Oct 15, 2016

Top 10 High-End Products (Collaboration)

السلام عليكم و رحمة الله

اليوم أنا كثييير متحمسة لهالموضوع لأني تعاونت فيه مع مدونات أحبهم كثير و أثق فيهم و أحب أتابعهم بكل مكان و هم: 
أسماء المالكي من مدونة That Red Lip |  هنا
 غادة عبدالله من مدونة GhadaAbdullah09 | هنا
سناء من مدونة La Beautiful Details | هنا 

راح نتكلم عن أفضل ١٠ منتجات غالية جربناها من المحلات الكبيرة مثل سيفورا و دبنهامز و غيرها و نشوف إنها تستحق الاقتناء..

هنا في مدونتي راح أشارككم خياراتي و أتمنى بعد ما تخلصون من موضوعي تروحون تشوفون موضوعات المدونات اللي ذكرتهم فوق و تشوفون خياراتهم و بالتالي تحددون المنتجات اللي تناسبكم أكثر.. 


 شخصيا لقيت صعوبة في تحديد ١٠ منتجات بس!!! لكن خلاصة المنتجات أنا راضية عنها جدا و بتلاحظون إني دايم أنصح فيهم و أتكلم عنهم كثير بالسنوات اللي فاتوا سواء هنا أو على الإنستقرام و السناب..  يالله نبدأ سوا بسم الله:



Hourglass Mineral Veil Primer
هذا البرايمر للوجه من ماركة أور قلاس هو حقيقة أفضل برايمر جربته في حياتي.. عندي كثير برايمرات حلوة لكن هو مختلف جدا!! قوامه خفيف على البشرة و ما يحتاج تحطين منه كمية كبيرة.. مقاوم للماء نوعا ما و خالي من الباربن و السولفيت.. مم ما أعرف أشرح لكم إيش مفعوله بالضبط لكن يخلي نتيجة مكياجي دايم رائعة و مدموجة و الأهم يظل مكياجي ثابت على وجهي لساعات.. هذي العلبة الصغيرة سعرها ١٩ دولار يعني تقريبا ٨٠ ريال.. فيه الحجم الأساسي.. و فيه منه حجم جمبو كبييير.. حطيت لكم هنا رابطه على موقع سيفورا الأمريكي.. للأسف مو متوفر عندنا بس أنصح تطلبونه و تجربونه.. لو ع الأقل الحجم الصغير زي اللي بصورتي..

▼▲▼▲▼▲▼▲▼▲▼▲▼


Nars Sheer Glow Foundation
و أخييييرا الحمدلله صارت نارز متوفرة في سيفورا السعودية.. و حابة أقول لكم لو تحبون الأساس اللي يبان طبيعي و فيه لمعة صحية راح يعجبكم هالأساس كثييير.. قوامه خفيف و تغطيته متوسطة و ما يكتل و ما يتأكسد.. جربت أحطه بأصابعي و بالبيوتي بليندر و بالفرش و كلهم يعطوني نتيجة ممتازة معاه.. كتبت عنه موضوع كامل من فترة هنا.. بشرتي مختلطة و أعجبني و أختي بشرتها جافة جدا و كمان أعجبها كثير.. فيه ملاحظة مهمة: لازم ترجون العلبة زين قبل الاستخدام :)

▼▲▼▲▼▲▼▲▼▲▼▲▼


Nars Blush in Sin
و بما إننا في ماركة نارز بأوريكم بلشري المفضل من هالماركة.. بلشراتهم عموما حلوة بس هذي الدرجة اللي اسمها سِن مميزة.. بين الموف و البني و الوردي و الرمادي.. ممكن تشوفون البلشر بالصورة و بالمحل و تحسون إنه غريب و يمكن بشع حتى هههههه..  لكن على البشرة و خصوصا الوسط و الغامقة يجنن!!! يغني عن الكونتور و يحدد الخدود و يعطيها لون طبيعي مايل للوردي البني.. فيه لمعة ذهبية خفيييييفة ما تبان مع الاستخدام.. لو حابين تجربون درجة ثانية كمان جربوا taj mahal حلوة و مميزة بعد..

