April Favorites مفضلات أبريل

السلام عليكم و رحمة الله.. 

كيف حالكم؟ 

اليوم راح أكلمكم عن مفضلاتي لشهر أبريل و بداية شهر مايو.. بس قبل أبتدي يا ليت تلقون نظرة على موضوع مفضلاتي السابق هنا.. و لو حابين تقرون عن عنايتي بشعري بالتفصيل ادخلوا هنا.. و سويت موضوع عن أدوات ما أستغني عنها من سنيييين تلاقونه هنا..

بالنسبة لي هالفترة كانت فترة تجارب لمنتجات جديدة و بعضها أعجبني جدا و صار من مفضلاتي.. أغلب الموضوع راح يكون مكياج لأن عنايتي ما اختلفت كثير و تحملوا تراه طويل شوي لأني تكلمت عن كل شي بالتفصيل :$ :$

نبدأ بمكياج العيون :

بالت نيكد سموكي أول ما نزل ما تحمست عليه مرة.. بس كل ما أستخدمه أحبه أكثثثر و أحسه متنوع زي نيكد الأول.. و صرت هالفترة تقريبا ما أستخدم إلا هو.. و يريحني كمان لأن فيه لون whiskey مناسب للحواحب و لون thirteen لتحت الحاجب..  و الفرشة اللي معه بطرفين ممتازة مرة.. 

من الفرش اللي حابتها كثييير مؤخرا هي هذي الفرشة من زويفا رقم ٣٢٢.. أستخدمها مع ظل whiskey لحواجبي 

تاتو آيلاينر من كات فون دي مو أول مرة أستخدمه.. حلو و ثابت و راسه عبارة عن فرشة حقيقة و هالشي يعجبني كثير.. مشكلته يخلص بسرعة بس يظل منتج حلو و مبسووووطة إن الماركة نزلت عندنا بالخليج أخيرا!! 

من المنتجات الجديدة هالشهر برايمر بينفت للرموش They're Real و مسكرة  Velvet Noir من مارك جيكبس.. بالعادة برايمرات الرموش دايم بيضاء بس اللي يميز هذا البرايمر من بينفت هو لونه البني الغامق يعني ممكن تستخدمينه لوحده بدون مسكرة فوقه و هو معزز بـ provitamin B5 و يعطي شكل مفرق و مرتب لشعرات الرمش.. أما المسكرة فأنا عموما أميل للمسكرات اللي فرشها شوي عشوائية و مو مرتبة و دايم تعطيني نتيجة أفضل.. هذي المسكرة تكثف الرموش لو حطيتي كذا طبقة و تعطي منظر كثيف فوق البرايمر

 و آخر منتج للعيون هو الكحل التركواز من قولدن ليدي.. كل أكحال هالماركة بطططططلة و ثاااابتة و ألوانها قوية.. هاللون رقم 002 استخدمته كثير الفترة اللي فاتت

نجي الحين لمنتجات مكياج الوجه: 

برايمر ماكس فاكتر مو جديد بس توي أجربه.. أعجبني فيه إنه يرطب و ما فيه الشعور المزعج للسيليكون.. خفيف كأنه لوشن و يساعد الأساس يندمج ع البشرة بسهولة.. المنتج اللي بعده هو جِل Matte Rescue من بينفت ميزته إنه خفيف في قوامه و يتحكم في إفراز الدهون و يخلي البشرة مطفية.. أحطه قبل المكياج و مرات لوحده عشان بشرتي ما تدهن خلال اليوم..

نجي الحين لحبيب قلبي و نور عيني خخ.. فعلا هذا الكونسيلر Ultra HD من ميك أب فور إيفر ينور تحت العين بشكل!!! صحيح ما يخفي الهالات بالكامل بس يغطيها بنسبة ٩٠٪ و الأهم إنه خفيف مو ثقيل ع البشرة و التأثير اللي يعطيني إياه فعلا عجبني.. فيه ناس يقولون العلبة صغيرة و هي فعلا صغيرة بس ما تخلص بسرعة.. هذي أول علبة صار لها تقريبا أكثر من ٣ شهور عندي و لسا ما خلصت لأن اللون مركز و ما أحتاج أستخدم إلا نقطة للهالات كلها.. درجتي Y33

من مكياج الوجه كمان علبة الكونتور الجديدة من ريمل اللي أبهرتتتتنننني.. فيه لها كذا درجة و اللي عندي أغمق درجة اسمها Golden Bronze.. ناااادرا نلاقي لون كونتور حلو في ماركات الدرق ستور و فرحت كثير لما جربت هالعلبة.. لون الكونتور فيها حلو مو برقالي و مناسب جدا للبشرات العربية و سهل بالدمج و مطفي و ثابت.. لون البلشر كمان حلو و فيه لمعة ذهبية تغنيك عن الإضاءة و تقريبا لونه مشابه لبلش أوقازم من نارس.. الإضاءة في هالعلبة لا بأس فيها بس الكونتور و البلشر يخلي هالعلبة تستاهل الشراء.. سعرها تقريبا ٥٢ ريال

