و نزل عليها خصم في سيفورا الأمريكي و صارت نص السعر يعني ٧ دولار أو ٨ و طلبتها على بيت أختي مرة ثانية ههههههه.. اتصلت تضحك تقول "كمان!!! بكيفك أجل" و الحمدلله يا بنات إني تجاهلتها و طلبتها أقين لأنها مع الدمج تجنن مررررة و تبان فعلا زي الظل الطبيعي للبشرة.. 


نروح للعناية؟
كان فيه عروض من ذا بودي شوب اشتري ٢ و الثالث مجانا فأخذت مجموعة أشياء 


أول شي خذته هو قناع الشعر الجديد بالموز و مرة متحمسة له لأني أحب بلسم الموز من عندهم و دايم أشتريه بين فترة و الثانية و أكيد هذا بيكون زيه بس مفعول أقوى و ترطيب مركز لشعري المصبوغ التالف المسكين خخ.. و مع منتجات الشعر الجديدة لقيت مقشر لفروة الراس بالشاهي الأخضر و قلت أجربه بعد.. سعر الواحد منهم بـ ٦٠ ريال تقريبا



و من ذا بودي شوب بعد أخذت منتج من مجموعة فيتامين إي يسمونه (إيسنس) و هو مشابه للتونرات المرطبة اللي تباع في شرق آسيا و متشوقة أستخدمه خصوصا إن تجربتي مع التونرات الآسيوية زمان كانت ناجحة جدا.. ما افتكر سعره بالضبط بس كان حدود ٧٠ ريال.. 

و أخذت كمان من ذا بودي شوب مقشر مجموعة قطرات الشباب.. عاد أنا أعششششق السيروم حق قطرات الشباب و خلصت منه علب كثيرة و لما نزل هالمقشر علطول حطيته في بالي و برضو يشبه مقشر ياباني مشهور اسمه كيور و بإذن الله أجربه و أقول لكم.. سعره ٩٩ ريال

من موقع أيهيرب أخذت مزيل رائحة العرق المفضل عندي و هذي يمكن ٣ أو ٤ علبة آخذها و مكوناته بسيطة مرة و علبته سهلة بالإستخدام مرررة.. يجي منه رول و كمان حجر لكن البخاخ بالنسبة لي أنظف و أسهل.. دايم أجرب النوع الأحمر و هو أصلا بدون ريحة و هذا الأزرق مكتوب عليه بدون ريحة كمان فمدري وش الفرق فعلا لكن كلهم ممتازين..

صديقتي كانت طالبة أشياء من موقع أسوس و لقيت عندهم التونر المشهور هذا من بيكسي و طلبته معها.. فيه آراء متضاربة عنه في النت و حبيت أجرب بنفسي..

كريم كيو في العملاق!!! يجي منه مقاس صغير و وسط و هذا الكبير.. سعره في النهدي ١٦٠ ريال بس أخذته في عرض أشتر واحد و الثاني مجانا.. اللي أحبه فيه ترطيبه العميييق و إنه مناسب للوجه و الجسم و الكبار و الصغار و ما فيه عطور و لا مواد ضارة.. جبته بأخليه في بيت أهلي أو للسفر عشان ما أشيل معي كريمات واجد كل ما رحت..

من موقع سيفورا الأمريكي أخذت موية المسيلار بالفحم.. لونها أسود رهيييب و مكتوب ينقي البشرة و ينظفها.. في الخصم خذته بـ٣ دولار مدري ٤.. لما قريت التقارير عنه في النت بعضهم يمدحه و بعضهم يقول معطر مرة.. عموما أنا ما رح استخدمه لعيوني و بخليه بس لمكياج الوجه و بأشوف كيف انطباعي عنه..

و اشتريت من ذا بودي شوب فرشة الجسم على مدح صديقتي.. هي شوي خشنة و ممكن تستخدم للتقشير الجاف أو مع سائل الاستحمام أو الصابون أثناء الاستحمام..



بعد ما صورت الموضوع و خلصت تعديل الصور جابت لي أختي هالكريم هدية من كيلز و طبعا مستحيل أعيد التصوير بعد ما خلصت و رتبت فقلت يالله ما عليه يستاهل صورة لوحده هههههه.. كنت جربت عينة منه زمان و أعجبني مرة.. ترطيب ثقيييل ثقيييييييييل ينفع للبشرات الجافة و العادية و لأيام الشتاء..  و على قولة أختي تحطه بالليل و ما تحتاج تحط كريم بالنهار من قوته خخ.. ما رح أفتحه الحين لين أخلص كريم الليل اللي استخدمه حاليا.. 




و آخر شيء في هالموضوع هو العينات و النقاط اللي بدلتها في سيفورا الأمريكي.. اخترت عينة من عطور ماركة ريبلكا اللي بدت تنشتر موخرا و اخترت عينة عطر إليزابيث آند جيمس الجديد و يبدو إنه أعجبني و شكلي و الله أعلم بأشتريه إذا خلصت شوي من عطوري هههههه.. و طلبت عينة من أساس فنتي ودي أجربه و أشوف يستاهل هالضجة و لا لا.. و بالنقاط اللي عندي طلبت آيلاينر كات فون دي حجم صغير و طلبت محدد من بايت حجم ميني لأنه من زمان نفسي أجرب أي منتج من هالماركة.. و بالنقاط كمان خذت علبة صغيرة زيت للشعر أبيها في الشنطة لما أروح مكان و أحتاج زيادة لمعة و ترطيب لشعري.. 
و حطوا عينات ورقية لمجموعة عطور جديدة بأسولف لكم عنها في سناب الأيام الجاية إن شاء الله..