▼▲▼▲▼▲▼▲▼▲▼▲▼



Make Up For Ever Ultra HD Concealer
أنا أستخدم عجلة كريولان من سنين و كنت مقنعة فيها لين جربت هذا الكونسيلر.. يالله وقتها حسيت إني أتعبت هالاتي بكريولان كل يوم لأنه ثقيل مرة حق مناسبات و كذا.. المهم أهم سبب خلاني أحب هالكونسيلر إنه خفيييييف ما أحس فيه و ما أحتاج منه كمية كبيرة.. نقطة وحدة تغطي الهالات كلها و يعطي ترطيب نوعا ما.. يغطي الهالات لوحده بنسبة ٨٥٪ لأن هالاتي غااامقة مرة و هالنسبة ممتازة جدا في نظري لكل يوم.. و في المناسبات أحط قبله شوي مصحح برتقالي و تصير تغطيته كاملة.. اللي يميز هالكونسيلر بعد إنه يعطي إضاءة و تنوير تحت العين.. العلبة حجمها كيوت صغييييييرة و نحييييفة بس استمرت عندي تقريبا سنة (استخدام شبه يومي).. الدرجة اللي أستخدمها رقم Y33 و حرف Y يعني Yellow أصفر.. فيه درجات مايلة لوردي بدايتها R يعني Red.. جربوا بالمحل و خذوا اللي يناسبكم منه..  

▼▲▼▲▼▲▼▲▼▲▼▲▼



Benefit The Porefessional Agent Zero Shine Loose Powder
شخصيا مو كثير أستخدم بودرات على وجهي.. أكتفي في البودرة لتثبيت الكونسيلر تحت العين بس.. لكن إذا قررت أستخدم بودرة على وجهي خياري غالبا يكون هالبودرة من بينفت.. العلبة غبية تقهر هههههههه بس المنتج من داخل ممتاز و هذا المهم.. خفييييفة مررررررررة ما تكتل أبدا.. و تثبت الكونسيلر و الأساس و تعطي منظر مطفي لساعات.. هم كاتبين إنها شفافة بس أنا أحس فيها لون خفيف بيج و مناسبني الحمدلله.. و تنفع للـ baking بعد..

▼▲▼▲▼▲▼▲▼▲▼▲▼


Becca Shimmering Skin Perfector Liquid in Opal
و كمان ماركة بيكا صارت متوفرة في سيفورا السعودية الحمدلله!!! هالماركة عندها منتجات كثيييرة لكن أكثر شي انشهرت فيه هي الإضاءات بكافة الأشكال و الألوان.. هذا النوع السايل من إضائتهم المشهورة أوبَل.. شريت منها زمان الحجم الصغير و حطيت لكم صورته وقتها في الانستقرام هنا.. و بقى فيها قليييل وعطيتها أختي و قلت بداخلي خلاص أنا عندي إضاءات واجد ما رح أحتاجها.. لكن بعد أيام حسيت قد إيش كانت مهمة و قد إيش كنت أحبها خخ.. قررت أرجعها لحياتي و أشتريها مرة ثانية في خصومات سيفورا الأمريكي.. و تفاجأت حقيقة لما وصلتني هدية من بيكا فيها هالمنتج!!!! كنت بأطير من الفرح و الله هههههههه.. باختصار هي أفضل إضاءة سائلة جربتها.. حلوة لوحدها بدون أساس و حلوة تتوزع على البشرة قبل الأساس عشان تعطي لمعة صحية للوجه و كمان ممكن تنخلط مع الأساس و ممكن تنحط بعد الأساس ع المناطق البارزة مثل عظمة الخد و الأنف و أعلى الشفايف.. لمعتها هااادية ما فيها قليتر و تندمج بسهولة ع البشرة.. فيه منها ألوان ثانية جربوها و خذوا اللي يناسبكم.. 

