My Trusted Skin Care Products!

السلام عليكم

 

 

 

 

 

 

اليوم حبيت أكلمكم عن منتجات أستخدمها كثير في العناية اليومية بالنسبة لي
أستخدم غيرها بين فترة و الثانية.. بس كثير أرجع لها لأني مرتاحة عليهم الحمدلله
أحب أخبركم قبل أبدأ إن بشرتي مختلطة إلى دهنية :)

 

1- منظف بايوديرما للعين و الوجه :
هذا قصة عشق مالها نهاية..!! شوفوا باقي فيها قليل مرة
و هذي ممكن العلبة 10 اللي أستخدمها
الحلو فيه حاجتين.. أولا  ينفع منظف و مزيل مكياج سايل مرة و نقي مثل الموية و ما يتعب العين ..كذا مرة دخل في عيني بالغلط و لا صار لي شي.. بس لا تحطونه في عينكم ههههههههه
و الشي الثاني ينفع للكسولات لأنه مو لازم تغسلين وجهك بموية أو غسول بعده
و يمكن هذا أكثر شي حببني فيه .. نهاية اليوم أكون مرهقة و أبي أخلص من التنظيف بسرعة..

فيه بنات يشتكون و يقولون إنه ما ينظف..!! بالعكس بس هو له طريقة معينة
جيبي قطنة من النوع الزين الناعم و حطي فيها منه و كثري شوي.. و حطي القطنة على عينك و خليها شوي قبل ما تمسحين عشان يذوب المكياج في المنظف..

و تنظيف  الوجه سهل ما يحتاج تخلينها شوي مثل العين..

سعره حدود 80 ريال و يقعد معاك من شهر إلى شهرين حسب احتياجك
موجود في الصيدليات كلها الحين.. و مرات يكون عليه عروض

 

 

2- تونر الورد من بوتانكس و هي ماركة تنباع في صيدليات بووتس..
اللي يعجبني إنه أورقانيك و خفيييف..ينظف مسامات بشرتي و يسكرها و ينعش الوجه
و يخفف الدهون لفترة من اليوم .. العلبة الحين الظاهر تغير شكلها بس الاسم نفسه
أستخدمه بعد المنظف أو بعد الاستحمام ع وجهي و قبل ا أحط المرطب..

 

 

3- زيت جوزي مارين .. هالزيت يستخدم لجميع أجزاء الجسم و منها الوجه و الشعر
قوامه زيتي خفيف مو ثقيل مرة.. و أستخدمه بكمية قليلة لوجهي في الليل قبل النوم
يرطبه و يخليه ناعم و إذا قمت الصباح تكون البشرة امتصته خلاص..
في اليوتيوب يحطونه ع أطراف الشعر بعد.. مدري كم سعره بالضبط
و ينباع ع النت .. حقي خذيته من سيفورا فرع أمريكي

 

 

4- سيروم بالسيويد للمسامات من ذا بودي شوب.. بالنسبة لبودي شوب دايم أدخل
الموقع الأمريكي و أقرا آراء الناس عن المنتجات قبل أشتريها و يفيدني هالشي كثير
و هالسيروم لقيتهم يمدحونه كثيييير و اشتريته.. أحب أحطه ع الأماكن اللي فيها مسامات عندي : الأنف و الخدود و بين الحاجب و الذقن و أدلك شوي لين تمتصه البشرة.. و بعده أحط المرطب العادي.. و ممكن ينحط قبل المكياج كمان
قوامه خفيف مرة و بارد.. أول أسبوع ما حسيت بنتيجة بصراحة و جاني إحباط
بعد كذا لاحظت إنه المسامات صغرت شوي (ما تختفي عموما المسامات)

و صار شكلها أحسن
أخذته في الخصم و أتوقع للحين عليه خصم..

سعره قبل حدود 80 ريال بس في الخصم تقريبا 60
مو متأكدة بس حلو مرة و علبته كيوت خخ

 

 

5- مهما أجرب مرطبات شفايف في الكون مثل هذا ما فيييييه.. لا لا أرجوكم ما فيه خخ
اسمه كارمكس و الشركة عندها كذا نوع بس هذا النوع أفضل اللي جربته و بدون نكهة
الحلو فيه إنه يعالج الشفايف بسرررعة.. يعني لو شفايفك مقطعة و ناشفة و تبين حل سريع هذا هو..!! بعد دقايق تلاحظون الشفايف نااااعمة.. و اللي يحببني فيه أكثر هو حماية من الشمس بنسبة 15.. يعطي شعور حلو للشفايف زي النعناع كذا يعجبني..
سعره حدود 4 دولار خذيته من برا.. ينباع ع النت في أمازون و أسوس
و سمعت بنات يقولون ينباع في التميمي.. أي تميمي و أي مدنية ما أدري ههههه

 

 

6- كريم للعين من بوتس للبشرة الحساسة.. كريم ماهو معقد و لا فيه شغل كثير
مرطب لمنطقة العين مو أكثر.. أحب بساطته و تمتصه البشرة بسرعة
أحطه الصباح و قبل المكياج و في الليل قبل النوم.. و في أي وقت أحسني محتاجة ترطيب.. ينباع زي ما قلت في بووتس و سعره مو غالي حدود 30 أو 40 ريال

 

 

7- بيوتي فلاش بام من كلارنس .. هذا المنتج غريب و معقد في تركيبته بس مفعوله ممتااااز..عرفته من أختي كانت تمدحه لبشرتها الجافة و لما قريت عنه لقيته ينفع لباقي البشرات.. هو مرطب - يعطي نضارة و منظر صحي للبشرة - برايمر - قناع
ماهو أساس..!!! لا ..!!!عشان أكون واضحة من البداية خخ
طريقته تحطين نقط صغيرة ع الوجه كله و بعدين طبطبي طبطبة..
أبدا لا تفركين.. لأن مركباته الكيميائية تتفكك و ما عاد يعطي مفعول
و راح تلاحظين إنه إذا كثرتي و فركتيه ع وجهك راح يتفتت معاك
مو الكل يعجبه تأثير هالمنتج خصوصا الناس اللي تحب تشوف التغيير الواضح مرة
هو يخلي بشرتك صحية مرة و فيها نضارة و لمعه خفيفة و إذا حطيتوه قبل المكياج
يخلي الأساس و البلشر حلو و يثبته و الأهم من هذا ملمس بشرتك جدا رطب و ناعم..
أحب أحطه أول شي في الصباح و ع بال ألبس و أتجهز للشغل أرجع و أكمل مكياج..
سعره حدود 200 ريال.. بس ما تحتاجين كمية كبيرة منه و راح يطول معاك
اكتبوا في قوقل و شوفوا الحكي عنه.. و كفاية ليزا إيلدرج تعتبره من منتجاتها المفضلة

:$ :$

8- إليزابيث آردن آيت أور كريم.. و الله مستحية منكم يا جماعة ههههههه
مو أول مرة أتكلم عنه.. و عشان ما أكرر الحكي تفضلوا هنا و إقروا عنه أكثر..
و على فكرة العلبة القزاز هذي إصدار خاص و خلص.. الحين ينباع
في أنبوب عصار أبيض

هالأشياء غالبا ثابتة عندي ..
بالنسبة للمرطب اليومي و الواقي و كذا هذي كثير أغيرهم و أجرب
ما أقدر أعطيكم خيارات واضحة في هالشغلتين..

و بس..

 

أشوفكم وقت ثاني إن شاء الله
لا تنسون تتابعوني ع تويتر @TaRaNeeM
أو ع الانستقرام @terter_thinks

See Ya