Apr 27, 2013

مفضلات أبريل April Favorites

السلام عليكم..

اليوم راح أحكي لكم عن الأشياء اللي حبيتها كثير و استخدمتها بحب طول شهر أبريل..
نبدأ هالمرة بالعناية و بعدين المكياج


فرشة أسنان من سنسوداين.. أنا كنت قبل أستخدم فرشة أسنان من أورال بي.. فيها زي المطاط و متطورة ببطارية و زحمة.. و كانت بصراحة خشنة أحس و تجرح لثتي..
رحت للصيدلية أدور شي ماهو معقد .. شي بسيط.. لقيت هذي و مكتوب عليها سوفت.. شريتها و مرررررررة حبيتها.. أحس ما عاد تتجرح اللثة لأنها ناعمة .. و تنظف الأسنان تمام.. سعرها حدود 15 من أي صيدلية.. اللي عندي مثل ما قلت لكم  soft
خذيت اللون الموف حسيته منعش و بناتي.. مع إن الأزرق كان أحلى بس يذكرني بالفرشة الخشنة اللي كانت قبل عندي ههههه

.     .     .     .     .
 
تونر موية الورد من ماركة بوتانكس اللي تنباع في صيدليات بووتس.. سعره ما أذكر حقيقة بكم بس مو غالي ممكن أقل من 30 ريال.. الحلو في الماركة هذي إن منتجاتها أغلبها طبيعية و صحية للبشرة و ما فيها مواد ضارة بالقدر الموجود في غيرها..
التونر هذا أحطه بقطنة بعد ما أنظف وجهي.. يشيل باقي الأوساخ و المكياج.. و يسكر المسامات.. و بعده أحط المرطب

.     .     .     .     .

نجي للكريم البرتقالي تحت .. هذا المشهور و المعروف من ماركة إليزابيث آردن اسمه آيت أور كريم.. من المنتجات اللي لازم تكون عند أي بنت بصراحة.. هالعلبة القزاز إصدار خاص.. بالعادة تلاقونها في أنبوب أبيض
هذا الكريم قوامه مثل الفازلين بس أخف شوي .. و بدون عطر..
بالتالي ريحته شيييينة مرة خخ.. أنا عني تعودت عليها و صارت عادي عندي.. بالعكس أحبها مرات تحسسني بالترطيب هههههه.. مشكلة الريحة الكل يشتكي منها بالبداية بس بعدين يتعودون.. يعني لا تشيلون هم الريحة..
من استخداماته :
 
-ترطيب الشفايف و الأكواع و الركب..
-ممكن تخففينه بلوشن و ينحط ع الجسم
-و ممكن ينحط ع الكتوف و اليدين و الرجلين لحاله يعطي لمعة
-ينحط فوق أي روج مثل القلوس
-ناس تحطه ع الرموش يعطي لوك لامع و يغذي الرموش
-و ممكن ينحط ع الالتهابات و الحروق بشكل خفيف
-ممكن ينحط هايلايت ع الخدود خفيف إذا ما بتحطين أساس
-ممكن ينحط فوق العين يعطي لوك العين الغرقانة خخ
و أنا أستخدمه بعد لوجهي مثل كريم الليل في الجفاف أو ع المناطق الجافة اللي تتقشر مثل الأنف و حول الشفايف.. و أحطه يوميا ع الشفايف قبل النوم..

.     .     .     .     .
 
اللي بعده زيت جوزي مارن..  هذا جاء حجم صغير سامبل
سمعت عنه كثيييييير للشعر و للبشرة.. بس قلت بلاش أضيعه ع شعري و هو غالي و حجمه صغير خخ.. صرت أستخدمه مرطب على كل وجهي قبل أنام.. و على بشرة نظيفة.. لاحظت بشرتي صفت شوي و صارت أنعم الصباح.. حبيته و راح أستمر عليه يمكن ألاقي له مفعول أقوى بعد مدة أطول ..

.     .     .     .     .

آخر شي كريم لوكستان لليدين بالورد.. ترطيبه خفيف و ريحته زينة
مو ثقيل و يصلح تحطينه في النهار تمتصه البشرة بسرعة بحيث تقدرين تمارسين حياتك عادي من دون ما تحسين بثقل و قرف خخ..


نجي للميك أب :

 
 
هالفترة رجعت أستخدم كثير بلشر نيكس تيراكوتا.. لونه برونز على وردي و فيه شيمر خفيف يغني عن الهايلايت و يخلي الخدود لماعة و جميلة خخ..
 و لأني ما عاد أحط ظلال في تحدي الشهر .. صرت أستخدم الأرواج الفاقعة و الملونة كثير و هذا يناسب و يهدي اللوك شوي خخ.. سعره 25 ريال تقريبا

.     .    .    .    .
 
و رجعت أستخدم البلشر الكريمي من نكس برضو اسمه روز بيتال..
لونه طبيعي جددددددا.. و خصوصا للبشرات السمراء و الوسط .. مرات أحطه طبطبة ع الشفايف بعد يعطي لون نود مطفي جميل..

.     .     .    .     .
 