▼▲▼▲▼▲▼▲▼▲▼▲▼



Urban Decay Naked 1 Palette 
أحس إربن ديكاي هي أول ماركة بدأت ببالت كبير يجمع كل الألوان الطبيعية الهادية اللي تحتاجها أي بنت.. نيكد ١ أول ما نزل سوى ضجة و أنا أشوف إنه يستاهل هالشهرة فعلا.. و لاحظت من بعد هالبالت بدأت الماركات تنزل بالتات كثيرة بنفس الفكرة بس لازال بالت نيكد ١ في نظري هو الأفضل!!  جامع التون الدافي و البارد و الدرجات المطفية و اللمعة و القليتر..  شريته سنة ٢٠١١ و للحين هو خياري الأول في السفر ما أحتاج معه إلا كم ظل ملون مفرد زي البنفسجي مثلا و العودي و خلاص.. و في الأيام العادية أسرع لوك أسويه دايم يكون من هالبالت.. و أستخدم البالت لأغراض مختلفة مو بس كـ ظلال.. مثلا الدرجة Dark Horse أستخدمها لحواجبي لأن الشيمر فيها مو قوي و يبان الحاجب معها طبيعي مو مطفي مرة.. أسخدم كمان الدرجة Buck كونتور للوجه و الدرجة Sin كإضاءة للوجه.. بالت ممتاز..  و لو عندك إياه من زمان و حابة تغيرين شوي جربي نيكد سموكي حلو و مناسب للنهار و السهرات.. ظلال و بالتات إربن ديكاي عموما جودتها حلوة أي واحد يعجبك خذيه و ما رح تندمين إن شاء الله..


▼▲▼▲▼▲▼▲▼▲▼▲▼




Urban Decay Primer Potion
برايمر للعين برضو من إربن ديكاي .. سمعت في إيفنت لهم قبل سنة إنهم أول من ابتكر برايمر للعين يساعد الظل يثبت و ما يخطط و يتكتل.. و ممكن بعض البنات ما يحتاجون هالمنتج بس أنا لأن جفوني دهنية لو ما أحط برايمر راح يخرب كل شغلي في الظلال و الدمج في ساعة أو أقل و راح يتكتل و يتجمع في الخطوط!!! عشان كذا استخدم البرايمر هذا قبل أي مكياج عين و مرات أحطه في منطقة الهالات عشان الكونسيلر ما يخطط معي.. هذا النوع العادي الشفاف و فيه أنواع بألوان ثانية و فيه نوع لمقاومة التجاعيد و كلهم مجربتهم و حلوين جدا .. 


▼▲▼▲▼▲▼▲▼▲▼▲▼




 Urban Decay Vice Lipstick in 1993
أحب اللون البني في الأرواج عموما لأنه يلائم الظلال المجنونة اللي مرات أحطها هههههههه.. هذا الروج المطفي البني من إربن ديكاي اسمه ١٩٩٣ و تركيبته كمفورت مات.. الحين غيروا التعليب صار أحلى و زادوا الألوان و التركيبات.. أفضل تركيبتين عندي في أرواجهم هي comfort matte و mega matte لأنهم مطفيين و بنفس الوقت ما ينشفون الشفايف و ثباتهم ممتاز.. لو ما تحبون اللون البني الصريح زي كذا جربوا لون ثاني اسمه Tampered بني مايل لوردي جميل مرة و ناوية أشتريه بأقرب فرصة..


