July Favorites | مفضلات يوليو

السلام عليكم و رحمة الله..

كيف حالكم؟ و كيف الإجازة معاكم للحين؟ 

موضوعي اليوم هو مفضلات شهر يوليو.. في الإجازة مو كثير أطلع برا فـ مفضلات المكياج قليل هالشهر و بعضها قد ذكرته في موضوعات المفضلات قبل و ما فيه داعي للتكرار.. بسم الله نبدأ.. تنبيه: موضوعي طويل و مفصل هههههه

أحب أبدأ ببودرة بينفت the Porefessional Agent Zero Shine هي المفروض تنحط ع الوجه عشان تثبت الأساس و تخليه مطفي لكن جربت أثبت فيها الكونسيلر تحت عيني بطريقة الـ baking و أعجبني شكلها و ثباتها فوق الكونسيلر.. هو بس العلبة شوي تقهر لو كانت عادية بدل هالشكل.. لكن هذا ما يمنع إن المنتج نفسه حلو و راح أستمر عليه..

المنتج الثاني هو زيت الشفايف من ماركة سيفورا Oil Infusion و هو يعتبر بديل لزيوت الشفايف من YSL اللي نزلت زمان.. فيه من هالزيت ألوان كثيرة و اللي عندي هذا حجم صغير جاني هدية من محلهم في أمريكا.. تركيبته شبه شفافة زي القلوس ما يبان اللون قوي لكن الترطيب فيها مكثف و حلو للشنطة و الدوام و المشاوير السريعة..

و بما إننا تطرقنا للشفايف.. المنتج اللي دااائما أسمع عنه في النت هو مرطب الشفايف Dior Addict Lip Glow من ديور.. متوفر منه لونين: الوردي نفس اللي عندي و فيه لون مشمشي.. بعد تجربتي له أعجبني كثير لأنه يرطب الشفايف زين و قوامه زي الروج بس شفاف في البداية و بعد دقايق يخلي الشفايف وردية صحية بدون ما يلونها بلون وردي فاقع مزعج زي الروج السحري خخ.. هو حقيقة سعره غالي و ممكن فيه بدائل أرخص فما أتوقع أشتريه قريب إذا خلص لكن باستمتع فيه و استخدمه دامه عندي لأنه فعلا ممتاز.. 

آخر منتج للشفايف هو اللي فعلا فعلا أدهشني و هو محدد شفايف من ماركة بروفوك Provoc وصلني مع مجموعة منتجات من ماركات مختلفة من Beauty Box Ltd و هذا حسابهم هنا.. المحدد هو أكثر محدد ثابت جربته في حياتي بلا مبالغة!!! قوامه كريمي أعبي فيه شفايفي كلها زي الروج و بعد دقايق ينشف و لا عاد يتحرك من مكانه لمدة ٦ ساعات تقريبا و بعدها يبدا يخف شوي من النص بشكل عادي مو مكتل.. أبهرني و الله.. و سمعت أن خبير التجميل المشهور سامر خزامي يستخدم منتجات هالماركة دايم.. أتوقع إنها ماركة لبنانية بس مو متأكدة.. و حسب علمي إنها تباع في الإمارات أو الكويت في سنتر بوينت و أسعارها حلوة.. أفكر أجرب منها درجات ثانية غير الأحمر في أقرب فرصة.. 

من المنتجات اللي دايم أشوف البلوقرز في الخليج يستخدمونه هو الكحل من ماركة Forever52.. و زي ما شفتوا في الموضوع اللي فات أخذت لونين الأسود و النيلي..و الأسود هذا زي ما هو واضح استخدمته كثييييييير.. الحلو فيه سواده الحالك و إنه جدا جدا كريمي يعني ممكن أستخدمه بفرشة أرسم فيه الكات آيز و ممكن أحط منه شوي و أموهه بفرشة صغيرة و يعطيني اللوك السموكي.. بعد شوي ينشف و يصير ثابت.. حتى سعره مو غالي يمكن ٢٥ ريال.. 

و الحين نجي لفرشة بينفت الجديدة اللي نزلت ضمن مجموعة هولا Hoola.. الشكل فخم جدا و أحسه مختلف عن اللي موجود بالسوق و الأهم من الشكل استخدام الفرشة.. صحيح هي نازلة مع منتجات البرونز بس أنا أستخدمها للبلشر و مرررررة ممتازة.. تاخذ اللون بلمسة بسيطة و توزعه و تدمجه بخفة ع الخدود.. من يوم وصلتني إلى اليوم ما أستخدم فرشة بلشر غيرها.. سعرها ١٥٠ أتوقع و قد غسلتها كم مرة و لا طاحت شعراتها.. مدري لو هي موجودة علطول و لا إصدار محدود

و البلشر اللي أستخدمه معها كثير هالفترة هو من ذا بام the Balm اسمه بنسترايب pinstripe: 

لونه مميز و يشابه لون بلشري المفضضضل sin من Nars.. موف مايل للوردي و فيه شوي بني و لمعة خفييييفة.. و طبعا ثباته بطل لأنه من ضمن مجموعة بلشراتهم الثابتة.. الحين صارت ذا بام تباع عندنا في السعودية بس العلب شينة مرة بصراحة مغيرينها بشكل بشع في نظري.. لو ما يهمك شكل التعليب خذيه من هنا.. لو يهمك مثلي أنصحك تنتظرين البلاك فرايداي و يصير خصم ٥٠٪ علي كل شي في موقعهم..