يا رب يكون عجبكم الموضوع و قولوا لي في التعليقات وش أكثر منتج متحمسين له و تبوني أتكلم عنه بالتفصيل أكثر؟

و لا تنسوني من دعاكم
PEACE

Sep 28, 2017

New Products\First Impressions (2)





السلام عليكم و رحمة الله
كيف حالكم؟ 

وصلتني في الفترة الأخيرة منتجات من ماركات مختلفة للتجربة.. بعضها جديد بالسوق و بعضها جديد علي شخصيا.. و جربتها مدة كافية و كونت عنها انطباع و رأي و راح أشارككم إياه اليوم و يا رب يعجبكم الموضوع و يفيدكم.. الموضوع مفصل تفصييييل ممل.. فلو ما عندكم وقت تقرونه كله الحين ممكن تشوفون المنتج اللي تبونه بس و تكملون قراءة الباقي بعدين :$ و ترى حطيت لكم تقييمي الشخصي من ٥ تحت كل منتج.. لو حابين تشوفون إنطباعي عن منتجات سابقة اضغطوا هنا.. و الحين يالله نبدأ بسم الله



 Lancôme Teint Idole Ultra Wear
✭✭✭✭
هذا الأساس انتشر كثير في النت و نازل بـ٤٠ درجة و بـ تونات مختلفة : دافية و باردة و محايدة.. مكتوب إنه مطفي و خالي من الزيوت و تغطيته متوسطة لكاملة و بحماية من الشمس بنسبة ١٥ و ثبات يدوم ٢٤ ساعة.. المشكلة في هذا الأساس عندنا بالسعودية هو قلة الدرجات.. لما رحت السوق انصدمت إنهم جايبين عندنا ٧ درجات بس!! و كلها فاتحة و التون في معظمها بارد (يعني يميل للوردي) و هذا ما يناسب بشراتنا الخليجية.. مدري متى بعض الماركات تهتم فينا و تنزل كل الألوان أو على الأقل تحط بعض الدرجات الوسط و الغامقة.. بالنسبة لي أنا وصلتني درجتين من موقع أوكتلي الأمريكي و أنا اللي اخترتهم و هم ٢٧٠ و ٢٨٠ و التون فيهم دافي (يعني مايل للأصفر) الدرجة الممتازة لي هي رقم ٢٧٠ أما ٢٨٠ كانت غامقة و صفراء مرة تميل للبرتقالي حتى لكن باحتفظ فيها لأنها ممتازة للخلط مع الأساسات الفاتحة أو اللي أبيها تكون مصوفرة أكثر.. هنا سواتشات للدرجتين:


بعد التجربة أنا حبيته كثير.. صحيح ما اختبرته لـ٢٤ ساعة لكن اللي لاحظته إنه كان مقاوم للماء نوعا ما.. يخف شوي بعد ٦ ساعات بس ما يكتل و لا يصير شكله بشع.. تغطيته متوسطة و ماهو مطفي مرة.. يعني كأنه بشرتك نفسها ماهي لمّاعة و لا مطفية.. 

▼▲▼▲▼▲▼▲▼▲▼▲▼



Kevyn Aucoin Ibza The Neo Limelight
✭✭
كان نفسي أجرب أي شي من ماركة كيڤن أكوان و لما شفت هذا البالت نازل على موقع أوكتلي علطول طلبته لأني حابة أشوف كيف الإضاءات البنفسجية بتكون على البشرة.. أول شيء لاحظته لما وصلني إنه كبير الحجم!! واضح لكم في الصورة الأولى حجمه مقارنة ببالت إربن ديكاي.. و إذا عندكم بالتات ظلال سليك فهو تقريبا نفس المقاس.. بالنسبة للتركيبة فهي ناعمة مرررة و ما فيها أي قليتر و لما تنحط ع البشرة تكون هادية مرة.. ممكن تكون قوية لو انحطت فوق الأساس علطول و هو لسا رطب أو فوق إضاءة كريمية.. هذا البالت فيه ٣ ألوان: بنفسجي فاتح - وردي - ذهبي.. ممكن تستخدمون كل لون لحاله أو تدمجونه كله مع بعض.. أكثر درجة حبيتها فيه الذهبية طبعا لكن جربت البنفسجية و طلعت مايلة للفضي على الوجه و حليوة لكن ما رح تكون خياري الأول.. 


Kevyn Aucoin Sahara The Neo Highlighter
✭✭✭
هذي البالت للإضاءات كمان من كيڤن أكوان و بثلاث ألوان طبيعية  زي ما تشوفون : برونز و ذهبي و بيج و بنفس قوام البالت اللي قبل بالتمام بس هذا أتوقع راح استخدمه أكثر و خصوصا للدوام.. عموما كل البالتين ما  راح أستخدمهم في السهرات و المناسبات الكبيرة لأني أبي شي يبرق و يرعد أكثر خخ 

▼▲▼▲▼▲▼▲▼▲▼▲▼

Hourglass Ambient Lighting Blush in Mood Exposure

✭✭✭
اللي متابعيني من زمان يعرفون قد إيش كنت أبي هذا البلشر بس مدري ليه تأخرت سنين لين اشتريته خخ.. هو من ماركة أور قلاس و اللون اللي حبيته هو هذا اسمه مود اكسبوجر.. في العلبة لونه غريب شوي مايل للموڤ لكن ع الخدود يصير طبيعي مرررة و دافي و يعطي نضارة و لمعة حلوة لأن فيه إضاءة مخلوطة معاه زي ما تشوفون.. حجمه بالطبيعة توقعته يكون أكبر شوي لكن هالشي مو مشكلة بالعكس صغر حجمه يخليه حلو للتنقل.. المشكلة الحقيقية إني أدمنت و شكلي بأطلب البرونزر حقهم هههههه.. 

▼▲▼▲▼▲▼▲▼▲▼▲▼


Urban Decay Heat Lipstick
✭✭✭
شهادتي مجروحة في أرواج إربن ديكاي ههههههه.. مدري ليه يضحكني هالتعبير بس حقيقي كثييير أحبها و خصوصا الكمفرت مات و الكريمية.. هذا الروج نوعه ميتلايزد يعني فيه قليتر و لمعة و نزل إصدار محدود ضمن مجموعة هيت اللي كسرت الدنيا الفترة الماضية.. لونه أحمر دااافي و القليتر نحاسي مع ذهبي و ثباته كويس و الله يعني تقريبا ٤-٦ ساعات بدون أكل.. استخدمته آخر مرة مع مكياج هادي و أعجبتني النتيجة مررررة.. 

