البشرة الصافية تبدأ مع كلاريسونيك ميا 2

مرحبا..

الحكي طويييل اليوم.. يبي له روقان.. روحي جيبي شاهي و لا شيبس و تعالي خخ..

كنت زمان أشوف اليوتيوبرز مرة طايحين في الكلاريسونيك ميا..

و إنها أحدثت فرق كبير في بشرتهم.. كنت أفكر و أقول في نفسي : هي كلها فرشة تدور..!!

و رحت اشتريت فرشة من ذا بودي شوب و صرت أستخدمها بحركة دائرية

جابت نتيجة حلوة و كنت مقتنعة فيها و حياتي سعيدة.. بلا صرف و طلب من النت و شحن خخ

بعدين طلبتها أختي من النت و انببببههررررررت هي منها كثييير

قالت أمل لاااازم تجربينها.. و الله تنظف البشرة من جد أكثر من أي شيء ثاني

بس مو كثير تحمست لها بصراحة..

لين جت مرة و قالوا لي أخواني بيطلبون من نوردسترم

فكرت أطلب كلاريسونيك ميا 2.. لأن معها عرض راس فرشة ثاني و معها شنطة و شوي غسول للوجه..

اخترت اللون البرتقالي وقتها قلت شي يفرفش و ينعش.. ليتني خذيت لون ثاني راكد خخ.. ما علينا ..

المهم وصلت الكلاريسونيك ميا أخيرا.. هالحكي من 6 شهور ممكن أو أكثر شوي..

و جربتها.. ياااااااااااه حسيت وجهي تنفس من جد.. حسيته مسكين عمره ما صار نظيف كذا خخ

و خصوصا بالغسول اللي جاء معها.. بطل بطططل.. (للأسف خلص و رميته)

صرت أستخدمها يوميا في الليل مع أي غسول للوجه أو منظف حليبي..
 أنظف فيه مكياج الوجه و أحس بالنعومة

و أحط أي مرطب بعدها .. و حسيت بشرتي صارت أصفى و أحسن

حتى المكياج بعدين لما أحطه ع وجهي يبان مندمج أكثر لأن بشرتي صافية بسببها..

الجهاز فيه سرعتين .. أنا ما أحس فيهم فرق كثير بينهم..

و فيه له كذا راس و كذا نوع تنباع لحالهم في كذا موقع و في فروع سيفورا خارج السعودية

 فكرته إنك تستخدمينها 20 ثانية ع الجبهة

و 20 ثانية ع الأنف و الذقن

و 10 ثواني لكل خد.. يعني 20 للخدين..

طيب تعقيد صح..؟ لا .. الحلو فيها إنها تحسب لك الثواني..

بمجرد ما تشغلينه يبدا يحسب لك عن طريق الاهتزاز 20 - 20 - 10 - 10 ثانية

يعني الشغلة كلها دقيقة وحدة مع الكلاراسونيك..
راح تفهمون أكثر هالنقطة و كيف تحسب لك الثواني لما تجربونها

إضافة لكل اللي فات.. إنها ضد الموية و بدون سلك أثناء الاستخدام..

يعني تستخدمينها و أنت تتروشين و لو جاها موية عادي جدا..!!
واتربروف

أصلا إذا استخدمتيها و خلصتي.. تغسلينها بموية .. ما يضرها هالشي أبد..

يجي معها شاحن باللمس.. تشحن كذا ساعة .. و بعدين تستخدمينه بدون الشاحن زي ما قلت قبل

و تبقى الكلاريسونيك مشحونة مدة أسبوعين تقريبا إذا استخدمتيها مرة وحدة في الليل ..

و الحين صاروا يبيعونها في فروعنا بسيفورا الحمدلله بحدود ٧٥٠ ريال تقريبا

ممم.. وش بعد..!! بس هذا كل شي في بالي عنها..

إذا عندكم أي سؤال تفضلوا هنا

و سووا لي فولوا في المدونة و ع تويتر و إنستغرام : terter_thinks..

و شاركوا الرابط مع صحباتكم و أخواتكم..

و انتظروني بكرة في ريفيو عن فرشة راح تغيّر حياتكم..

()