BB creams \ tinted moisturizers (PART1\3)

السلام عليكم..

اليوم راح أبدا سلسلة لبنات الجامعة و للموظفات..

هي عن الأساسات الخفيف و المرطبة و البي بي كريم
راح أعرض لكم 6 أنوع في 3 أيام.. اليوم و بكرة و بعده ..

بس قبل ما أبدا راح أعطيكم شوي معلومات مهمة

 

+ أنا كنت أسكن في منطقة جدا جااافة.. و كنت أستخدم منتجات فيها ترطيب قوي و كذا
بس لما نقلت جدة هالمنتجات ما عاد تناسبني مو لأنها سئية بس لأن جدة حر و رطوبة
و صارت تسيح علي كثير ما تثبت زي زمان.. هذا شي

 

 

+ الشي الثاني ممكن بشرتك تختلف عن بشرتي أنا مختلطة تميل للدهنية..
يعني أي شي فيه ترطيب عالي راح يناسبك لو بشرتك جافة مهما كان الجو

 

 

+ الشي الثالث البي بي كريم الأصلي و الأساسي في شرق آسيا مختلف عن اللي عندنا..
يعني ما ألاحظ اللي عندنا يعالج و لا يصفي البشرة مثل اللي ينباع في شرق آسيا زي كوريا و اليابان
و لا  فيه نسبة الحماية الكبيرة من الشمس مثلهم إلا فيما ندر..
اللي عندنا أعتبره أساس مرطب خفيف (tinted moisturizer)
مو بي بي كريم.. بس حطوا هالاسم لأنه الموضة الحين خخ

 

 

+ الشي الرابع بعض البي بي كريم اللي راح أتكلم عنه يعطي لوك أبيض للوجه يعني يناسب البشرات الفاااتحة.. و الوسط مثلي ممكن يخلطون معاه أساس ثاني مناسبهم أو يحطون منه شوي مع المرطب اليومي

 

 

+ و لا تشترون أي شي لين أخلص السلسلة عشان تاخذونه فكرة أكثر
و هالمنتجات رأيي الشخصي فيها .. يعني جربيها في المحل أول ممكن ما تعجبك

 

 

 

 

اليوم راح أبتدي بمنتجين من ذا بودي شوب:

 

 

ع اليمين بيبي كريم من مجموعة فيتامين إي E.. الحلو فيه أن لونه وسط يناسب البشرات الوسط و السمراء شوي.. سعره تقريبا 60 ريال.. هالكريم من النوع اللي بيناسبني لو كنت لسا ساكنة في بيئة جافة.. يعني لو كنتي ساكنة في مكان ناشف بيعجبك.. لأنه يرطب كثير..و راح يناسب أي وحدة تعاني من الجفاف في بشرتها عموما..

قوامه غني جدا و يرطب.. و قريت تقارير ناس كثير تمدحه في النت

و خصوصا اللي بشراتهم جافة.. شخصيا عشاني بجدة و بشرتي مختلطة إلى دهنية

يسيح معاي و ما يثبت..

تغطيته خفيفه لوسط.. و يتوزع بسهولة ع الوجه..

 

 

 

ع اليسار بيبي كريم من مجموعة مويستشر وايت من ذا بودي شوب سعره تقريبا 70 ريال.. عطوني منه عينة قبل فترة في فرع الحجاز و جربته ع وجهي و جددددددا حبيت التأثير.. أنا أستخدمه قبل الأساس أو التنتد مويستشرايزر.. لأن لونه أبيض شوي و ع البشرة يقلب رمادي..

شوفوا الصورة مبين الفرق بين لوني و لون الكريم.. بس لأن تأثيره رووووعة حبيته..
يعبي المسامات و يعطي دوي لوك و نضارة للبشرة و يصفيها مدري كيف ...!!!
فيه حماية من الشمس 25..
إذا بشرتك بيضاء مررررة راح يعجبك و إذا وسط مثلي لاااازم تستخدمينه زي الواقي أو البرايمر .. مرة ما ينفع لحاله عشان لونه.. للأسف إذا بشرتك سمراء ما أنصحك فيه..

و إن شاء الله بكرة بإذن الله نكمل.. خلوكم قراب
:)