 YSL Rouge Volupté Shine Oil-in-Stick in 61. Nu Impulsif
✭✭✭
كثير منكم يعرف أرواج إيڤ سان لوران الكريمية و هذا النوع نفس التعليب لكن قوامه زيتي خفيف و فيه منه ألوان كثيرة لكن لأنها شبه شفافة ما أحس يفرق اللون معاي.. لما قريت مكوناته بالنت لقيت فيه سيليكون بأنواع كثيرة و هالشي يعتبر مكياج مو عناية و لازم ينمسح بمزيل مكياج.. يعني أنا استخدمه مثل القلوس مع المحددات لكن ما أحطه كمرطب بالليل قبل النوم!! السيليكون ما يخوف و موجود في المكياج غالبا عشان يعطيه إنسابية و سهولة في الدمج و التوزيع.. اللي يخوف هو تجاهل تنظيف المكياج لأنه ممكن يتجمع في المسامات و يؤثر على صحة البشرة

 ColourPop Ultra Satin Liquid Lipstick in Frick n' Frank
أنا مو كثير أستخدم أرواج سائلة مطفية لأني أحسها تنشف شفايفي شوي و يمكن أحسن تركيبة عجبتني هي تركيبة كات فون دي.. عندي أرواج سيفورا المطفية بس لسا ما استخدمتهم.. المهم لما كنت بأطلب من موقع كلر بوب قبل كم شهر جتني كثير نصائح أجرب أرواجهم السائلة المطفية اللي اسمها ساتن و إنها ما تنشف الشفايف مرة و لما دخلت الموقع احترت ههههههه كلر بوب دايم دااااايم ينزلون ألوان جديدة ما يمدي الواحد يلحق.. دخلت صفحة الأكثر مبيعا و لقيت هاللون اسمه فريك أن فرانك و بعد بحث سريع عن سواتشات في قوقل طلبته و توكلت على الله.. و لما وصلني حبيييت اللون و التركيبة ممتازة مرررة لكن المشكلة في نفس الفرشة حقته.. مدري كيف أشرح لكم بس صورتها لكم جنب فرشة روج لوليتا من كات ڤون دي عشان أوضح لكم الفرق:

زي ما تلاحظون فرشة كلر بوب شكلها غريب.. عشوائية و مو مرتبة و يصير صعب علي أحط الروج بدقة على حدود شفايفي و أضطر أستخدم محدد و أنا ما أحب المحددات مع الأرواج المطفية.. يعني مدري هل الروج اللي وصلني خربان أو فيه خلل في تصنيع الفرشة؟ و لا كلر بوب كل أرواجهم السائلة المطفية بهالشكل؟ عموما حطيت لكم سواتش له و لمنتجات الشفايف اللي قبل عشان تاخذون فكرة عن الألوان بدقة :


▼▲▼▲▼▲▼▲▼▲▼▲▼

أحس الموضوع صار طويل مررررة لكن معليش باقي ٤ أشياء و أخلص :$


Kat Von D Ink Liner in Trooper
✭✭✭✭
من المنتجات المشهورة في كات فون دي هو التاتو لاينر و أنا من الناس اللي تحبه و أستخدمه من سنين.. لكن دفعني الفضول أجرب هذا النوع اسمه إينك لاينر برضو من كات فون دي عشان أشوف الفرق.. و طلع الفرق الوحيد بينهم بالنسبة لي هو طرف الآيلاينر.. التاتو لاينر عبارة عن فرشة لها شعيرات أما الإينك لاينر راسه قطعة وحدة زي معظم الآيلاينرات بالسوق.. في نظري هذا أسهل بالرسم بالذات للمبتدئات لأنه الرأس صلب و ثابت ما يتحرك زي الفرشة الشعر العادية.. 

▼▲▼▲▼▲▼▲▼▲▼▲▼


Essence Volume Stylist Mascara
✭✭✭✭
هذي الماسكارا انتشرت بكثرة الفترة الأخيرة و ما كنت متحمسة لها بصراحة لأن تجاربي مع ماسكارات هذي الماركة كلها سيئة.. كنت ناوية أشوف أي أحد ياخذها مني يستخدمها عشان ما تروح خسارة لكن قلت برضو أعطيها فرصة يمكن تكون غير و فعلا أذهلتني و الله.. إذا أنت من البنات اللي تحط طبقة وحدة ماسكارا و خلاص فـ ما رح تعجبك لأنك لازم تحطين كذا طبقة منها.. أنا عموما أحب آخذ وقتي و أحط أكثر من طبقة من أي ماسكارا و أبني الكثافة في رموشي لين أوصل للنتيجة اللي تعجبني و استخدمت نفس الطريقة مع هذي الماسكارا.. النتيجة عطتني تكثيف ممتاز و تفريق و تقويس للرموش و ثابتة ما تتفتت تحت العين أو تبقع أو تسيح.. بس عيبها شوي صعبة في الإزالة.. ما أعرف سعرها بالضبط بس الماركة ككل أسعارها مناسبة للجميع

▼▲▼▲▼▲▼▲▼▲▼▲▼



YSL Couture Hologram Powder
✭✭✭✭ 
هذا المنتج نازل إصدار محدود لمجموعة الخريف و لفترة محدودة.. في البداية توقعت يكون زي البقمنت المضغوط آيز تو كيل من جورجيو أرماني أو إنفاليبلز من لوريال (أحببببهم مرررة) لكن طلع مختلف تماما.. هو عبارة عن قليتر هولوقرافي وردي على فضي شبه شفاف و يعكس أكثر من لون.. ينحط على الجفن علطول بالطبطبة أو فوق الظلال عشان يعطيها لمعة و بريق.. في الموقع مكتوب إنه ممكن ينحط فوق الأرواج كمان و شكلي بأجرب هالطريقة قريب.. بلا مبالغة كل مرة أحطه تجيني أسئلة عنه و لو لسا متوفر في محل قريب منك جربيه و شوفي النتيجة!! 

