Nov 10, 2016

New Products \ First Impressions

السلام عليكم و رحمة الله

في الفترة الأخيرة وصلتني منتجات كثيرة من ماركات مختلفة.. بعضها جديد بالسوق و بعضها جديد علي شخصيا.. و جربتها مدة كافية و كونت عنها انطباع و رأي و راح أشارككم إياه اليوم و يا رب يعجبكم الموضوع و يفيدكم.. الموضوع مفصل تفصييييل ممل.. فلو ما عندكم وقت تقرونه كله الحين ممكن تشوفون المنتج اللي تبونه بس و تكملون قراءة الباقي بعدين :$ و ترى حطيت لكم تقييمي الشخصي من ٥ تحت كل منتج.. يالله بسم الله نبدأ






Urban Decay All Nighter Liquid Foundation
✭✭✭✭
هذا الأساس الجديد من إربن ديكاي مكتوب عليه مطفي ثابت و مقاوم للموية و تغطيته كاملة.. يعني في الغالب مناسب للبشرات الدهنية و المختلطة.. درجاته كثيرة بس مهم جدا قبل تشترين تتأكدين من التون المناسب لك.. الأرقام الصحيحة بدون كسور هي اللي التون حقها أصفر و يناسب بشراتنا العربية.. هذي الدرجة اللي عندي رقم 4.0 .. أما بالنسبة لتجربتي معه فهو ثقيل جدا و يغطي تغطية كاملة ينفع للمناسبات و السهرات.. أحب أستخدم قبله مرطب قوي أو زيت عشان يمشي معي الأساس و يندمج و لأني مو كثير أحب التغطية الكاملة مرات أدمج معه قبل أحطه ع وجهي شوي كريم خفيف أو برايمر.. مهم جدا ما تستخدمون كمية كبيرة عشان ما يكتل.. ثباته ممتاز بس لو عندك قشور أو حبوب ممكن يبرزها شوي.. عيبه الوحيد إنه يتأكسد.. يعني ممكن تنحل هالمشكلة إذا أخذتي درجة أفتح منك و إذا تأكسد بيصير لونه مناسب مو غامق عليك.. 

Urban Decay Naked Skin Color Correcting Concealer
✭✭✭✭
من المنتجات الجديدة علي هي مصححات إربن ديكاي و نازلة بخمس درجات كل درجة تصحح مشكلة معينة.. ما جربت إلا المشمشي peach و للأسف مررررة فاااااتح و هو يعتبر أغمق واحد فيهم تقريبا!!! يعني المفروض إنه يخفي الهالات و التصبغات الغامقة أو يخففها على الأقل لكن لأنه فاتح جدا أحسه أبرز الاسمرار أكثر.. يمكن لو أنت بشرتك فاااتحة و هالاتك خفيفة يناسبك لكن أنا أبدا ما ناسبني و نفسي يسوون درجات تصحيح غامقة..

Sephora Collection High Coverage Concealer\ Corrector - Natural Finish
✭✭✭✭
هذا الكونسيلر مسوي ضجة كبيرة أول ما نزل بأمريكا كونه بديل أرخص شوي لكونسيلرات غالية.. فيه منه درجات عادية و درجات مصححة و حسب آخر مرة رحت سيفورا عندنا بالسعودية كانوا منزلين درجات قليلة و أغلبها فاااتحة.. و لما أرسلوا لي هاللون في البداية قلت مستحيل أجربه لأنه فاتح شوي علي و على الهالات المستعصية حقتي ما رح ينفع أبدا.. بس قررت أجربه فوق مصحح Wacon اللي تكلمت عنه هنا و الحمدلله أني اتخذت هالقرار.. صراحة تغطيته حلوة و قوية يعني ما تحتاجين منه كثير.. و إذا اندمج باسفنجة البيوتي بليندر بالذات يصير كأنه بشرتك نفسها و ينور تحت العين.. ممكن تستخدمينه لوحده لو ما عندك هالات قوية بس أنا ما ينفع معي لحاله لازم قبله مصحح برتقالي  :(

Becca Shimmering Skin Perfector Pressed in Opal 
✭✭✭✭✭
قبل سنتين مدري ٣ سنوات نزلت هالإضاءة بأمريكا و كسرت الدنيا و كنت متحمسة لها و لما سافرت جربتها لقيتها قووويييييية مليانة قليتر و حففففلللللة و تركتها و لا فكرت فيها مرة ثانية و كنت استغرب كيف صارت مشهورة.. المهم أرسلوها لي بيكا قبل شهر تقريبا مع مجموعة منتجات و حقيقة ما كنت فرحانة فيها لأنها بالنسبة لي ظل مو إضاءة و كتبت في سناب إني ما حبيتها.. و بعد هالسناب دار بيني و بين البلوقر نهلة السردي نقاش عنها قالت لي فيه: يا أمل بعد ما تحطين الإضاءة على الفرشة انفضيها زين بعدين حطيها على بشرتك.. و سويت طريقتها و تغير رأيي عنها تماما!! لما نفضت الفرشة طاح كل القليتر و بقت الإضاءة الحلوة.. بعد ما كنت أكرهها صارت هي من الإضاءات المفضلة عندي ههههههه و تحمست الحين أجرب درجة شامبين بوب كمان.. بيكا صارت تباع عندنا و تكلمت عن النوع السائل من الإضاءة في موضوع سابق شوفوه هنا و لو حابين تشوفون مدونة نهلة تلاقونها هنا و أنصحكم تتابعونها تدويناتها خفيفة و مفيدة.. 