•  •  •  •  •  •  •  •  •  •  •  •

من المنتجات اللي حابتها الشهر اللي فات هي قطرات تعديل اللون الفاتحة Shade Adjusting Drops - Lightening من ذا بودي شوب.. لونها مررركزز جدا فما تحتاجين منه كثير.. قطرة منه أو قطرتين حطيها مع أي أساس غامق و يصير ملائم لبشرتك بدون ما يغير تركيبة الأساس الأصلية.. فيه بنات كمان يستخدمونه هايلايت مطفي و كمان يفتحون فيه ألوان البلشرات الكريمية بس أنا ما جربت هالطرق لسا.. و انتبهوا ترى ينخلط مع كمية أساس بسيطة لاستخدام واحد.. يعني ما تفكين علبة الأساس و تحطين منه جوا العلبة.. سعر المنتج ٩٠ ريال

المنتج اللي بعده هو برايمر Lock-it Featherweight من ماركة كات فون دي Kat Von D و وظيفة هالبرايمر الأساسية هي الترطيب غير تجهيز البشرة للمكياج و تثبيته طبعا.. اللي أحبه فيه إنه زي اللوشن خفيف مرة ما أحس فيه ع بشرتي و خالي من الزيوت و العطور و المواد الضارة زي الباربن و السولفيت.. هذي العلبة اللي عندي التصميم القديم و الحين سووا تصميم جديد شوفوه هنا.. بالنسبة لي التصميم القديم مميز و أحلى.. هههههههههه أحس في هالموضوع كلامي عن التعليب كثير :$ :$ :$

آخر منتج مكياج أحب أكلمكم عنه هو أساس ديو ستار Dior Star Foundation.. كثير أسمع مدح عنه و لما جربته حبيته.. أنا عموما ما أحب أستخدم أساس مطفي و تغطيته كاملة.. أحب الخفيف أو المتوسط و اللي شكله ع البشرة عادي مو مطفي و لا مرة يلمع.. و هذا الأساس بالضبط نفس اللي أبيه بس لأن تغطيته مايلة للكاملة أستخدم منه قليل و أطبطب باسفنجة البيوتي بليندر و النتيجة روعة.. طبعا لو تحبين تزيدين منه زيدي حسب حاجتك.. ثباته حلو و فيه حماية من الشمس بنسبة ٣٠..

•  •  •  •  •  •  •  •  •  •  •  •

نبدأ بمنتجات العناية:

أول منتج هو زيت تنظيف البشرة Clean It Silky من جيفنشي.. استخدمه لما أكون حاطة مكياج كامل و كثير و أدلك وجهي خفيف مع عيوني و رموشي و يذوب كل المكياج فيه و بعدين أحط شوي موية في يدي و أكمل تدليك و يتحول الزيت لقوام خفيف زي الحليب .. و أغسل بعدين بالموية و الغسول حقي و يختفي المكياج تمااااماااا.. حبيته لأنه خطوة وحدة للعين و الوجه سوا و ما ينشف البشرة.. و مم علبته أنيقة بصراحة هههههههه.. فعلا مدري وش فيني اليوم ع التعليب :$

و آخر ٣ منتجات لليوم هي من ماركة أوكي OKAY و أغلب منتجات هذي الماركة مليانة زيوت و معظم زيوتهم صافية و تستخدم عادي للوجه و الجسم و الشعر حسب حاجتك.. تكلمت عنها قبل في مفضلات يناير هنا.. أول منتج هو زيت شجرة الشاي الصافي .. ممتاز للحبوب يعقمها و يعالجها.. لكن صار لي فترة أخلط قليل منه مع زيت جوز الهند و أحطه ع فروة راسي.. ينقي الفروة و يعقمها و يخفف من القشرة.. بس انتبهي لو فروتك فيها جروح ممكن يحرقك شوي.. 

زيتي المفضل لشعري هو زيت جوز الهند و تكلمت عن عنايتي بشعري في موضوع كامل هنا و لقيت عندهم زيت الصبار هذا مخفف بزيت جوز هند.. تحمست للخلطة هذي و جربتها و عطتني ترطيب قوي لشعري (التالف المصبوغ).. بعد ما غسلته ما أحس شعري جاف و لا منفوش.. و صار ملمسه حلووو و نااعم.. بأعتمده دايم بإذن الله..

و آخر منتج من هالماركة هو الصابون الأسود الأفريقي.. أكيد تعرفون هالصابون منتشر من ماركات كثيرة و فيه نوع سائل منه و نوع قالب.. جربت النوع السائل من أوكي و عجبني تنظيفه القوي للجسم.. أحس لو استخدمه دايم بصير شفافة بعد فترة من كثر النظافة هههههههه.. و لأنه ينظف البشرة بعمق فهو يخليها جافة و لازم بعده كريم أو زيت أو زبدة جسم و صرت أستخدمه مرة بعد مرة.. ما عندكم فكرة  هل الصابون الأسود الأفريقي هو نفسه اللي يستخدمونه بالحمام المغربي؟ 

•  •  •  •  •  •  •  •  •  •  •  •

أشوفكم بالموضوع الجاي.. لا تنسوني من دعاكم..

PEACE