Review: Aztec Secret (Indian Healing Clay)

السلام عليكم و رحمة الله و بركاته..

لما نزلت صورة قناع الطين الهندي في الانستقرام قبل كم يوم كثير سألوني عنه  

و قررت أكتب عنه تقرير بسيط عنه و أشرح تجربتي معاه

بس بالبداية أحب أعتذر عن رداءة الصور :(
 لأني لسا ما عرفت استخدم كاميرتي الجديدة زين..
مسألة وقت إن شاء الله و أتعلم عليها أكثر..

هو عبارة عن بودرة ينحط معها موية (أو خل التفاح حسب المكتوب ع العلبة)

و يخلط بأدوات و في أوعية غير معدنية.. بحيث يكون قوامه كريمي..

و ينحط ع الوجه مرة بالأسبوع من ١٠ ل ١٥ دقيقة أو لين ينشف و يغسل 

بموية دافية.. و مكتوب ع العلبة إنك ممكن تستخدمينه لنقع الرجلين بعد..

تجربتي:

أولا شريت صحون بلاستيك صغيرة و ملاعق مخصصتهم له و كل مرة أخلص 

من الصحن أرميه و هكذا.. ملعقة كبيرة تكفي للوجه مع قليل موية..

بصراحة خفت من سالفة الخل و ما قد جربته معه للأمانة

المهم القناع أعجبني جددددا. ينظف الوجه من قللللب و خصوصا المسامات..

ما عندي حبوب من فضل الله بس في النت يقولون أنها تخف مع الاستخدام

المنتظم لهذا القناع الطيني.. و قريت إن كثير رجال يستخدمونه..

بمجرد ما يبدأ ينشف القناع ع وجهك راح تلاحظين إنه بدأ يشد و تحسين بمفعوله

بعد ما أغسله أحب أمسح وجهي بشوي تونر و أحط مرطب

و يا سلاااام ع النظافة و الانتعاش.. وجهي يلق لق خخ..

 أنا شخصيا كنت من أشد المعجبات بقناع "قلام قلو" الأسود

و قناع "بلو كورن" من ذا بودي شوب.. بس هذا في نظري أحسن منهم بمراحل

و لأنه بودرة فهالشي يسهل السفر فيه.. 

 الحلو في المنتج غير مفعوله العجيب هو رخص سعره و كبر كميته.. 

كميته كبييييرة مرة يعني ممكن تتقاسمينها مع خواتك أو صديقاتك..

اشتريته من أمريكا من سوبرماركت Whole Foods

و موجود في أكثر منها أمازون (هنا) .. و موقع أي هيرب (هنا) 

و أنصحكم تقرون تجارب الناس كمان في هالمواقع و ع اليوتيوب

ما راح تلاقون حد يذمه.. و شفت نهى نبيل ع سناب تستخدمه و تمدحه بعد

تحديث:
شفت أختي تستخدم القناع مع قليل زيت زيتون أو أرقان أو جوز هند و تحط معه كمان شوي كركم.. جربت طريقتها و لقيتها حلوة و ترطب أكثر و تصفي الوجه..

و بس خخ.. ما أعرف وش ممكن أكتب عنه كمان بس بجد أنصحكم تجربونه

و لا تنسون تشاركوني تجاربكم معه.. و دعواتكم..

PEACE