Tools I Can't Live Without!

السلام عليكم و رحمة الله.. 

كيف حالكم؟ 

اليوم راح أوريكم أهم الأجهزة و الأدوات اللي ما أستغني عنها أبدا أبدا و استخدمهم من سنييين (غير الجوال و المكيّف طبعا خخ).. ممكن يكون الموضوع طويل شوي لأني كتبت فيه بالتفصيل.. فـ الصبر طيّب و يالله نبدأ:

GHD Flat Iron \ Straightener 

هذا الجهاز بديت أستخدمه تقريبا سنة ٢٠٠٨ و من يومها ما عاد أستخدم غيره لتمليس شعري.. في البداية اشتريت اللون الوردي الفاتح لو تذكروني أيام الإقلاع.. و كان في ذيك السنة غالي و أخذته بحدود ١٢٠٠ ريال.. استخدمته سنتين و بالغلط دعست عليه برجلي و انكسر!!! جلست فترة بعد هالحادثة و جربت فيها كذا نوع و كلهم ما يرضوني و يعطوني نتيجة ممتازة زي الـ جي إتش دي.. فـ رحت و اشتريت واحد ثاني و لقيت إن سعره صاير أرخص شوي يعني بحدود ١٠٠٠ ريال إذا إصدار ملوّن فترة محدودة زي اللي عندي بالصورة.. و لو اشتريتوا الأسود العادي بيكون بـ٧٠٠ ريال.. له مقاسات متنوعة بس أنا عندي المقاس الأساسي المتعارف عليه.. من مميزاته إنه له درجة حرارة وحدة ثابتة و هذا سهّل علي الموضوع إضافة إلى إنه يحتاج بس ثواني و يصير حار و جاهز للاستعمال.. مهما استخدمه و أقربه من فروة شعري ما أحس إنه قطّع شعري أو أحرقه الحمدلله.. و الجهتين السيراميك تتحرك خفيف بشكل مرن يسهل التمليس.. و فيه دروس باليوتيوب تعلمك كيف تسوين تجاعيد بسيطة بنفس الجهاز بعد.. و آخر شي بالجهاز هو خاصية الأمان يعني يطفي الجهاز من حاله إذا نسيتيه شغال بدون استعمال مدة نصف ساعة.. متوفر في موقعهم و موقع سيفورا الأمريكي و موقع نوردستروم و موقع أسوس و في محلات نزيه عندنا بالسعودية..

The José Eber 19mm Clipless Curling Iron

فير جوسي إيبر (أو هوزي إيبر) مقاس ١٩ هو الفير المفضل عندي بعد عدد من التجارب و أستخدمه من ٨ سنوات نفسه ما تغير و لا خرب الحمدلله.. يسوي تجعيدات متوسطة و بالنسبة لي سهل الاستخدام لأنه بدون مشبك و حرارته عالية تخلي العملية أسرع.. كل اللي أحتاجه هو القفاز الحامي من الحرارة (يجي مع الفير نفسه) و ألف خصل بحجم قليل ع الفير.. أبدأ ألف الخصل على داخل مرة و مرة على برا و هكذا لين أخلص شعري كله.. لما نسوي الشعر بهالطريقة تصير التجعيدات كثيرة و واضحة و منفوشة و تبان كأنه شعرك فعلا مجعد و هذا اللي يعجبني.. ممكن كمان تخلين الخصل أكبر فتصير التجعيدات أقل و أنعم.. إذا تبين لمعة استخدمي سيروم أو زيت حسب ما تحبين و تكلمت في موضوع عنايتي بالشعر هنا عن منتجاتي بعد التجعيد لو حابين تشوفونها.. فيه مقاسات أكبر و أصغر من هالفير و بألوان كثيرة كمان.. موجود في صيدليات وايتس و متاجر الانستقرام و سعره حدود ٤٠٠ ريال

Tangle Teezer

هذي الفرشة نعمة من الله.. من سنين ما أستخدم غيرها و كل خواتي و قريباتي يستخدمونها بعد و كل ما انفتح موضوع الشعر في أى مكان لابد أذكرها.. لأنها تفك التشابك بسرعة سواء كان الشعر مبلول أو ناشف و ما توجع و سهل تنظيفها مرة لأنها كلها بلاستيك ما فيها الاسفنج الموجود بأغلب الفرش.. هذي الفرشة لها موديلات و أحجام و ألوان مالها حصر.. موجودة في موقع سيفورا الأمريكي و موقع أسوس و محلات محمود سعيد في السعودية و سعرها حدود ٧٠ ريال.. فيه منها تقليد كثير بس ما جربتهم للأسف عشان أحكم.. عموما كتبت عنها بالتفصيل مع صور أوضح هنا