▼▲▼▲▼▲▼▲▼▲▼▲▼


Urban Decay Naked Heat Palette
✭✭✭✭
أخيرا و ليس آخرا.. البالت اللي سوا ضجة و شعلل الدنيا شعللة خخ.. هو إصدار خامس لسلسلة بالتات نيكد و فيه ألوان دافية تميل للأحمر و البرتقالي.. هو مناسب للبنات اللي يحبون هذي الدرجات و يستخدمونها بكثرة.. و لو عندك بالتات فيها درجات أساسية زي البيج و الأسود و البني و الذهبي ممكن تستخدمينهم إضافة لهذا البالت.. بس لو كنتي مبتدئة ما رح يناسبك كثير لأنه ما يشمل ألوان أساسية و أنصحك بنيكد ١ في هالحالة و تكلمت عنه بالتفصيل في هالرابط..
 بالنسبة لي حبيييييت نيكد هييت مرررررررة مرررررررة!! كل ألوانه غنية و قووووية و زي الزبدة بس أول لون (البيج) على اليسار لونه خفيف مو واضح مرة لكن ما عاد يفرق معاي لأن البقية رووووعة .. هذا غير التعليب المميز و الفرشة اللي معاه بطرفين و كويسة و أستخدمها عادي


▼▲▼▲▼▲▼▲▼▲▼▲▼


و بس يا جماعة.. أعتذر عن الإطالة.. و لو أعجبك الموضوع شاركيه أهلك و صديقاتك.. 

لا تنسوني من دعاكم

PEACE



Sep 16, 2017

New Products for A Better Start!

السلام عليكم جميعا..

كل عام و أنتم بخير و سنة دراسية سعيدة على الجميع.. الله يوفقكم و ييسر أموركم و يفتح عليكم و يبارك في أوقاتكم

في بداية كل سنة جديدة أحب أفتح منتجات جديدة سواء شريتها أو وصلتني من الشركات عشان تنفتح نفسي للشغل.. طبعا غير أشياء القرطاسية و الملابس أكيد.. و اليوم فكرت أكتب لكم موضوع سريع و خفيف عن هالمنتجات



ببدأ بالبراية اللي جابت بعضكم لهالموضوع خخ.. عندي براية في البيت و دايم أنسى آخذ وحدة للدوام معاي و بالتالي أستخدم براية زميلاتي في المدرسة من كم سنة هههههه.. و في رمضان فتحت تقويم ذا بودي شوب و طلعت لي هالبراية الصغيرة و جاني شعور إنها دعوة صادقة من وحدة منهم في نهار رمضان و استجابها ربي عشان ترتاح مني ههههههه

بعدها مسكرة الحواجب Gimme Brow من بينفت و هذي مو أول مرة أستخدمها و أحبها كثير لأنها تكثف الحاجب و تثبته بس ما يصير قاسي و مزعج.. هذا التعليب القديم و الحين تغير و صار أجمل.. بس هم أرسلوا لي هذي و من زمان شايلتها و توي فتحتها هاليومين.. ملاحظة: المنتجات اللي ما عليها تاريخ إنتهاء و جديدة تقعد بحالة ممتازة في الغالب و ما تبدأ صلاحيتها إلا بعد الفتح

آيلاينر Ink Liner من كات فون دي اللون الأسود و اسم الدرجة Trooper.. أنا جربت الـ Tattoo Liner المشهور من نفس الماركة و أحبه كثير بس هذا النوع جديد علي.. ما رح أعطي تفاصيل واجد لأني بأكتب عنه ريفيو الأيام الجاية

اللي بعدهم هو Future Solution LX' Universal Defense SPF 50 من شيسيدو.. واقي للوجه و الرقبة و الجسم و مكتوب إنه مقاوم للماء و يرطب و يخفف التصبغات.. ما أقدر أعطي رأيي بشكل واضح بس مبدئيا قوامه ثقيل شوي و أخلطه مع كريمي المرطب بس الحلو إنه ما يدهن بالبشرة

سيروم Restore & Renew من NO.7 للوجه و الرقبة و يباع في صيدلية بوتس.. للأمانة كل اللي جربته من كريمات هالماركة ما أعجبني لأني أحس المنتج يبقى على سطح البشرة و ما تمتصه زين.. لكن هذا إلى الآن ما سوى لي هالشي الحمدلله و باستمر عليه و قبل المرطب اليومي و أشوف.. مكتوب عليه يشد و يخفف التجاعيد

و من كيلز أخذت منتج مشهور عندهم و هو مزيل رائحة العرق.. بصراحة تحمست له من البلوقر الإماراتية فاطمة skinoverdose و خصوصا بعد ما شفتها منزلة هذي الصورة قبل سنة تقريبا في إنستقرامها.. للحين ما كونت انطباع عنه بس ثقتي قوية في فاطمة و اختياراتها في العناية

و أخيرا معقم اليدين من مجموعة Energy المنعشة.. المحل هذا مستحيل أشتري منه في الأيام العادية لأنه في فترة الخصومات و العروض معظم الأشياء ينزل سعرها بشكل رهيييب!!! هذا المعقم خذته في الخصم بـ٤ ريال و قبل كان سعره ١٥


و بس يا جماعة
أتمنى أعجبكم الموضوع و شاركوني منتجاتكم اللي فتحتوها هالفترة في التعليقات
و لا تنسوني من دعاكم

PEACE

Sep 8, 2017

My Perfume Collection (Part 1)


السلام عليكم 
كيف حالكم؟ إن شاء الله كل أموركم تمام ()

اليوم بشارككم مجموعة عطوري و أتوقع كثيييير ناس مهتمين بالعطور زيي..

