Dec 19, 2015

My Hair Care Routine عنايتي بشعري

 السلام عليكم و رحمة الله..

كثير تجيني أسئلة عن عنايتي بشعري و الأشياء اللي أستخدمهما. و بصراحة ما عندي نظام واحد بس ما أحب كثر اللخبطة والخلطات و أحاول أدور المنتجات اللي مفعولها زين واستخدامها سهل.. واليوم بشارككم المنتجات اللي أستخدمها هالفترة ومرتاحة عليهم.. و بأقسم الموضوع ثلاث أقسام: قبل الاستحمام - أثناء الاستحمام - التصفيف 

للتوضيح: شعري طويل مصبوغ فيه تجعيدات بسيطة.. بشكل عام جاف لكن الفروة دهنية.. و الشعرة نفسها رفيعة و خفيفة




قبل الاستحمام :


بالنسبة للزيوت اللي أحطها قبل الاستحمام على شعري هالفترة هي زيت جوز الهند العضوي و زيت الأركان المغربي الصافي.. 
بالنسبة لزيت جوز الهند العضوي ممكن تاخذونه من أي ماركة و يباع الحين في كل مكان تقريبا و كمان أونلاين في موقع أي هيرب و أمازون.. أحطه ع شعري و أخليه ساعتين أو ثلاث.. و مرات أخليه ع شعري الليل بطوله و إذا قمت غسلته.. مرة خفيف ع الشعر و يخلي ملمسه ناعم بعد الغسل و لاحظت إنه خفف التجعيدات يعني كأنه فرد شعري شوي ( قلت شوووووي مو تقولون أمل قالت الشعر صار حرير يهفهف خخ).. طبعا زيت جوز الهند له استخدامات كثيرة و بالتالي هو خيار ممتاز وأنصح كل بنت يكون عندها..
أما زيت الأركان (أو الأرقان) الصافي فهو متوفر بعد في كل مكان و أونلاين بعد والنوع الطبيعي ريحته مقاربة شوي لريحة زيت الزيتون.. واستخدمي له نفس استخدام زيت جوز الهند بالتمام.. قوامه شوي ثقيل بس يرطب الشعر مرررة.. ممكن يستخدم للوجه و الجسم كمان..
و إذا كنت مستعجلة مرة أو جتني طلعة بسرعة و ما فيه وقت للزيت أستخدم مايونيز الشعر من فاتيكا.. طريقة استخدامه تبللين شعرك بالحمام قبل الاستحمام و تحطينه خمس دقايق و بعدين تغسلينه بالموية و تكملين بالشامبو و البلسم كالعادة.. هو طبعا ما رح يعطي مفعول قوي زي الزيوت لكنه حل سريع و يفك أزمة





أثناء الاستحمام: 


بالنسبة للشامبو و البلسم صار لي شهرين تقريبا مستمتعة جدددددا بهالمجموعة من حمام الهنا بزيت الأرقان و ريحة المسك الأبيض المصري.. من زماااان ما جربت شي يخلي شعري حلو و سهل التسريح و التصفيف.. هم عبارة عن شامبو و قناع و ريحتهم منعشة مرررة و تثبت في الشعر بعد الاستحمام.. موجودة منتجات حمام الهنا في فروع مركز العناية بالشعر و البشرة.. ما عندي فكرة عن الأسعار لأنها جتني هدية منهم.. بس إن شاء الله راح أرجع اشتريهم بإذن الله..



التصفيف:


شخصيا أحب أسوي شعري بالفير دايم و أول شي أسويه بعد الفير هو إني أحط سيروم أو زيت خفيف على منتصف و أطراف الشعر عشان يعطي اللفلفة لمعة و حيوية و ما تنفش و أستخدم لهالغرض هذي المنتجات: سيروم العنب من ذا بودي شوب حلو و اقتصادي هالعلبة عندي من سنين و للحين ما خربت و لا خلصت ما شاء الله لأن تركيبة المنتج نفسها ثقيلة يعني ما تحتاجين منه كثير أبدا لأنك لو كثرتي راح يخلي الشعر مدهن.. المنتج الثاني هو شمع بزبدة الشيا للشعر المجعد أخذتها من سوبرماركت هول فوودز بأمريكا.. قوامها صلب زي ما تشوفون بس إذا أخذت منها شوي بيدي تذوب و تصير زي الزيت و أحب أخذها معي في الدوام و السفر لأني ما أخاف تنكب و تحوس الدنيا علي.. و المنتج الأخير اللي اكتشفته الشهر اللي فات هو زيت من تريزمي و أعجبني كثييير و الله.. هو صحيح زيت بس خفيف مرررة كأنه موية صرت أستعمله ع شعري دايم مو بس بعد الفير.. يعطي لمعة حلوة و ما يدبق ع الشعر  



