السلام عليكم و رحمة الله و بركاته..
كيف حالكم؟ و كيف الدوامات معاكم؟
الله يكتب لنا و لكم التوفيق و البركة في الوقت و الجهد إن شاء الله
في الفترة الماضية سافرت أوروبا و استغليت الفرصة طبعا و اشتريت مكياج و منتجات عناية خخ.. حاولت أشتري أشياء مو متوفرة عندنا و كمان اشتريت أشياء موجوة هنا بس سعرها هناك أرخص بكثييير.. اليوم راح أخصصه للمكياج و الموضوع الجاي للعناية لأن مشتروات العناية ودي أفصل فيها أكثر..
Make Up For Ever Camouflage Cream Pot هذا الشيء الوحيد اللي أخذته من سيفورا.. بطلة صح؟ هو نفس اللون اللي موجود في البالت الخماسي المشهور حقهم..كان عندي زمااااان هالبالت بس كنت وقتها توي بادية في التجميل و ما كنت أستخدمه بشكل صحيح و البالت فيه ألوان ثانية ما كنت استخدمها كثير.. ففرحت إني لقيت هاللون لوحده لأنه دايم مخلص أو مو متوفر من الأساس في بعض الدول.. رقمه 20 و سعره تقريبا ٩٠ ريال
● ● ● ● ● ● ● ● ●
نجي لمشتروات ماركة كيكو الإيطالية.. كنت حاطة كثير أشياء ببالي بس دخلت المحل كذا مرة و حاولت أجرب كل شي موجود و أختار المميز بس و اللي مو عندي قدر الإمكان.. و كانت هذي حصيلتي.. أخذت مناديل إزالة المناكير Nail Polish Remover Wipes سمعت بلوقر سعودية تمدحها بس مو متذكرة مين بالضبط بس عموما ودي أجربها و سعرها ٣٠ ريال.. و أخذت من ظلالهم الجديدة High Pigment هاللون رقم 20 برتقالي معه قليتر خفيف ذهبي ما أتذكر بكم بس مو غالي.. و اشتريت روج مطفي من المجموعة Velvet Passion Matte Lipsticks رقم 320 لونه بني غامق يجنن و تركيبته حلوة و حبيت التعليب جددددا.. سعره تقريبا حدود ٤٠ أو ٤٥ ريال
● ● ● ● ● ● ● ● ●
و كمان من كيكو أخذت محدد من مجموعة Enigma الجديدة و للأسف ما فيه تنوع كبير بألوان هالمجموعة لكن تركيبة المحدد نفسها ممتازة و تذكرني كثير بمحددات إربن ديكاي.. هذا اللون رقم 06 وردي غامق مايل للمشمشي شوي.. سعره ٣٠ ريال
● ● ● ● ● ● ● ● ●
و آخر شي من كيكو هذا البقمنت البرتقالي الفسفوري رقم 19.. هنا مبين لونه خفيف بس في الواقع تراه فاقع جدا نفس لون قلم تحديد الكتب البرتقالي ههههه.. كان نفسي فيه من زمان عشان أسوي لوك شفته باليوتيوب هنا .. و دخلت كم فرع قالوا ما عاد يباع البقمنت عندهم أصلا و مقطوع بكل الألوان بس موجود أونلاين حاليا.. طبعا تضايقت كثير لأنه أكثر منتج كنت أبيه من كيكو.. و في محاولة يائسة دخلت فرع صغير و سألت عنه قالوا موجود حبتين من هاللون بس في قسم التخفيض و علطول أخذته و هو أرخص شي شريته في سفرتي هههههه.. بعد الخصم سعره ١٤ ريال
● ● ● ● ● ● ● ● ●
دخلت في إيطاليا محل مكياج اسمه WYCON و قلت أشوف وش عندهم.. أخذت هذا المصحح البرتقالي Stick Concealer و حاليا استخدمه قبل الكونسيلر العادي.. جميل و الله.. سعره ٢٥ ريال.. و جربت قلم الكحل Long Lasting Eye Liner و أنا في المحل أعجبني لأنه كريمي و اللون قوي..و تركته دقايق و جربت أمسحه و لقيته ثابت مرة.. فأخذت لونين منه واحد بني غااااامق جدا و الثاني تركواز غامق بلمعة خفيفة مرة.. أرقامهم واضحة في الصورة و سعر الواحد ٣٥ ريال.. كان نفسي أجرب منتجات أكثر منهم بس لأنها ماركة جديدة علي فضّلت أتأنى و ما أبالغ..