بس قبل ما أبتدي أحب أقول كم نقطة مهمة جدا:
١- لأني مُدوِنة و أحب أشارك تجاربي في هالمجال فـ ما شاء الله تجيني عطور كثيرة للتجربة فـ مو كل اللي تشوفونه اشتريته بنفسي
٢- كل العطور اللي في موضوعي لازم تشمينها بنفسك في السوق قبل تشترينها.. لأن الأذواق في العطور بالذات مرة تختلف من شخص للثاني
٣- في هالموضوع راح أشرح العطور بشكل بسيط و إذا أعجبكم عطر معين ممكن تبحثون عنه أكثر في موقع www.fragrantica.com
٤- العطور تختلف أسعارها من دولة لدولة و بعد المحلات و المواقع كل واحد لها سعر مختلف أحيانا و مرات فيه كوبونات و خصومات.. فالسعر اللي بأحطه تقريبي و كل وحدة تشوف المكان اللي يقدم لها السعر الأفضل..



بسم الله نبدأ 
العطور اللي أحبها بالعادة تكون دافية و غالبا يكون فيها شي من هالمكونات:
المسك و العنبر و الزعفران و العود.. بس العود يكون خفيف مو قوي مرة.. أحب المكونات الحالية زي الكرامل و الفانيليا و الشوكلاتة و بذور التونكا و القهوة.. و بعد أحب من الفواكة رائحة البرتقال و اليوسفي و البرغموت و الباشن فروت و التوت و الشمام و التين و الكشمش الأسود.. من التوابل أحب الهيل و الفلفل الأسود و القرفة و تعجبني الروائح اللي تميل للبودرة و النظافة و كمان أحب الأخشاب زي الصندل و أعشق ريحة العشب و الخضرة.. الورود هي اللي عندي مشكلة منها.. أحبها على الناس لكن إذا استخدمتها علي تجيب لي شوي صداع ما عدا الفل و الياسمين لكن عموما تناسبني العطور لو كانت الورود فيها بنسبة خفيفة أو معقولة مو طاغية.. و أخيرا أميل للعطور القديمة أكثر من الجديدة و أحب الإصدارات الأولى من أي عطر أكثر من الإصدارات الجديدة.. و فيه عندي عطورات أستخدمها للخلط أكثر من استخدامي لها لوحدها.. صورت لكم العطور على مجموعات و تحت كل مجموعة بأتكلم عنها من اليمين لليسار و من فوق لتحت.. و بأقيم الثبات من وجهة نظري من ١ لـ ١٠:



Flower by Kenzo L`Elixir
هذا العطر من مجموعة فلاور من كينزو ريحته حالية "سوييييت" .. جربت منه عينة قبل سنتين أول ما نزل (سنة ٢٠١٥) و أعجبني مرة و أحب أستخدمه لبناتي كمان.. من مكوناته الأساسية الفانيليا و التوفي و التوت و اليوسفي و الورد البلغاري و الفل و فيه ريحة بودرة ناعمة.. ثباته ٧ من ١٠ و شكل العلبة أنيق مرة

Flower by Kenzo

عطر فلاور قديم شوي و هو أول عطر في مجموعة فلاور و نزل سنة ٢٠٠٠ و ريحته بودرة و ورد و حلى.. من مكوناته الأساسية المسك و الفانيليا و الورد بلغاري و الياسمين و البنفسج و الكشمش الأسود و اليوسفي.. أول ما ينحط يكون قوي بس إذا برد شوي يصير يهبل و أحبه لبناتي كمان.. ثباته ٨ من ١٠

Bowhanti by The Body Shop

هذا العطر اسمه بوهانتي و هو ضمن مجموعة ذا بودي شوب الجديدة نزل سنة ٢٠١٦ و ريحته خشبية و شرقي نوعا ما و مناسب للرجال و النساء.. بصراحة ما أعرف كيف أوصفه لكم بدقة لأن معظم مكوناته غريبة و جديدة علي لكن موجود فيه باتشولي و عود و قرفة.. الشي اللي بتلاحظونه لو شميتوه بالمحل هو ريحة احتراق العود أو البخور و هذي الريحة مميزة مررررة ما قد شميتها في أي عطر ثاني للأمانة و هذا اللي محببني فيه.. حلو يخلط مع عطور ثانية لكن أنا غالبا استخدمه لوحده.. ثباته ٦ من ١٠ و سعره ٢٠٠ ريال


Swietenia by The Body Shop

سويتينيا برضو من العطور الجديدة في ذا بودي شوب سنة ٢٠١٦ و ريحته أنثوية مرررة و منعشة لأن فيه ياسمين و فانيلا و برتقال و يوسفي و شمع النحل و خشب الماهوقني.. فوّاح و ثباته ٧ من ١٠ و سعره ٢٠٠ ريال.. المجموعة الجديدة أشوفها مميزة و كلها حلوة لكن بالنسبة لي هالإثنين أفضلهم..

McQueen Eau de Parfum by Alexander McQueen

عطر ماكوين نزل سنة ٢٠١٦ و ريحته ورد و حالية.. أنثوي بحت و فوااح جدا.. الريحة الغالبة عليه هي ريحة وردة مسك الروم أو زي ما نسميها بالعامي نجمة الليل.. لأن هذي الوردة تتفتح و تنتشر ريحتها بالليل.. ريحتها تشبه الفل تقريبا بس أقوى بكثير و سوييت نوعا ما.. هذا العطر رجعني لطفولتي لما كنا زارعين هالوردة في الحوش و ريحتها بالليل تملأ المكان!! من مكوناته كمان الياسمين و اليلانق يلانق و الفلفل الأسود و الأحمر.. ثباته ٩ من ١٠ و هذي النسخة سعرها تقريبا ٦٠٠ ريال و فيه منه نسخة مركزة أكثثثر و لون علبتها أسود بحدود الألف و شوي..