من المنتجات اللي ما استغني عنها للحماية من الحرارة هو بخاخ تريزمي.. كان مقطوع من السعودية قبل كم سنة و الحين رجع الحمدلله و موجود في السوبرماركتات الكبار.. هو طبعا ما يمنع ضرر الأجهزة الحارة لكن يخفف منها شوي و هالشي اللي لاحظته من تجربتي..
 المنتج اللي بعده رغوة قبل الفير من ويلا (مرسوم فير ع العلبة) أستخدمها قبل الفير طبعا خخ.. أحط منها قلييييل ع كل خصلة قبل اللف مباشرة.. يعني ما أحط ع كل الشعر مرة وحدة.. لا!! خصلة خصلة.. و هذي الرغوة تخلي اللفلفات ثابتة مدة أطول مثلا لو عندك مناسبة أو يوم مهم.. 



و أفضل بخاخ مثبت للشعر جربته هو هذا من قارنييه.. اللي أعجبني فيه إنه يثبت التصفيفة أو التسريحة بدون ما يخلي الشعر قاسي مرة.. أنا بصراحة شريته من أمريكا مدري موجود هنا و لا لا.. 
بعده الشامبو الجاف من تريزمي.. جربت كثير بس هذا حبيته أكثر لأنه يمتص الدهون في الفروة و كمان يعطي حجم للشعر من فوق.. و بما إننا فتحنا موضوع الشامبو الجاف راح أشرح فكرته بشكل مختصر: هو بخاخ بودرة ما يغني عن تنظيف الشعر بالشامبو السايل و الموية.. لكنه حل مفيد جدا و سريع للناس اللي جذور شعرها دهنية مثلي.. لأنه مو معقول راح أغسل شعري كل يوم أكثر من مرة عشان تروح الدهون و يبان شكلي منتعش!! موجود بكذا ماركة بس حاليا هذا النوع المفضل عندي.. 
أخيرا بخاخ مثبت الشعر من ماركة "لي ستافورد" موجودة في صيدليات النهدي.. جربت كل شيء من هالماركة تقريبا و ما عندهم شي مميز مرة في نظري.. لكن أحب بخاخات التثبيت حقتهم و خصوصا إن فيه منهم أحجام صغيرة.. هذا البخاخ المثبت مثلا أحبه لأنه صغير جدا أقدر أخذه معي بالدوام و السفر و كمان شكله حلو ما أخفيكم خخ..


و بس هذي المنتجات اللي معتمدتها الشهور الماضية و حابة نتايجهم ع شعري.. و قبل كم يوم اشتريت زيوت جديدة و شوي منتجات بس لسا ما جربتهم كفاية عشان أكوّن عنهم رأي واضح.. أما بالنسبة للأجهزة اللي أستخدمها للتصفيف راح أتكلم عنها قريب بإذن الله..

شاركوني منتجاتكم المفضلة للشعر في التعليقات تحت..
و لا تنسوني من دعاكم

PEACE

9 comments:

  1. احب مواضيع العناية بالشعر .. شكرا امل

    ReplyDelete
  2. يعطيك العافية وشاكرة لك ترتيبك وتقسيمك للعناية حبيته
    يساعد كثير نحدد وش تحتاج الوحدة من منتجات
    ومن المنتجات اللي استخدمها مثلك بس شركات مختلفة
    زيت جوز الهند ومثل ماقلتي ضروري يكون عند كل بنت، وكل ماقريت عن استخداماته ماتخلص حق كل شيء صراحة، وزيت الأرقان نفس الشيء للأطراف وللشعر شوي منه يعطي نتيجة حلوة

    ReplyDelete
    Replies
    1. فعلا زيت جوز الهند مدري كيف عشت سنين بدون ما أعرفه!!!

      Delete
  3. يعطيج العافية
    حبيت هالتدوينه و الأكيد استفدت

    ReplyDelete
    Replies
    1. يا زينك..()
      الله يعافيك

      Delete