Revlon PhotoReady Foundation Review

 

السلام عليكم..

معليش تأخرت عليكم مرة فيهالبوست.. ع أساس ينزل المغرب بس ما عليه..

it's better late than never

خخ

 

اليوم راح أكلمكم عن أساس من ماركة ريفلون

 

 

هالأساس من اسمه.. ممكن تحطينه و تتصورين و تبان صورك حلوة و جميلة..

فيه حماية من الشمس بنسبة 20 و خالي من الدهون و العطور

إذا مسكتوا العلبة قريب مرة راح تلاحظون فيه شيمر خفيف.. يعني؟؟؟

يعني يعطي ديوي لوك نوعا ما.. فيه ناس تخاف إنه يطلع مرة لامع

بس لا تخافون.. ما يخليك لماعة أبدا و لا يعطي لوك دهني..

إضاءة و نضارة خفيفة..

اللون اللي أستخدمه 004 Nude

و هي درجة أغمق نقطة من هيلثي مكس حق بروجوا رقم 52

و قريب ع ميك أب فور إيفر إتش دي بين الدرجة رقم 118 و 120

قوامه كريمي.. ماهو سائل و لا هو مرة ثقيل

سعره ما أذكر تمام بس أتوقع بحدود 80 ريال

تغطيته متوسطة إلى كاملة

 

خلينا نشوف الصور و بعدين أحكي لكم كيف أستخدمه..

 

 

 

 

 

  

 

 

 

 

 

طيب .. أنا جربته بكذا طريقة.. و ما حبيته في البداية..

لكن لما فهمته و اختبرته كثير عرفت كيف يعطيني النتيجة الحلوة اللي أبيها

 

بالنسبة لي أنا ما أحط أساس زي هذا إلا في المناسبات و إذا بشرتي تعبانة مرة و محتاجة تغطية

و مرات أحطه في جهات محددة في الوجه حسب حاجتي

 

الأساس هذا كريمي و تركيز اللون عالي.. يعني ما يحتاج كمية كبيرة منه ..هذا أولا.. طبقة خفيفة و بس

ثانيا هو ينشف بسررررعة.. فما يحتاج بودرة بعده.. لكن فيه نقطة مهمة

عشان يندمج معاكم زين.. ما ينفع تحطين نقط ع وجهك و توزعين.. و لا تحطين ع يديك و تاخذين كل شوي

لأنه ينشف و يثقل زيادة.. السر في وضعه هو تحطين نقطتين مثلا ع الخد اليمين و بسرعة تدمجين..

و بعدين نقطتين ع اليسار و تدمجين.. و بعدين ع الجبهة و تدمجين.. و هكذا

أنا لاحظت بهالطريقة أستخدم كمية قليلة ما أكتل ع وجهي.. و يندمج معاي أسرع

إذا حسيتوا الطبقة هذي ما غطت عيوب البشرة.. انتظروا شوي و حطوا طبقة خفيفة ثانية..

ما يخالف بفرشة أو اسفنجة أو أصابعكم.. اللي يريحكم..

 

و فيه شي مرة راح يفيد مع الأساس و يسهل دمجه ع البشرة إنكم تحطون برايمر أو كريم مرطب قبله..

و ممكن أثناء دمج الأساس تبخون ع الفرشة أو الاسفنجة بخاخ مثبت مثل ميك أب فور إيفر مست آند فكس

أو بخاخ أفين أو إيفيان أو ذا بودي شوب..

عشان يمشي معاكم أكثر و ما يتكتل..

 

هذي طريقتي و رايي فيه.. و بصرحة أحسه ينافس أساسات أغلى منه بكثير..

 

 

أشوفكم وقت ثاني.. لا تنسون تسوون فولو للمدونة من يمين الصفحة

و ممكن تشاركون بيوزر تويتر أو قوقل

 

 

أحلام سعيدة

()