Oud Ispahan by Christian Dior

عود أصفهان من ديور نزل في ٢٠١٢ و اشتهر كثييير في السنتين الماضية و بصراحة يستاهل الشهرة حقيقي.. له مكانة بخاطري لأني استخدمته في عيد الفطر قبل سنتين و كان هذا العيد أحلى عيد بحياتي و ارتبطت ريحته بالسعادة.. من اسمه أقوى مكون فيه هو العود لكن فيه مكونات ثانية بس مو واضحة كثير زي العود مثل الباتشولي و خشب الصندل و ورد الجوري.. حلو لوحده و حلو يخلط مع عطور ثانية.. ثباته ممتاز مرررة أعطيه ٩ من ١٠

Baby Doll by Yves Saint Laurent

 هذا العطر قديم مرررة ما أعرف نزل سنة كم بالضبط بس له ذكريات عندي..  أبوي أخذني أنا و أخواني نشتري عطورنا الخاصة كنت وقتها توي بسادس أو خامس ابتدائي و توي بادية أتعلم إنجليزي و شميت عطور كثيرة بس اخترت هذا عشاني عرفت أقرأ اسمه وقتها و فهمت معناه هههههههه.. له إصدارات كثيرة لكن هذا أولهم و المقرب لي لأنه يذكرني بطفولتي و أول عطر خاص على ذوقي.. مكوناته الأساسية هي ورد الجوري و خشب الصندل و الكشمش الأسود و البرتقال و الأناناس و التفاح و بذور التونكا.. بالنسبة لي عطر كثير منعش و ثباته ٦ من ١٠ و ما أفتكر سعره بالضبط

Shalimar by Guerlain

عطر شاليمار من قيرلان هو عطر أختي المفضل من سنيييين و مهما تروح و تجرب دائما ترجع له.. هو أقدم عطور سلسلة شاليمار و أتوقع من العشرينات أو الثلاثينات و ريحته داافية و بودرة و مسك!! الحين فيه منه إصدارات كثيرة و مختلفة و تشبه هذا نوعا ما.. مكوناته الأساسية الفانيليا و الجلد و المسك و بذور التونكا و ورد الجوري و الياسمين و الباتشولي و فيه شوي برتقال و يوسفي.. أول ما ينحط يكون قوي مرة بعدين يخف و يصير ناعم و مميز و فوّاح و أحبه لبناتي بعد.. مشكلته إن هذا الإصدار قديم و نادر جدددا و شبه مستحيل و صرت أستخدمه بحكمة لا يخلص ههههههه.. ثباته ٩ من ١٠

  Pure Honey by Kim Kardashian

ما أحب أشتري العطور اللي يسوونها الفنانات و خصوصا الكرداشيانز هههههههههه.. هذا عطر مسويته كيم نهاية سنة ٢٠١٣ و كنت وقتها أتسوق أنا و صديقتي فوزية و شممتها إياه و قلت عاجبني بس مستحيل أشتريه عشن كيم.. لكن من حسن حظي إنها جابته لي هدية بعدين هههههههه.. ريحته من اسمه حاااالية مرة و لطيفة.. من مكوناته الأساسية العسل و شمع العسل و الفانيليا و المسك و جوز الهند و ورد الجوري و الأوركيد.. ثباته ٥ من ١٠ و أقرب بديل له هو عطر العسل من ذا بودي شوب و طبعا أرخص بكثير منه..

Ambre by L`Occitane 

أكثر عطر انشهر في لوكستان و هو قديم ما عاد يباع لكن طلعوا منه إصدار جديد بعلبة مختلفة بس ريحته قريييبة مرررة من القديم و كثير انبسطت لأنه حقيقي ممتاز.. طبعا من اسمه هو عنبر قوي مرة و معه فانيليا و بذور التوكا و شوية ورد.. أنا أحبه لوحده و أحب أخلطه مع العطور الثانية يعطيها دفء و عمق.. ثباته ٩ من ١٠ و قليل منه يكفي..


Good Girl by Carolina Herrera

هذا العطر من كارولينا هريرا نزل في آخر ٢٠١٦ و جذب الكثيييير عشان شكله الأنيق و نزلوا منه علبة بقليتر و علبة بكرستال.. ريحته ورد و سويت و للأمانة بالبداية حسيته عادي جدا و مو مميز لكن يوم عن يوم حبيته أكثر.. مكوناته الأساسية تصلح تكون حلى هههههه.. مكون من الياسمين و السوسن و مسك الروم و بذور التونكا و القهوة و الشوكلاته و الفانيليا و خشب الصندل.. ثباته ٦ من ١٠.. على فكرة هو الكعب الوحيد عندي هههههه.. مشاكل الظهر ما تخليني ألبس كعب للأسف

Decadence by Marc Jacobs

عطر ديكادانس من مارك جيكبس نزل سنة ٢٠١٥ و كان هدية لطيفة من زميلاتي في الدوام و له مكانة في قلبي.. ريحته غريبة و مميزة مثل علبته .. نزل منه كذا إصدار لكن هذا الأفضل في نظري.. مكوناته الأساسية العنبر و الجوري و البنفسج و الياسمين و الزعفران و الخوخ و أحس فيه ريحة بودرة خفيفة.. الريحة أحسها تناسب المساء أكثر لكن أنا أحبها و أحطها بكل وقت.. ثباته ٩ من ١٠

Watch by M. Micallef

تعرفت على ماركة مكاليف عن طريق صديقتي رامية.. و أسرني العطر هذا بالذات و كان سعره شوي غالي بالنسبة لي و لما صار عمري ٣٠ جبته لنفسي هدية و أحببببه مرة.. نزل سنة ٢٠٠٢ و الساعة اللي فيه المفروض تشتغل بس ما عرفت لها و تجاهلت أمرها.. العطر حاااااالللليي و ثقييييل و بخة بسيطة منه تكفي.. كان عند الماجد عطر اسمه سكون ١ نفس ريحته بالضبط بس أرخص منه بكثير و قطعوه فجأة و نزلوا بداله سكون ٢ و للأسف مختلف تماما و ما أعجبني.. نرجع لعطر واتش.. مكوناته الأساسية الفانيليا و المسك الأبيض و مسك الروم و الياسمين و زهرة اليلانق يلانق و المشمش و اليوسفي.. سعره في باريس قاليري ألف ريال لكن ممكن تلاقونه في أماكن ثانية أرخص.. أنا خذت عطري من أرجوان السويدي بـ٧٠٠ ريال..  ثباته ٩ من ١٠ 