Clarisonic Mia 2 

من أكثر الأشياء اللي لاحظت مفعولها في بشرتي.. هذي الفرشة سحر فعلا و تنظف بعمق و أحس أي منتج ترطيب بعدها تمتصه البشرة و تستفيد منه على أكمل وجه.. فيه منها إصدارات و ألوان و رسومات كثيرة و رؤوس متعددة حسب احتياجك.. شخصيا مرة مرتاحة ع رأس البشرة الحساسة و أستخدمها يوم وراء يوم.. المفروض يتغير الرأس كل ٣ شهور لكن أنا أغيره كل ٤-٦ أشهر.. كتبت موضوع عن الكلاريسونيك هنا من زمان و إلى الآن هو أكثر موضوع مشاهدة في مدونتي.. للأسف بعد ٣ سنوات من استخدامي لها بدت تخرب و تطفي علي كثير فـ راح أشتري وحدة جديدة في أقرب فرصة لأني ما أقدر أعيش بدونها و هذي القديمة خلاص حللت قيمتها و عاشت معي مدة زينة و الله.. في النهاية هي جهاز معرض للأعطال

The Beauty Blender

ما أتوقع فيه بنت ما تعرف إسفنجة البيوتي بليندر!!! هذي الإسفنجة أعطتني نتيجة عجيبة في دمج الأساس و الكونسيلر و تعطيني مظهر طبيعي و من بعدها ما عاد أستخدم فرش الأساس.. طبعا هي تستخدم مبلولة و بالطبطبة.. صرت أستخدمها لدمج المنتجات الكريمية الثانية مثل الكونتور و الهايلايت الكريمي و البلشرات الكريمية أو السائلة.. فيه منها ألوان بعد و يقولون كل لون له وظيفة معينة!! شخصيا ما أتوقع إن هالمعلومة صحيحة لأن كثير ناس ع اليوتيوب يقولون كلها نفس الشيء.. فيه أحجام منها كمان لو حابين.. تباع عندنا في سيفورا ب ٨٠ ريال.. ممكن تشوفونها غالية على إسفنجة لكن بعد ما تشوفون النتيجة راح تحبونها.. بالنسبة لي أفضل طريقة لتنظيفها هي فركها بشكل خفيف و رقيق على أي قالب صابون و أحب أبخ عليها شوي كحول في النهاية.. مهم جدًا الرقة و الخفة في غسلها و استخدامها عشان ما تنقطع و تعيش مدة طوييييلة.. 

Sensodyne Toothbrush 

تعبت و مليت من الفرش اللي فيها مليون شيء..!! بلاستيك مع مطاط مع دوائر و مربعات و شعرات طويلة و قصيرة و زحمة!!! و في النهاية ما أحس إن أسناني نظيفة.. عشان كذا أحب فرش سينسوداين الناعمة أو المتوسطة النعومة.. لأنها فرشة أسنان بسيطة بدون تعقيد و تحسسني بالنظافة و مو قاسية ع اللثة.. 

و أخيييرا شي خارج عن مجال التجميل و العناية و هي: ولاعة BiC

بالأساس مخصصة للشوي بس أنا أستخدمها للشموع و خصوصا شموع باث آند بودي ووركس.. لأن لها رأس طويل متحرك يسهل الوصول للأماكن الصغيرة و لها ألوان كثيرة و عندي منها وحدة للبيت و وحدة في الدوام.. سعرها تقريبا ١٩ ريال في بندة و موجودة بقسم الرحلات.

طبعا هذي الأجهزة و الأدوات أعتبرها زي الاستثمار.. بعضها ممكن يكون مكلف ماديًا لكن مع المحافظة و حسن الاستعمال راح تعيش مدة طويلة و تحلل قيمتها.. اكتبوا لي في التعليقات تحت وش الأدوات و الأجهزة اللي ما تستغنون عنها سواء في التجميل أو العناية أو حتى في البيت..

شكرا لأنكم عطيتوني من وقتكم و أتمنى الموضوع أعجبكم.. و إذا عندكم وقت طلوا على هذي المواضيع :

- تقرير عن فرش إيليزيم مع كود خصم

- بودراتي المفضلة 

- تجرتبي مع منتجات كلارنس 

و لا تنسوني من دعواتكم..

PEACE