Mini Burberry Haul \ Review

السلام عليكم و رحمة الله و بركاته 

كيف حالكم؟

اليوم حبيت أشارككم مشتريات بسيطة من ماركة بربري.. 

ماركة بربري أحبها كثييير من الصغر و دايم يجذبني السموكي البني الناعم اللي يحطونه عارضاتهم في الإعلانات المطبوعة و المرئية.. و اشتريت منها زمااااان بودرة برونز للحين عندي ممتازة و ريحتها تجنن.. و اشتريت منها ثلاث منتجات بأوريكم إياها مع تقرير بسيط عنهم.. طبعا تصوير العلب كان صعب شوي علي لأنها تلمع زي المراية و تعكس صورتي ههههههههههه.. فاضطريت أصورها و هي مفتوحة.. علب بربري بالعادة لونها فضي غامق لكن أحيانا ينزلون إصدار ذهبي خاص بالمناسبات

نبدأ بالبرايمر.. اسمه Fresh Glow luminous fluid base و فيه منه درجتين.. درجة فاتحة مثل اللي عندي و اسمها Nude Radiance no.01 و فيه درجة غامقة برونز.. هذا البرايمر بلا مبالغة كل بلوقر أو يوتيوبر بريطانية عندها إياه و يمدحونه.. و دايم تقييمه عالي في المواقع و لما قريت إن ثاني مكون فيه الجليسرين علطول تحمست و شريته لأن الجليسرين معروف بترطيبه القوي للبشرة و كمان يساعد ع ثبات المكياج.. البرايمر هذا هدفه الأول يعطي إضاءة و لمعة لوجهك و لونه شبه شفاف مع شيمر خفيف و فيه قليتر ذهبي صغييييييير مرررة يختفي لما تحطين الأساس بعده.. استخدمته كم مرة قبل الأساس و خلاه يندمج و يتوزع بشكل حلو و يثبت مدة أطول و بعد ما خلصت مكياجي كله لاحظت إنه فعلا يعطي تنوير و لمعة صحية.. مناسب لجميع البشرات في نظري و خصوصا للي بشراتهم جافة و تبي شيء يعطي طلتها حياة و نور.. بس أبدا ما يغني عن الترطيب العادي قبل المكياج!! و زي ما تشوفون هذي العلبة إصدار خاص بلون ذهبي.. شكل العلبة الأساسي مع التقييمات تلاقونه في هالرابط من موقع سيفورا

المنتج الثاني هو بودرة إضاءة اسمها Fresh Glow luminous highlighting powder و برضو فيه منها درجتين.. أنصحكم تاخذون الدرجة الغامقة مثل حقتي لأن الفاتحة تميل للبياض و قوامها يتكتل كأنه طباشير!! الدرجة اللي عندي اسمها Golden Radiance no.02 لونها ترى مو غامق كثير بس جدددا غريب!! ما عندي إضاءة مثلها أبدا.. لونها برونز فاتح بس التون حقه بارد.. و لأن الدرجة هذي غريبة فعلا لقيت صعوبة في البداية كيف أحطها بس بعد تجارب عديدة لقيت الطريقة الصح لاستخدامها و وقعت في الغرام!! أول شيء لا تحطون كمية كبيرة منها عشان ما يبان لونها رمادي ملطخ.. خذوا قليل بالفرشة و وزعوا بخفة ع الأماكن اللي تبونها تبرز و تلمع بالوجه مثل عظمة الخد و طرف الأنف و فوق الشفايف و هكذا.. و الشيء الثاني لازم تستخدمون فرشة مروحية fan brush أو أي فرشة تكون شعراتها خفيفة و منفوشة عشان توزعه بشكل بسيط و ما تخلي اللون متركز في مكان واحد.. إذا سويتوا هالخطوتين أضمن لكم لمعة عجيييبة زي جينفر لوبيز!! فيه شي مهم لازم أقوله.. البودرة هذي معطرة و ريحتها تجنننن و ما سببت لي مشاكل الحمدلله بس البشرات الحساسة مرة ما أتوقع تناسبهم..و طبعا لو اشتريتوها راح تجي معها جيب مخمل و فرشة زي أغلب الماركات الراقية خخ 

آخر منتج اشتريته هو هذا الظل.. قبل ما أشتري هالدرجة كنت في حيييرة شديدة.. أبي أشتري لون واحد بس من بربري يكون حلو و استخدمه كثير و في الأخير استقريت على هذا اللون البني الغامق المطفي اسمه Dark Sable no.23.. و فعلا كان قراري صحيح خخ.. اللون ممتاز جدا لكسرة العين و للمكياج السموكي و كمان لونه مناسب لتعبئة الحواجب!! قوامه ناعم و تركيز اللون قوي مرة.. و على فكرة أنا أستخدم هالظل من الجزء اليسار فوق عشان النقشة الحلوة ما تروح خخ.. فيه لونين كمان مشهورين من ظلالهم Rosewood و Pale Barley.. شفتهم ع الطبيعة و أعجبوني و الله بس عندي يشبه لهم كثير و تركتهم بس قلت أعطيكم خبر لو تبون اقتراحات و كذا :$

و هذي السواتشات :

و بس يا حبايبي.. يا رب أعجبكم الموضوع و لا تنسوني من دعاكم

PEACE