▼▲▼▲▼▲▼▲▼▲▼▲▼



Buxom Full on Lip Polish in Dolly
بالعادة ما أحب القلوسات كثير و هذا حتى ما شريته عن قناعة بس طلبت من أمريكا علبة فيها أفضل المنتجات مبيعا في سيفورا و كان من ضمنها هالقلوس و خليته مركون على جنب فترة و كنت ناوية أتخلص منه و أعطيه أي أحد و الحمدلله إني انتظرت و جربته.. اللون هذا هو أشهر لون قلوس في ماركة بوكسوم.. وردي مايل للموف و قوامه شبه شفاف.. اللي خلى هالقلوس هو المفضل عندي على الإطلاق هو شعور النعناع اللي فيه.. مدري كيف أشرح لكم بس أول ما ينحط ع الشفايف يصير كأنه حار و يلسع و يملأ الخطوط الدقيقة و يبيّن الشفايف ممتلئة.. أنا أحب هالشعور كثيييييييير.. لو تحبين هالشعور لارم تجربينه.. السبب اللي خلاني لسا ما طلبت منه واحد ثاني هو إني أبي أشوف بقية الألوان بنفسي إذا سافرت أمريكا و أختار.. عندهم تركيبة ثانية فيها اللون أقوى اسمها Full on Lip Cream أبي أجربها كمان و أقرر.. للأسف مو موجودة بالسعودية بس يا رب تجي عندنا زي بيكا و نارز..


▼▲▼▲▼▲▼▲▼▲▼▲▼

و بكذا أكون خلصت موضوعي عن المنتجات الغالية اللي تستاهل التجربة فعلا.. أتمنى أعجبكم الموضوع و لا تنسون تشوفون مدونة سناء و غادة و أسماء عشان تستفيدون أكثر..

و لو تبون تشوفون موضوعات تعاون سويتها زمان تفضلوا هنا و هنا 
و لا تنسوني من دعاكم




PEACE






7 comments:

  1. مره حبيت المنتجات ♥♥
    يعطيك العافية حبيبتي ♥

    ReplyDelete
  2. حبيت المنتجات حيل
    وبرضوا حبيت فكرة التعاون بينكم ك بلوقرز
    اتمنى يجي اليوم اللي اكون فيه من ضمنكم ...

    ReplyDelete
  3. نفس فكرتي بباليت نيكد شامل ويغنيني نوعا ما عن باقي الباليتات
    نارس نفسي اجربه بس لما عرفت انه مافيه ضغاط هونت
    لاني من النوع الي مااعرف اتحكم لما اصب شي فآكيد حيعدم لي الدنيا


    استمعت بتدوينتك امل .. يعطيكي الف عافية

    ReplyDelete
    Replies
    1. أنا كمان ما أحب الأساس اللي ينصب صب.. و لقيت نارز يبيعون رأس ضغاط و شريته و مركبته عليه شوفيه بالصورة..
      سعر الرأس هذا حلو تقريبا ٦ دولار

      Delete
  4. شركة تنظيف فلل بالخبر
    تعد افضل شركة تنظيف بالخبر حيث تستطيع تقديم افضل خدمات النظافة الشاملة من تنظيف منازل وشقق وفلل وبيوت ومجالس وكنب وسجاد وموكيت بافضل جودة مع العناية الشاملة بجميع اركان المنزل , كما تقدم شركة المثالي جروب للخدمات المنزلية خدمات تنظيف المسابح وصيانتها مع الترميم والانشاء الشامل بافضل الاجهزة الحديثة ومن خلال طاقم مميز ومدرب علي اعلي مستوى لتقديم خدمات تنظيف المسابح بالجودة والمواصفات القياسية فاذا اردتم الحصول علي خدمات مثالية لتنظيف المسابح وصيانتها مع الضمان ما عليكم الا الاتصال بشركة تنظيف مسابح بالخبر وسوف تحصلون علي ما هو افضل باذن الله , وقد اهتمت شركة تنظيف مسابح بتقديم خدماتها عبر كافة ارجاء المنطقة الشرقية بالمملكة العربية السعودية فتقدم الخدمات الاتية

    شركة تنظيف مسابح بالخبر
    شركة صيانة مسابح بالخبر
    شركة تنظيف مسابح بالقطيف
    شركة صيانة مسابح بالقطيف

    شركة تنظيف مسابح بالجبيل
    شركة صيانة مسابح بالجبيل
    شركة تنظيف مسابح بالاحساء
    شركة صيانة مسابح بالاحساء

    ReplyDelete