My Favorite Powders بودراتي المفضلة

السلام عليكم و رحمة الله..

كيف حالكم؟

 اليوم بأكلمكم عن بودراتي المفضلة.. بس قبل أبتدي أحب أعطيكم فكرة عن نوعية بشرتي و ليش استخدم البودرة بشكل عام..

بشرتي مختلطة لعادية.. مرات تصير شوي جافة بس في الغالب مختلطة.. و ما كنت أستخدم أي بودرة في تثبيت الأساس لسببين: أولا أنا أكررررررره الشكل المتكتل و الطبقات فوق وجهي.. يعني كان أهون علي يروح الأساس و يسيح و يختفي بس أهم شي ما يكون وجهي ملطخ (أو زي ما يسمونه cake face) بالإنجليزي.. و ثانيًا إن اللوك المطفي ما كان يعجبني أبددددا.. يعني دايم أحب وجهي يلمع خخ.. 

لكن بعد ما تعمقت في مجال المكياج صرت أحب اللوك المطفي للبشرة بين فترة و الثانية.. و كمان لقيت بودرات خفيفة في قوامها و ما تسوي طبقة سميكة و متكتلة ع الوجه.. و أقدر أقول الحين إني دخلت عالم البودرات و وقعت في الغرام!!

و هذي بالصورة هي أفضل البودرات اللي جربتها.. يالله نشوف التفاصيل:

ع اليمين بالت كونتور من ماركة أسترالس.. سويت عنه تقرير قبل فترة لو حابين تشوفونه كامل اضغطوا هنا.. استخدم منه درجتين كبودرة لتثبيت الأساس و الكونسيلر و يعطي تغطية خفييييفة كمان.. ملائم جدًا للسفر لأنه جامع كذا منتج بعلبة وحدة..

المنتج اللي بعده هو بودرة من بينفت اسمها Agent Zero Shine

بصراحة التعليب ما أعجبني.. الفرشة الموجودة تحت في العلبة صغيرة و خشنة شوي و صعب ترجعيها في مكانها بدون ما تنفش و تخرب!! يعني ليتهم سووا العلبة بشكل عادي.. لكن هذا ما يمنع إنها كمنتج في حد ذاتها ممتازة مررة و أعجبتني من أول استخدام.. باختصار هي بودرة شفافة و هدفها الوحيد فقط هو تثبيت الأساس بشكل مطفي و خالي من اللمعة.. قوامها خفيييييف مررررة يعني مهما تحطين منها ع وجهك مستحيل تلطخ و تكتل.. بينفت أرسلوها لي بالغلط مرتين و كانت من أحلى الغلطات هههههه.. الحمدلله ما رح أشيل هم اشتريها لفترة من الزمن.. شكرا بينفت :$ :$ 

نجي الحين للمشهورة و معشوقة الجميع بودرة البنانا من ماركة بين ناي..Ben Nye.. أنا عندي العلبة الصغيرة و خلوني أقول لكم شي عنها.. لو استخدامك شخصي يعني لك لوحدك اشتري الصغيرة و راح تعيش معاك عمرررر!! العلب الكبيرة منها تناسب خبيرات التجميل أو إذا فيه أحد بيستخدمها معاك مثلا خواتك أو أمك.. قبل أشتريها كنت أشوفها بالنت و أحسب لونها أصفففرر أصصففرر لكن ع الطبيعة ماهي كذا أبدًا.. بالعكس لونها بيج شبه شفاف و مايل قلييييل للأصفر.. أستخدمها ع وجهي كله بعد الأساس أو البيبي كريم عادي و خصوصا لو كنت مرهقة يومها أو بشرتي تعبانة و محتاجة شوي حياة.. فيه بنات قالوا لي بشراتهم بيضااااء و فااااتحة و طلعت عليهم البنانا صفراء مرة فـ حبيت أعطيكم خبر.. لكن زي ما قلت لكم ما أشوفها صفراء أبدا و متأكدة إن اللي عندي أصلية لأني شريتها من الأيماتس بأمريكا..

و أخيرا بودرة أساس إربن ديكاي.. فكرتها إنك ممكن تستخدمينها جافة لتثبيت الأساس و تعطي تغطية بسيطة مرة.. و ممكن تستخدم رطبة لتغطية أقوى.. أنا أستخدمها جافة عشان تزيد تغطية أساسي شوي و تثبته.. و طبعا حبيتها لأنها خفيييفة ما تكتل ع وجهي.. 

و زي ما شفتوا كلهم ما يعطون تغطية كبيرة لأني حاليا أعتمد ع الأساس و الكونسيلر في التغطية و توحيد اللون.. 
و أستخدم البودرات بكمية متعدلة بفرشة منفوشة و كبيرة.. أو بالبيوتي بليندر الرطبة بالطبطبة..

 و بس يا جماعة!

إيه نسيت أقول لكم إني استخدمت بودرة ميك أب فور إيفر البيضاء الشفافة و كانت جدا سيئة تخلي وجهي رمادي!! بالتالي صرفت نظر للأبد عن أي بودرة لونها أبيض شفاف خخ.. 

لو عندكم بودرة مفضلة تنصحوني فيها اكتبوا لي اسمها في التعليقات تحت.. أنا حابة أجرب بودرة ريمل الشفافة و نفسي بعد أجرب لورا مارسييه و بير مينيرالز.. 

لا تنسوني من دعاكم 

PEACE