● ● ● ● ● ● ● ● ●
و مريت على محل كبير في سويسرا اسمه Manor يبيع كل شي في هالحياة هههههه أكل مكياج ملابس شنط.. لقيت في قسم المكياج ماركة أيسنس Essence و ستاندهم مليان ما شاء الله.. احترت وش أشتري منهم و سألت صديقتي البلوقر البحرينية سناء لأنها تحب هالماركة و دايم تاخذ منها.. الله يسعدها نصحتني بأشياء كثير بس حاولت أتمالك نفسي و آخذ هالمسكرة Get Big Lashes على مدحها.. أما برايمر العين I ❤︎ Colors المخصص للألوان تحمست أشتريه من أول ما شفته لأني أحب برايمرهم العادي و أكيد هذا بما إنه مخصص للألوان بيكون أقوى.. صار لي أسبوعين أستخدمه و حبيته كثير.. كل المنتجين سعرهم سوا تقريبا ٤٠ ريال.. أنصحكم تشوفون مدونة سناء هنا و انستقرامها هنا.. مرة تصويرها يفتح النفس ما شاء الله و لها تجارب كثيييرة بتفيدكم
● ● ● ● ● ● ● ● ●
و ماركة بورجوا Bourjois كانت رخيصة في فرنسا.. و كان هدفي الوحيد منها هو الأساس السيرم هيلثي مكس Healthy Mix Serum.. عندنا الأساس العادي بالسعودية بس هذا الأساس السيرم مو موجود.. أخذت رقم 53 و طلع مناسب الحمدلله و سعره ٧٥ ريال و لما شفته البودرة حقته Healthy Balance تذكرت مدح البلوقرز و الفلوقرز البريطانيات لها و اشتريتها بنفس اللون 53 و سعرها زي الأساس تقريبا..
● ● ● ● ● ● ● ● ●
و دخلت محل موجي الياباني Muji أخييييرا.. و قعدت فيه أنا و أختي بلا مبالغة أكثر من ساعتين تفرجنا فيها بكل شي موجود عندهم.. أخذنا أشياء للمدرسة و الدوامات و كان نفسي آخذ منظمات للمكياج و البيت بس أغلبها حجمها كبير و ما ينشال بشنطة السفر لازم لها كرتون و شحن.. فقررت أتركها الحين و إذا تيسرت لي روحة لدبي اشتريتها من هناك بإذن الله.. فالحين بأوريكم وش خذت منهم شيء يخص التجميل.. أخذت هالقطن (طبيعي غير ملون) و عندهم حجمين صغير و كبير.. أخذت الكبير.. سعره تقريبا ٤٠ ريال.. أعجبني لأنه سميك مرة و ما يتقطع بسرعة..
و آخر شي شريته هو هذا قصاص (مقراض) الأظافر من موجي كمان.. و أختي وقتها قالت لي: أمل من جدك!!!! هههههههه.. بس دامني راح أستخدمه دايم ليش لا.. ما أفتكر سعره بس ما كان غالي..
● ● ● ● ● ● ● ● ●
أما العينات هذي فأخذتها من محل عطور في فرنسا اسمه Serge Lutens عطوره حلوة مرة بس احترت و فكرت آخذ عينات الحين و إذا ربي كتب لي سفرة ثانية بعدين بأشتري منه.. عينة (عربي) تجنن للي يحبون العطور الشرقية و كمان عندهم عطر اسمه (شرقي) نسيت آخذ عينة منه.. العينة اللي تحت هي أجد عطر عندهم لما سافرت ريحتها سويت على زنجبيل و يوسفي..
● ● ● ● ● ● ● ● ●
و بس يا جماعة.. أتمنى يكون الموضوع عجبكم و استفدتوا..
و لا تنسوني من دعاكم
PEACE
تتهني فيهم ياحلوة ..
ReplyDelete