الثلاث عطور على اليسار هي من عطور نيش Niche و هذا المصطلح يطلق في العادة على العطور اللي تنتج بكميات قليلة في العالم في مصانع صغيرة جدا و تباع في محلات محدودة و في الغالب تكون مكوناتها ذات جودة أكثر و الماركات المصنعة تكون مختصة في العطور فقط ما تسوي أزياء و لا مكياج و أحيانا يكون سعرها مرتفع شوي.. في السعودية عطورات نيش متوفرة في لادوريه و موقع فانيلا

Levantium by Penhaligon`s

عطر ليفانتيوم نزل بسنة ٢٠١٤ بالنسبة لي هو عطر شرقي و حالي بنفس الوقت و مناسب للنساء و الرجال و مرات أحطه لبناتي.. من العطور اللي تركيبتها غريبة و مميزة.. من مكوناته الأساسية العنبر و خشب الصندل و المسك و الفانيليا و الباتشولي و الهيل و القرنفل و زهرة اليلانق يلانق و الجوري و الياسمين و البنفسج و شوي زعفران و برغموت و مشمش.. مزيج مختلف حقيقة لكن حلووو.. ثباته ٩ من ١٠ 


PHI Une Rose de Kandahar by Tauer

اسم العطر معقد بس الناس دايم تسميه روز قندهار و نزل بسنة ٢٠١٣.. المميز في عطور هذي الماركة هو اللمسة الطيفة من صانع العطور.. جوا العلبة بعد الفتح ورقه صغيرة فيها توقيعه.. العطر دافي و يعتبر شوي شرقي و فواح.. مكوناته الأساسية الباتشولي و المسك و العنبر و بذور التونكا و الفانيليا و ورد الجوري و القرفة و المشمش و اللوز و البرغموت.. ثباته ٨ من ١٠



Number One Intense by Nicolai 

هذا العطر اسمه نمبر ون من ماركة نيكولاي في نظري نسخة طبق الأصل من شانيل نمبر فايف.. و للأمانة كنت ناوية أهدي نفسي شانيل نمبر فايف إذا صار عمري ٤٠ لكن يوم وصلني هالعطر من لادوريه بطلت من شانيل خلاص هههههههه مدري كيف أوصف ريحته لكنها قوية و مركزة و تميل على بودرة إذا بردت شوي.. من مكوناته الأساسية العنبر و المسك و خشب الصندل و وردة مسك الروم و اليلانق يلانق و الياسمين و الجوري و فيه شوي من ورق و فاكهة الكشمش الأسود.. أحبه لوحده أو أخلطه مع عطور ثانية و أستخدمه لبناتي في السهرات.. ثباته ٩ من ١٠.. سعره هنا حدود ٥٠٠ أو ٦٠٠ ريال و لما زرت محلهم الصغير في باريس توقعت ألاقيه أرخص بس تقريبا نفس الشي.. 


و بس..
للأمانة كتبت الموضوع و طلع طويل مرررة و أختي قالت لي أحسن أخليه لكم على قسمين و هذا هو القسم الأول.. شاركوني عطوركم المفضلة تحت هالموضوع مع وصف بسيط لها عشان الكل يستفيد و لو ذوقكم قريب من ذوقي اكتبوا لي ترشيحاتكم لعطور حابين أجربها.. و هل مهتمين أحط لكم قائمة الأماني العطرية حقتي في الجزء الثاني مع وصف مبسط لها؟ 



لا تنسوني من دعاكم
PEACE





Aug 8, 2017

The Other Side of Me (Collaboration) جانب مختلف من حياتي


السلام عليكم

كيف حالكم؟ و كيف الإجازة حتى الآن؟



اليوم أنا متحمسة مرررة لأن هالموضوع هو تعاون جديد مع مجموعة كبيرة من البلوقرز اللي أحبهم و أثق فيهم و لأن التعاون بيكون مميز اخترنا له هالتاريخ المميز ٨\٨.. و فكرنا نشارككم جانب بعييييد عن التجميل اللي تعودتوا عليه منا.. بيكون عن أشياء غير تجميلية نحبها و نفضلها سواء بشكل دائم أو في الفترة الأخيرة.. بس قبل ما أبدأ خلوني أعرفكم بالبلوقرز المشاركات معي في التعاون:



و لازم بعد ما تخلصون قراءة موضوعي تروحون تشوفون موضوعاتهم و فيديوهاتهم عشان تتعرفون علينا أكثر و تشاركونا جانب جديد من حياتنا.. بس اضغطوا على الأسامي فوق و تمتعوا!


كنت بأبدأ بالقهوة بس أتوقع إنها معشوقة الجميع و أنا أولهم راح أخليها لموضوع ثاني بعدين لما أشتري ماكينة نسبريسو و ببدأ معاكم بلعبة صار لي ألعبها مممم ٤ سنوات يمكن؟ ما أفتكر بالضبط بس من زماااااان و اسمها Two Dots فيها مراحل كثيرة و في كل تحديث يضيفون لها مراحل زيادة و فيها تحديات تنزل لفترات مؤقتة ممتعة مرررة و فيه أدوات مساعدة أجمعها خلال اللعب.. مدري كيف أشرح لكم اللعبة باختصار لكن تقريبا هي عبارة عن ربط بين نقاط في عدد معين من الحركات و الحين وصلت للمرحلة ١٠١٠ و متحمسة مررررة للمراحل الجاية!! 