المنتج الثاني للخدود هو التنت الجديد من ذا بودي شوب.. يستخدم للشفايف كمان بس هاللون فاتح مرة و أستخدمه كبلشر.. أهم ميزة خلتني أحطه من مفضلاتي هو الثبااااااات!! ثابت ثابت مرة و هذي الدرجة بالذات حلوة و ناعمة اسمها Dusty Rose 037 و أحب أدمج هالمنتج بفرشة بلشر عادية مثل فرشة ميك أب فور إيفر رقم ١٥٢ 

و الآن منتجات الشفايف لهالشهر: 

هالفترة استخدمت محدد ذا بودي شوي اسمه 335 Hot Date لأني صايرة أميل كثير للألوان اللي كذا (وردي محمر مايل للفوشي الغامق) أعبي فيه شفايفي كلها مثل الروج.. ثباته متوسط بس القوام كريمي و ما ينشف الشفايف.. و روج ريمل المطفي تقريبا نفس لون المحدد بس أفتح شوي رقم 116 و هو من مجموعة كيت موس اللي نازلة للشرق الأوسط فقط!! 

أما المنتج الأخير للشفايف هو الروج السائل من Kat Von D اللي داااايما أسمع عنه مدح و أخيرا جربته.. أنا ما أحب الأرواج السائلة المطفية لأنها تنشف شفايفي مرة.. هذا تركيبته ما تنشف مرة و ثباته حلو و علبته نحيفة و أنيقة.. الدرجة اللي عندي لوليتا ٢ و ناوية أشتري لوليتا الأول.. و لو عندكم ألوان ثانية تنصحوني فيها اكتبوا لي في التعليقات تحت الموضوع

نجي الحين للمناكير: 

مناكير إتش آند إم من زمان حلوة بس الحين غيروا التركيبة و العلب لكل منتجات و أدوات التجميل و تغيرت معها المناكير للأرووووع.. تركيز اللون قوي و شكل العلبة أنيق مرة مع الغطاء الأوف وايت.. جربت أول شي اللون الكحلي و حبيته.. و لما صار عليها خصم قبل فترة اشتريت ٣ ألوان زيادة.. بجد لازم تجربونها..
أما المناكير الثاني هو من ذا بودي شوب مجموعة بيريتش روز الجديدة.. هو شفاف تقريبا ما فيه لون واضح.. بس لما أحط منه طبقين ع أظافري يطلع شكلها صحي و نظييييف كأني توي مسويتهم بالصالون.. منظرها أحلى ع الأظافر الطويلة أكثر من القصيرة..

و آخيييرا منتجات العناية :

من منتجات العناية اللي أحبها كثير هي الزيوت و خصوصا بالليل قبل النوم لأنهم يرطبون بعمق و أقوم الصبح بشرتي تكون متشربة الزيت و مظهرها صحي و نضر.. هالفترة استخدمت هذي الزيوت و أعجبوني كثير.. الأول هو زيت الروز هيب العضوي أخذته من صيدلية بووتس و الثاني من ذا بودي شوب مجموعة زيوت الحياة.. زيت بودي شوب أستخدمه بعض المرات برايمر و ممتااااز جدا يخلي الأساس يندمج بشكل حلو و يثبت وقت طويل.. 

أما هذا الجل أحبببه للنهار كثير من نفس مجموعة زيوت الحياة.. لأن قوامه خفيف يناسب الأجواء الحارة و البشرات الدهنية و المختلطة.. فيه مثله كريم كمان لو بشرتك جافة.. للأمانة منتجات زيوت الحياة فيهم شوي عطور فلو بشرتك تتحس من العطور لا تستخدمينهم.. 

و أخيرا سائل الاستحمام هذا من مجموعة برتش روز في ذا بودي شوب.. كل شيء فيه حلو.. التعليب و الريحة و المفعول.. و اللي يعجبني في سوائل الاستحمام عند ذا بودي شوب إنهم ممتازين في التنظيف بس ما يسببون جفاف للبشرة.. 

و بس..

أتمنى يكون الموضوع أعجبكم و استفدتوا منه.. المنتجات الجديدة كثير و حاولت أغطي معظمها هنا.. لو فيه منتج جديد جربتوه اكتبوا لي تجاربكم في التعليقات.. و لا تنسوا تشاركون مدونتي مع صحباتكم و أقاربكم..

و دعواتكم لبنت أخوي ربي يشفيها :(

PEACE