و نجي الحين للظلال و مكياج العيون (فقرتي المفضلة خخ)


Becca Ombre Nudes Eye Palette
✭✭✭✭✭
بالت ظلال مطفية بألوان طبيعية التون حقها بارد من ماركة بيكا..  الظلال هذي زي ما يقولون زبدة!!! قوامها ناعم و اللون قوي جددددا و سهل دمجهم.. أكثر ٣ ألوان استخدمها هي الغوامق و أخلط آخر إثنين منهم و أحطهم لحواجبي.. فيه من هالبالت درجة ثانية دافية أكثر اسمها Ombre Rouge Eye palette شوفوها بموقع سيفورا هنا 

Nars Dual Intensity Eyeshadows
✭✭✭✭✭
هالنوعية من الظلال مو جديدة من نارز هي موجودة من زمان لكن أضافوا لها لونين جديدة هم اللي بالصورة فوق.. الروز قولد اسمه Rigel يجنن و لمعته قوووويييية مرة ممكن ينحط ع الجفن كله و ممكن بمدمع العين مع أي لوك.. اللون الكحلي اسمه Arcturus كنت متخوفة من هاللون لأن الظلال الزرقاء ما تطلع حلوة علي كثير لكن هذا كان حلو و التون الأزرق اللي فيه مو قوي و مايل للرمادي شوي.. بس لو خيرتوني بينهم راح أختار الروز قولد طبعا!!! هذي النوعية من نارز ممكن تستخدم جافة أو رطبة.. و فيه من نفس التركيبة بلشرات و إضاءات

Urban Decay Moondust Eyeshadow Palette
✭✭✭✭✭
نقطة ضعفي الظلال اللمّاعة.. عاد كيف بالت كامل كله ظلال لمّاعة و من إربن ديكاي!!! تركيبة البالت هذا مليانة قليتر و لمعة قوية يعني باختصار البنات اللي يحبون الأشياء الهادية و اللمعة الناعمة ما رح يعجبهم هالبالت.. شخصيا مبسوطة فيه كثيييير.. ممكن تستخدمون أي لون منه فوق أي ظل عشان يعطيه لمعة قليترية و ممكن ينحط قبله برايمر خاص بالقليتر عشان يبرزه و يثبته أكثر.. لو ما أعجبتكم توليفة الألوان اللي فيه ممكن تختارون ظلال مفردة بالألوان اللي تبونها من إربن ديكاي بنفس التركيبة Moondust و هنا حطيت لكم رابط ظلال مون دست في موقع سيفورا و عيني على الدرجة Solstice بأحطها في قائمة الأماني للسنة الجاية :$ :$ 




Urban Decay Razor Sharp Liquid Eyeliners
✭✭✭✭
هذي الآيلانرات السائلة الجديدة من إربن ديكاي و منها ٢٠ لون بين العادي و القليتر و الدوو كروم.. عندي منهم ١٠ ألوان.. بس واحد عطيته بنتي تلعب فيه و ضاع :( .. المهم هذي الآيلانرات عانيت معها شوي في البداية لأن الريشة رفييييعة مرة و أنا متعودة على الريشة العريضة بصراحة.. لكن مع التمرين و الممارسة عرفت لهم و حبيتهم.. ممكن لو أنت مبتدئة بالمكياج ما يناسبونك أو ع الأقل خليهم قدام شوي لين تتمرسين بالمكياج.. إزالتهم سهلة و هالشي أعجبني كثير و مقاومين للماء بس ممكن لو فركتي عيونك يتفتتون و يروحون.. بعض الألوان الفاتحة تحتاج إعادة عليها مرة ثانية عشان اللون يوضح أكثر.. اختيار اللون راجع لكم طبعا بس ودي تجربون لون Chaos على الأقل في المحل ..أزرق فاقع يجيب السعادة 



Rimmel Volume Colorist Mascara
✭✭✭✭✭
هممممممم هذي المسكرة من ريمل حاولت حاولت معها بكل الطرق و النتيجة ما أعجبتني.. كأني مو حاطة شي بس عطتني تحديد خفيف.. و أنا بصراحة دامني حاطة حاطة مسكرة أبيها تبان كثيفة و تطوّل رموشي مو بس تثقل علي و تنحسب مكياج و خلاص!! فكرت أعطيها فترة شهر استخدام شبه يومي يمكن تنشف شوي و يصير قوامها أحسن بس برضو للأسف ما تغيرت.. حتى شعرات فرشتها شكلها مزعج و يوخز العين.. صحيح هي رخيصة بس بنفس القيمة أقدر أجيب مسكرة أحسن منها من ميبلين أو بورجوا..