سماعاتي JVC Xtreme-Xplosivs برضو قديمة مرة و كان لونها أحمر ناصع بس لأنها عندي من ٧ سنوات أو أكثر و استخدمها كثير برا البيت مع الاحتكاك بالطرحة و العباية تغير لونها و صار عودي.. من يوم اشتريتها و أنا ما استخدم غيرها.. الصوت فيها بططططل ما شاء الله و جودتها عالية و تتحمل.. أتذكر أخذتها من إكسترا بحدود ٢٠٠ ريال عاد مدري للحين موجودة عندهم و لا لا لكن لقيتها لكم في أمازون لو حابين و يجي معها علبة صغيرة سوداء لكنها صغيرة مرة بالنسبة لي و لو كنت مستعجلة ما يمديني ألف السماعات زين و أدخلها جوا فصرت أحطها في هذي الشنطة الصوغننة من إتش أند إم.. و بصراحة أكررررررره لما تتقعد و تتداخل أسلاكها في بعض فلما أحطها بشكل مرتب في هالشنطة و بعدين في جيبي أو شنطة الدوام أو السوق أضمن تبقى بحال جيدة و بدون تعقيد! 


هذي معشوقتي في التصوير.. عدسة كانون 100mm الماكرو.. كل صوري الدقيقة و القريييبة في الإنستقرام اللي دايم تعجبكم تكون غالبا بهالعدسة.. اشتريتها بأول راتب لي في وظيفتي قبل ١٠ سنوات و كانت فرحتي فيها عارمة و للحين صامدة ما شاء الله و تبهرني في كل مرة أصور بيها



هذي المقلمية جديدة مرة لها تقريبا شهر عندي لكن حبيييييتتتتها و لازم أقول لكم عنها في هالموضوع.. كنت أدور مقلمية شفافة من فترة و لقيتها في فور إيفر ٢١ بـ ٣٠ ريال.. هي في الحقيقة شنطة مكياج لكن أنا خليتها للأقلام و هي بالطبيعة لونها فااااقع جدا و فيه منها أصفر و وردي لكن هاللون جذبني أكثر.. 



تفتكرون هذي الأقلام؟ أول ما عرفتها كنت في ثاني متوسط شفتها عند بنت اسمها فوزية.. هذي البنت في فترة وجيزة صارت صديقتي الصدوقة و للآن على تواصل معها و لو إنه قليل لكن الحمدلله ما انقطع.. المهم خطها الرقعة جمييييل ما شاء الله و تبهرني مرة لأن وقتها كان هالخط الحلو بس الكبار يعرفونه هههههههه.. كانت تستخدم هذي الأقلام و كنت أحسها تخلي الكتابة سلسة و الخط حلو.. خطي ما تحسن عليها طبعا مع الأسف الشديد خخ.. لكن أحب استخدمها بين فترة و الثانية و تذكرني بأيام الدراسة.. لقيتها في جرير علبة كاملة فيها كل الألوان اللي تشوفونها يمكن بـ٣٥..




كثير من الناس مهتمين استخدام الأجندة في السنتين الأخيرة و للبعض تعتبر الأجندة هواية تساعدهم على الاسترخاء خصوصا لما يقضون وقت ممتع في تزيين الصفحات و تلوينها و تنسيقها حسب المناسبات و المواسم.. أنا حاولت أندمج في موجة الأجندات لكن ما قدرت لكن اللي دايم أسويه من سنوات هو أشتري أي دفتر مسطر عادي يعجبني شكله و استخدمه لكل شي ممكن مثل أهم الأعمال اللي لازم أنجزها سواء في البيت أو المدرسة أو السفر أو للمدونة و الإنستقرام و أكتب أفكاري و أرسم فيه doodles بعد.. ما له تقسيم معين عندي كل ما امتلت صفحة قلبتها للثانية و هكذا.. المهم أختي جابت لي هذا الدفتر هدية ما أعرف من فين بالضبط.. جلد أسود و مطبوع عليه بالذهبي و من داخل مسطر زي ما أحب.. لسا جديد لكن راح أستخدمه قريب إن شاء الله 




الحاجة اللي ما يعرفها الكثير عني هو إن مشروبي المفضل على الإطلاق هو الموية.. و هالشي اكتشفته بعد سلسلة من التحاليل أيام المتوسط و الثانوي و اتضح عندي عيب خلقي بسيط في الكلية اليمنى و لازم أكثر من شرب الموية.. و يوم عن يوم صرت أحبها و استمتع فيها و خصوصا بعد ما قطعت المشروبات الغازية و قللت من المشروبات المعلبة و ما عندي خيارات باردة كثير.. و ما فيه ألذ من الموية في كوب آيكيا MJÖD العملاق هذا! عندي منه ٢ في بيتي و ١ في بيت أهلي لأنه كبير أعبيه مرة وحدة بموية باردة مرة و أرتاح من المشاوير للمطبخ ( كسولة خخ) و أتذكر مرة شافته بنت خالي و قالت لي وين غطا الجك هذا؟ هههههههههههه.. عاد الحلو في هالكوب إنه رخيص مرة بـ٧ ريال بس!!!! 




لو وصلتوا لهنا في القراءة فـ من جد شكرا لكم و خلاص باقي شوي و أخلص ههههه.. اللي عندها أطفال أكيد تعرف إنه مستحيل يكون عندها كيبورد نظيف مدة طويلة فـ أتمنى تتجاهلون هالشي خخ.. في الشهور الأخيرة صرت مدمنة فيديوهات الـ decluttering تعني التخلص من الأشياء الزايدة اللي تسبب الفوضى.. بلا مبالغة كل ما شفت نفسي فاضية فتحت يوتيوب و كتبت في البحث decluttering makeup و لا decluttering my house.. أحس بالحماس و أشوف كم شيء تخلصوا منه و كيف صار الوضع بعدها و مرات أقوم أرتب بعدها ههههههه.. و الشي الثاني اللي اشوفه ع اليوتيوب هي قناة تعتبر جديدة نوعا ما.. لكن أبهرتني ببراعتها في المكياج و حبيت أختم لكم الموضوع بقناتها: RawBeautyKristi


أتمنى يكون الموضوع أعجبكم و لا تنسون تشوفون بقية موضوعات و فيديوهات التعاون اللي حطيت لكم روابطهم في البداية..


لا تنسوني من دعاكم
PEACE


© ●terter thinks● | All rights reserved.
BLOG TEMPLATE HANDCRAFTED BY pipdig