October Favorites

السلام عليكم
كل عام و أنتم بخير..

قررت أسوي مفضلات الشهر.. بس ما أضمن أسويها كل شهر.. ممكن شهر إيه و شهر لا..
عموما اليوم حابة أوريكم منتجات لاحظت إني استخدمها أكثر من غيرها هالشهر
و التصوير اليوم لكم عليه لأني صورت قبل المغرب ما فيه نور شمس كفاية .. لأني بالعادة أصور الصبح أو الظهر

بسم الله

جل فازلين و كريم إليزابيث أردن 8 أور كريم

هالمنتجين ويا جفاف اليدين أنقذوووووني..
أخلطهم مع أي كريم أو لوشن و أحس يدي مترطبة حيييل..

الجل بحدود الـ 20 ريال من أي صيدلية.. قريت عنه في مدونة إسأل مجرب
قوامه ثقيل شوي ما أحب أحطه لحاله إلا في الليل بعض المرات.. يصلح للجسم طبعا و ريحته جميلة

و كريم إليزابيث آردن ما أذكر بس فوق الـ 100.. و له استخدامات كثيرة ممكن للشفايف و الوجه و المناطق الجافة
ريحته شينة مرة هههههههه للتنبيه .. بس لأنه خالي عطور مو لأنه خربان.. و مع الأيام عادي تعودت عليها
بالعادة يجي في علبة زي العصار أو أنبوب.. هنا شكله غير لأن هالعلبة إصدار خاص ..نزل فترة و راح..
تكلمت أختي عنه في الروتين حقها قبل فترة هنا في البلوق


محسن و برايمر للوجه بفيتامين سي من ذا بودي شوب

بشرتي من منطقة الخدود بس صايرة تطلع فيها حبوب صغيرة حمرا زي النقط مالها بروز و لا شي..
و في هالحالة دايم ألجأ لأي شي عندي بفيتامين سي لأنه يجدد البشرة و يعالجها
صرت أحط هذا ع وجهي الصبح قبل الدوام و مرات ع العصر أو المغرب أحط كمان
ريحته منعشة و البشرة بعده ناعمة و جميلة.. ما أدري إذا راح ينفع للبشرة الدهنية كثير..
بس للأنواع الباقية مرة ممتاز.. ما أفتكر سعره بس أتوقع 70 أو حولها..


فونديشن ريفلون فوتوريدي و كونسيلر إيف سان لوران

زي ما قلت لكم عن الحبوب اللي تطلع لي بين فترة و الثانية ع خديداتي خخ
فصرت مرات أحط أساس فوتوريدي ع الخدود بس و يخفيها تمام.. أنقذني هالشهر
الأساس هذا بعد تجارب عرفت كيف أطلع فيه بنتيجة حلوة لأن قوامه شوي صعب
راح أكتب عن الفونديشن هذا بعدين في بوست لحاله ..
و إذا ما استخدمته .. استخدم هالكونسيلر من إيف سان لوران رقم 2.. بس ع الخدود
قوامه كريمي و يندمج بسرعة.. لونه ينفع للوجه بس ما استخدمه للهالات


برايمر إيربن ديكي - اللون سِن sin

في الأسابيع اللي فاتت و مع قرب الإجازة و ضغط الشغل في المدرسة جتني حالة خمول و كسل و نوم..
و صرت مالي خلق أحط ظل كل يوم و هيك..
فـ أحط هذا ع العين كلها و بعده كحل و اطلع.. مرات  أتناشط وأحط المسكرة في الدوام و مرات لا ههههههه
لونه بيج ع ذهبي مايل للتوبي أكثر و فيه شمر طبعا.. يصلح كـ ظل لحاله و يصلح إذا بينحط فوقه ظل ثاني..
و لأنه برايمر راح يثبت و ما يكتل


ظل من نكس الدرجة رست rust

هذا لون كسرة العين (كريس) المفضل هالشهر.. :$
تكلمت عنه قبل.. أحطه مع برايمر إربن ديكي و مرات مع وردي و مرات ويا ذهبي.. المهم إني أحب استخدمه هالشهر كثير


روج من إيلف.. بـ دوولاااااغ >> دولار يعني خخ

الدرجة اسمها فانتزي..لونها نود بس مايل ع البني أكثر.. أحس هالدرجة من النود تناسب البشرات العربية
و الوسط مثلي.. من أكثر الألوان اللي استخدمها هالشهر.. و هنا سواتش له :

بلسم للشعر من ماركة Vo5

فيه كذا نوع احترت بينهم .. بعدين خذيت هذا حسيته يناديني خخ.. سعره الظاهر بحدود الـ 20
مرررررررررررة عجببببني..  حسيته يرطب شعري و يخلي ملمسه ناعم..
و ع فكرة ترى البلسم عندي عموما يخلص بسرعة.. ممكن كل أسبوع و نص أشتري
و أجرب أنواع كثيرة كل مرة.. بس للحين هذا و حق ذا بودي شوب اللي حطيت عنه زمان هم الأفضل للحين
و مع أي شامبو ألاقي نفس النتيجة الحلوة..



سبري للشعر من بوتس من ماركة لي ستافورد ..

اسمه شاين هيد.. مثبت و يعطي لمعة.. أنا ما لاحظت اللمعة بصراحة بس عجبني إنه يثبت تمويجات شعري
بدون ما يعطي ملمس قاسي .. و طبعا الغطا ضايع من كثر ما استخدمه و آخذه معي بكل مكان..
فيه منه ترافل سايز أحطه في شنطتي لما أرفع شعري فوق و ما أبي شعرات تتطاير هنا و لا هناك خخ


سيروم بزيت بذور العنب >> و الله..؟

يعطي لمعة و ملمس ناعم للشعر و يهجد التطاير شويتين.. أحب أحطه ع الأطراف بعد ما أسوي الفير
من ذا بودي شوب .. و سامحوني ماني مفتكرة سعره :$


طيب نجي للفير خخ.. جوس إيبر مقاس 19 .. الوسط

أسرع شي و أفضل نتيجة و أستخدمه كثيييييييير هالشهر..
إذا بغيت تمويجات مرتخية و ناعمة مرة ملست شعري بالسيراميك خفيف قبله
و إذا بغيتها واضحة و فيها حجم سويت شعري علطول فيها بمجرد ما ينشف
شعري للمعلومية كيرلي طويل :$
أخذته ما أدري من أي تاجرة بس زمان و الله قبل 3 سنوات ممكن.. يوم أول ما طلع و طاحوا فيه الناس


آخر شي هالعطر :$

ريحة تنعش القلب صدق .. أحبببببببببببببببببببببه و له ذكريات جميلة ()
من ذا بودي شوب .. سعره تقريبا 130 ريال


و بس.. راح يكون البوست الجاي عن أساس ريفلون فوتوريدي بالتفصيل
و انتظروا ليلة الدوامات بوست مشوق مرررررة..  عشان يخفف و يواسي كل المداومات خخ


peace
:$