NYX The Curve Eyeliner
✭✭✭✭✭
هذا الآيلاينر شكله غريب و مصمم عشان يسهل مسكه و الرسم على المبتدئات.. طرف الآيلانر عريض و مرة سريع بالرسم و فعلا سهل جدا و ثباته حلو.. 

Benefit Ka-Brow
✭✭✭✭✭
هذا من ضمن منتجات بينفت الجديدة للحواجب.. فكرته نفس فكرة الديب براو بوميد من أنستازيا.. كريم لتعبئة الحواجب ثابت و له درجات مختلفة.. متوفر بست درجات و اللي عندي رقم 5 و هو يعتبر من الدرجات الغامقة.. كان ودي برقم 4 أحسه بيناسبني أكثر و يناسب كثير بنات كمان.. عموما كتركيبة حبيته خفيف مو ثقيل و يبان طبيعي و ثباته من ٥ لـ ٨ ساعات و أتوقع لو أنتم بمكان غير جدة ما فيه رطوبة واجد راح يثبت معاكم مدة أطول.. سهل مسحه بأي مزيل مكياج.. و أحسن ميزة فيه فرشته منه و فيه و ممتازة و الله.. لا يغركم شكل فرشة التيستر في المحل ترى من كثر ما يفتحونه الزباين و يسكرونه بسرعة و بقوة يخرب شكلها و تصير منفوشة!!! لكن للاستخدام الشخصي و لما تحافظين عليها تعيش معاك و تسهل عليك الأمور و ما تحتاجين تاخذين فرشة خارجية

 Hi Impact Brows and Eyes Palette
✭✭✭✭
هذا البالت للأمانة عندي من شهور و استخدمته كثيييير بس ما جت الفرصة أكلمكم عنه.. هو يستخدم  ظلال للعيون و كمان للحواجب و جامع كل الألوان الأساسية لكل الحواجب و ممكن ينخلط كذا لون عشان نوصل للون المناسب.. أنا استخدمته مرة أو مرتين كظلال.. لكن مليون مرة استخدمته للحواجب و أخلط اللون البني البارد مع شوي من الأسود و أعبي حواجبي بفرشة زويفا المشطوفة.. حبيت النتيجة لأني عموما أرتاح أكثر لما أسوي حواجبي ببودرة أكثر من الأقلام أو الكريم.. و اللي حببني فيه زيادة هو ثباته.. ثابت ما شاء الله لساعات و إزالته سهلة بعد..  مناسب كثير لخبيرات التجميل كمان لأنه صغير و ينفع للكل.. موجود في سيفورا و أعتقد سعره ١٥٠ ريال..




Benefit They're Real Big Sexy Lip Kit
✭✭✭✭✭
فيه كثير منتجات تعجبني من بينفت بس للأسف هذي المجموعة مو من ضمنها.. العلبة فيها ٤ أرواج صغيرة و الروج نفسه مقسوم نصين لون فاتح و لون غامق.. حطيت صورة أوضح في الانستقرام ممكن تشوفونها هنا.. شكل رأس الروج مصمم زي الدمعة عشان يسهل التوزيع و هذا الشي صحيح.. لكن كتركيبة و ثبات ما حبيت و لا واحد فيهم!! يعني الجودة مو جودة عالية و فيه في الدرق ستور زي ريمل و ريفلون و نكس أرواج أحسن مليون مرة و أرخص بكثير.. طبعا هذا ما يعني كل الماركة فاشلة بدليل منتج الحواجب اللي ذكرته فوق.. لكن لكل جواد كبوة و هذي كبوة بينفت :(





Rouge Dior in 772 CLASSIC MATTE
✭✭✭✭✭
و ختامها أطيب من المسك مع هذا الروج من مجموعة ديور الجديدة.. اللون هذا رقم ٧٧٢ بالذات رااااااائع بين الوردي و الموف و البني و مناسب لجميع البشرات تقريبا و ينفع ينحط صبح و مساء.. القوام مطفي كريمي يعني مو ناشف و يمشي بسلاسة على الشفايف و ثباته ممتاز تقريبا من ٣ لـ ٥ ساعات.. و أخيرا العلبة فخمة.. 
يعني لو تبين تشترين شي واحد بس من ديور بأقول لك خذي هالروج لأنه فعلا يستاهل كل ريال!!! 

و هذا كل اللي عندي اليوم.. شاركوني تجاربكم مع المنتجات الجديدة بالسوق في التعليقات و قولوا لي لو جربتوا شيء من اللي ذكرته فوق.. و شاركوا مدونتي مع صديقاتكم و أقاربكم و لا تنسوني من دعاكم..

PEACE

1 comment

  1. احب لمن تقولي لو تبغي تشتري شي واحد بس من براند معين احس هالجملة تخليني اكتب المنتج على طول في الفيفورت
    حبيت التدوينة شكرًااا

    ReplyDelete

© ●terter thinks● | All rights reserved.
BLOG TEMPLATE HANDCRAFTED BY pipdig