هايلايتر ماري لو منايزر من ذا بالم.. هذا قصته قصة خخ
شريته أول ما طلع قبل رمضان السنة اللي فاتت.. و مرة نسيته بصراحة مدري ليش
و فجججججأأأأأة انشهر بشششكل..!! و شهرته ذكرتني إني شاريته و رجعت أستخدمه..
عندي هايلايترات و إضاءات كثيرة.. هالشهر حبيت هذا و استخدمته كثير
بس انتبهوا ترا اللون مرة قوي فيه.. انتبهوا تعبون الفرشة مرة وحدة منه
الحلو فيه يصلح ظل و لزاوية العين الداخلية و تحت الحاجب.. خذيته من صيدلية برا المملكة بسعر رخيص 90 ريال تقريبا.. مو زي الفحش اللي هنا في التاجرات الله يهديهن بس

.     .      .     .     .
 
هالشهر زي ما قلت لكم مو كثير أستخدم نود ع شفايفي.. بس هذا الوحيد اللي كنت أستخدمه إذا بغيت و حنيت للنود خخ..
(النود = روج مشابه للون الجلد بين البيج و الوردي و البني)
هو عينة من قيرلان من مجموعة  Kiss Kiss و اسمه 569 Rose Entetant
لونه مايل ع وردي شوي.. وفيه فروست أو شيمر خفيف فضي بس يحلي الشفايف و يبينها كبار و مليانين.. :$ :$
لقيت له سواتش في بوست أجنبي هنا

.      .       .      .     .
 
اللي بعده مسكرة ذي آر ريل من بينفت.. كثير نصحوني فيها البنات و سمعت عنها في اليوتيوب كثير.. حبيتها كثيييير.. بصراحة أنا ما أستخدم عاقصة الرموش.. تخوفني و قد قصت رموشي مرة خخ ..و ما أحس أحتاجها الحمدلله رموشي مو نازلة
لكن مع هالمسكرة رموشي بانت ملفوفة مرة كأني مستخدمة عاقصة..!!!!
و عطتني كثافة حلوة و ما تسيح.. عيبها الوحيد شوي تنظيفها صعب بس ما فيه شي يعجز عنه البايوديرما خخ

.      .      .     .     .
 
مسكرة بوبا الشفافة.. فرشتها صغيرة و هي مخصصة للحواجب تثبتها مكانها
أستخدمها بعد ما أعبي حواجبي بأي ظل بني بارد.. و يثبت الحاجب و لا يخليه يخرب مع الغطوة و الحر.. مرة ممتاز و علبته كيوت :$ :$


.     .     .     .     .

 
آخر شي و لأني زي ما قلت كثير أستخدم الأرواج الفاقعة هالشهر.. صرت أستخدم كحل بني من ميبلين.. و على فكرة هالكحل بررررررييييييء من إشاعاتكم عن جفافه بالعلبة خخ.. هذا البني عندي من سنة و شوي و لسا زي أول ما شريته ..
ممكن ما تسكرون العلبة زين أو تخلونه مفتوح مدة طويلة.. مدري عنكم خخ
طبعا لونه بني الكحل معه قليتر خفيف بس ما يبان ع الجفن.. ثابت طبعا مثل الأسود
و مخططة أشتري الأزرق و البنفسجي منه بعد!! سعره حدود 40 ريال
و أستخدمه مع فرشتي المفضلة للكحل و هي سيقما إي 05
 
.     .     .     .     .

و بس.. :$
أشوفكم قريب إن شاء الله
تحبون نسوي أسبوع كل يوم بوستات عن المسكرات بس؟!
ردوا لي هنا أو ع تويتر..
و لا تنسوون تتابعوني هنا عشان لو وصلت لـ 500 متابعة راح أسوي قيف أواي كبير إن شاء الله :)
 
peace

6 comments:

  1. حبيت مفضلاتك مره حمستيني لمويه الورد وبلشر نيكس
    تسلم دياتكم ويعطيك العافيه يا جميله

    ReplyDelete
  2. انتي روووعه ..استفدت كثير كثير الله يسعدك
    ياليت لو تتكلمين عن الحواجب للي مايحب يشقر وعاوز يرتب شكها
    بالميك اب كويس ..
    واذا عندك مودل اشرحي عليها وبس ياعسسسل.

    ReplyDelete
    Replies
    1. وانا كماان ودي فهالشي انا مااشقر وودي بافضل طريقه وتتكلموا كمان عن ماسكرا الحواجب وكذا :) وربي لادعي للي تفيدني :**
      ياليت تنبهوني عالتويتر @rem99_

      Delete
  3. من وين شريتي زيت جوزي مارن متوفر بسيفورا أللي عندنا ولا طالبته من موقعهم ؟ أبيه :(

    ReplyDelete
  4. احببببببب مدونتك بشكل!!
    تتخيلين اني اشيك كل يوم اذا دونتي جديد او لأ؟

    متابعة لك دوم
    الله يوفقك :*

    ReplyDelete
  5. ياحبي لك ترتر
    اتابعك مت قبل البلوق ايام الاقلاع
    تصويرك روووعه احب احتفظ بااصور ااي تصورينها
    كان عندك حساب بالفليكر ممكن تحطين الرابط حبيبتي
    الي من اليزابيث اردن من زمان وانتي تمدحينه وتحطينه بمفضلاتك تحمست له مرررة ان شاء الله باشتريه
    ♥♥

    ReplyDelete