LUUUTY LIKES : Make-up Routine :D

سلام عليكم

هذا أول بوست لي هنا وإن شاء الله إذا عجبكم مارح يكون الأخير ..

أنا أخت ترتر الصغيرة..

واللي بتكلم عنه اليوم روتيني في المكياج

هذا اللي أسويه أغلب الأسبوع لكن مايمنع إنه تمر علي أيام أروح بوجهي زي ماخلقه ربي وأحيانًا أحط آيشدو وروج أحمر وكذا..

نظريتي في المكياج إني اعتبره وقت ممتع لي و بس.. يعني لو قمت من النوم وأخلاقي قافلة و لقيت حبة حمراء كبييرة بخدي و هالات واصلة لين رقبتي لكني مب مشتهية أحط مكياج .. مارح يوقَع بوجهي أبدًا

أحب أحط المكياج وأنا مسوية كوب شاهي و حاطة سماعات بإذني .. لو ما توفر لي هالمود و الرواقة مارح أحط

<< كأني طولت بالكلام شوي ! بس وصلت الفكرة ؟

 

 

 

 

أول شي لما أقوم من النوم أرش وجهي بهالبخاخ من أفين .. منعش و عشانه بعلبة معدن أحسه دايمًا بارد عكس البلاستك اللي أحط فيه موية ورد..

وأحط البيوتي فلاش بام من كلارينس. مرة حلو إذا ما كنت نايمة بالليل أو وجهي تعبان.. أستعمله ٣٦٥ يوم بالسنة

إذا كانت بشرتي مرة جافة أدهنها بكريم وأحطه بعده إذا عادية أحطه هو بس..

ماتوقع إنه راح ينفع مرة للبشرة الدهنية

برضو استعمله تحت عيني لأن من مكوناته Witch-hazel وهذا يخفف الانتفاخ تحت العين

 

بعدين هنا البرونزر من شانيل - درجة وحدة بس .. أحسه ينفع لكل البشرات

بس البشرة الفاتحة راح تستعمله بطريقة غير البشرة السمراء .. و تكلمت عنه ترتر في بوست قبل ..

أنا أميل للسمار وأستعمله خفيف مررررة على كل وجهي مايخلي وجهي كأني مسوية تان ..

لكن يخليني مستصحة شوي وأكثره زيادة على الخدود

لكن التكنيك في هالبرونزر هو إني استعمله مع فرشة سيفورا مينيرال 45

قبل كنت أستخدمه بفرشة بلشر وطلع مرة ملكع..

 

وبعدها أحط الهايلايتر نقاط بسيطة بخدي وشوي بدقني وجبهتي وأدمجها

أحياناً أحط منه مرة خفييييف على جفني عند مدمع العين.

ماركته اسمها إيتود هاوس.. شريته من برا السعودية..

لكنه نفس moon beam من benefit

 

الماسكارا استعملها لحواجبي الصراحة :$ لأن أي أحد يعرفني يعرف إني أكرررره الماسكارا كرهي لليهود ..

ما أتقبلها أحسها تخلي عيني ثقيلة ..و لما أجي أمسحها عذاب برضو.. ماحطها إلا بالزواجات والمناسبات الكبييييرة جددددًا

أما القلم الأسود هذا من e.l.f هو بالحقيقة للشفايف.. لكن أنا استعمله لمدمع العين مرة يلمع لمعة حلوة و يعطي الوجه حياة ..

ما أتخيل كيف أحد راح يحطه للشفايف صراحة !!

 

 

 

آخر مرحلة دايماً أرطب شفايفي بإلزابث اردن .. بعض الناس يقولون إنه زي الفازلين و ما يسوى سعره لكن أنا أشوفه من التوب ١٠ عندي ماقدر أعيش من دونه..!! المهم أحطه كمان مسحة مرة خفيييييييفة على عظمة خدي يخليها تلمع طول اليوم :$

والروج هذا من YSL أحلى شيء فيه إنه ثابت لأبعد حد وماينشف الشفايف .. أحيانا أستعمله كمان للخدود

هذا غالباً اللي استعمله بشكل دائم ..لكن أحياناً إذا بغيت أزيد شوي

استعمل هالبودرة من قيرلان على نص وجهي بس وعالهالات لأني ماعندي كونسيلر ..

مدري ليش كلها مرة تتشقق وتطلع لي تجاعيد فحولت للبودرة

مرة حلوووو وأحبها قوامها حلو أحس ذرات البودرة مرة نااااااعمة ومايطلع الوجه مشهب بعدها

- لكن الخبر السيء إنها انقطعت خلاص :( نزلوا أنواع ثانية ماعرف لو هي كويسة زيها أو لا -

 

 

 

والكحل من قيرلان حلو لكن يبي له تكنيك .. مب أسود فاحم مرة لكن يثبت.. يعني يشفع له الثبات ههههههه

أحب أحطه من جوا وفوق خط الرموش. أحسه يغني عن الماسكارا.

 

والبودرة البني هذا أصلاً برونزر جا مع مجموعة من نفس الماركة Bare Minerals .. لكن طلع مرة غااااامق علي..

صرت استعمله زي الآيشدو .. مرة حلو ع العين وناااعم ما هو مات و لا هو شيمري.. بين الاثنين..

هنا سواتشات سريعة لكل اللي حكيت عنه  فوق من اليمين برونزر بير مينيرال و جنبه برونزر شانيل
في النص قلم e.l.f  و تحت من اليمين كحل قيرلان و روج YSL بشكل عادي و جنبه إذا مسحته عشان تشوفون الثبات

 

( توني ألاحظ إنه كثير من الأشياء اللي هنا ماستعملها استعمالها الأساسي 

 البودرة صارت كونسيلر والبرونزر صار آيشدو واللي للشفايف صار للعين ههههههه )

أتوقع إن هالروتين راح يتغير خلال هالشهرين لأني خلصت كم حاجة وودي أجرب استعمل غيرها قبل لا أرجع اشتري نفس اللي عندي.

لو لقيت روتين جديد ناسبني راح أكتب عنه مرة ثانية :$

أتمنى عجبكم وراح أقرا كومنتااتكم وإن شاء الله أصير أكتب هنا كل فترة والثانية :$