My Perfume Collection (Part 2)

السلام عليكم و رحمة الله و بركاته..

هذا أول موضوع في ٢٠١٨ و حقيقي صارت أشياء كثيرة هالسنة و انشغلت و ركزت على الانستقرام أكثر بس اليوم راح أكمل لكم الجزء الثاني من مجموعة عطوراتي بس قبل ما أبتدي أتمنى تقرون الجزء الأول هنا لأن فيه معلومات كثيرة و مهمة عن ذوقي في العطور و المكونات اللي أحبها بالعادة

 فيه كم نقطة لابد أذكرها هنا كمان و هي:

١- لأني مُدوِنة و أحب أشارك تجاربي في هالمجال فـ ما شاء الله تجيني عطور كثيرة للتجربة فـ مو كل اللي تشوفونه اشتريته بنفسي

٢- كل العطور اللي في موضوعي لازم تشمينها بنفسك في السوق قبل تشترينها.. لأن الأذواق في العطور بالذات مرة تختلف من شخص للثاني

٣- في هالموضوع راح أشرح العطور بشكل بسيط و إذا أعجبكم عطر معين ممكن تبحثون عنه أكثر في موقع www.fragrantica.com

٤- العطور تختلف أسعارها من دولة لدولة و بعد المحلات و المواقع كل واحد لها سعر مختلف أحيانا و مرات فيه كوبونات و خصومات.. فالسعر اللي بأحطه تقريبي و كل وحدة تشوف المكان اللي يقدم لها السعر الأفضل..

 صورت لكم العطور على مجموعات و تحت كل مجموعة بأتكلم عنها من اليمين لليسار و من فوق لتحت.. و بأقيم الثبات من وجهة نظري من ١ لـ ١٠:

Oscar Velvet Noir by Oscar de la Renta

هذا العطر من أوسكار دي لا رينتا نزل في سنة ٢٠١٦.. هو عطر شرقي و حالي بنفس الوقت و تشمون فيه شوي ورد.. من أهم مكوناته العود و العنبر و المسك و الياسمين و البنفسج و الجوري و الزنجبيل و البرتقال.. ثباته ٧ من ١٠ و سعره تقريبا ٣٥٠ ريال و ينفع للرجال كمان.. 

Nirvana Black by Elizabeth and James

هذا العطر نزل سنة ٢٠١٣ و فيه منه كمان زيت للشعر تكلمت عنه في موضوع الزيوت العطرية هنا..اشتريته من أمريكا بس سمعت خبر حلو إنه راح ينزل عندنا بسيفورا الفترة الجاية.. بصراحة العطر أنثوي مرررة و رااقي.. مكوناته فانيلا و صندل و ورد البنفسج و أحس فيه شوي ريحة مسك.. علبته كمان فخمة و مميزة.. ثباته ٨ من ١٠ و فيه من نفس الريحة شامبو جاف للشعر.. 

Orchidee Vanille Van Cleef & Arpels

هذا العطر لو متابعيني على سناب تعرفون قصتي الحزينة معاه لكن بأرجع أقولها مرة ثانية ههههههه.. كنت من سنة و شوي أدور على عطر فانيليا يكون مرتب و راقي و سبحان الله وصلني هذا العطر زي ما كنت أبي بالضبط!!! استخدمته يومين بس و طاح مني على السيراميك و انكسر و الله زعلت عليه زعل عظيم و دمعت عيني من القهر خخ.. علطول جبت سجادتي و شرشف الصلاة و مسحت بهم العطر من الأرض عشان تبقى ريحته و أشمها أكبر وقت ممكن.. حكيت هالموقف في قروب صديقاتي من باب الفضفضة و فجأة بعد كم يوم وصلني ع البيت العطر مغلف هدية منهم و قالوا ما هان علينا زعلك (ربي يخليكم لي).. المهم بعدها صرت أقدس هالعطر هههههه.. هذا العطر نازل ضمن مجموعة عطورات في سنة ٢٠٠٩ و من مكوناته الفانيليا و الشوكلاتة الداكنة و بذور التونكا و المسك و المكون المميز مرة هو اليوسفي.. العطر حالي لكن وجود اليوسفي كسر حدة الحلى و خلاه منعش كمان.. سعره تقريبا ٦٥٠ ريال و ثباته ٩ من ١٠ 

Oud Imperial by Perris Monte Carlo

هذا العطر نزل سنة ٢٠١٢ و ريحته شرقية بحتتتتة عود و بخور و باتشولي و زعفران و صندل.. ريحته قوية و ما تعجب الكل بس أنا عاجبتني كثيييير و العطر ممتاز للخلط مع عطور ثانية.. أخذته من أوتلت بـ ١٠٠ ريال بس!! ماهو موجود بالمحلات الكبيرة زي سيفورا و وجوه.. أتوقع موجود في المحلات العادية البسيطة زي سوق الكورنيش أو أويسيس مول في جدة.. 

D&G L`Imperatrice 3 by Dolce&Gabbana

اللي يعرفني مضبوط يعرف إن هذا عطري المفضل و استخدمه من يوم نزل سنة ٢٠٠٩ تقريبا و هذي العلبة السادسة يمكن أو السابعة و لسا عندي ٢ جدد شايلتهم احتياط.. مشكلة هالعطر إنه مقطوع من السعودية من زمان ما أعرف ليش.. صرت أشتريه من سيفورا الأمريكي أو من المطارات في بعض الدول اللي سافرت لها.. ريحته فوّاحة مرة و منعشة و تجيب السعادة حقيقي.. و من مكوناته الأساسية الحبحب و الكيوي و الياسمين و المسك و الصندل و شوي من الفلفل الوردي و الليمون.. أنا أشم فيه ريحة باشن فروت قوية كمان لكن مو مكتوبة في وصف العطر بس قلت أعطيكم خبر.. ثباته ٧ من ١٠ و سعره تقريبا ٣٠٠ ريال و لو شفتوه رجع للسعودية علموني وين عشان أروح آخذ منه زيادة ههههههههه

نبدأ بمجموعة عطور المسك من ذا بودي شوب:

White Musk by The Body Shop
هذا أول عطر أنتجته ذا بودي شوب من هالمجموعة سنة ١٩٨١ و معروف كثير و الكل قد استخدمه أو على الأقل مر عليه بحياته.. ريحته نظافة مرررة و مناسب للكل و أستخدمه كثير لبناتي.. هذا اللي بالصورة الحجم الصغير حق السفر فيه من أحجام مختلفة و زيت عطري كمان.. مكوناته كثيرة بس الطاغي عليها المسك و هي الريحان و الزنبق و العنبر و الياسمين و الفانيليا.. بس زي ما قلت ما رح تشمون هالمكونات كثير لأن المسك هو الأكبر نسبة منهم.. ثباته متوسط تقريبا ٦ من ١٠ و بالنسبة للسعر فيختلف حسب السعة و ما أتذكره و الله..

Black Musk by The Body Shop

هالعطر نزل تقريبا سنة ٢٠١٥ و بصراحة كثير يذكرني بعطر كارولينا هريرا قود قيرل.. العطر حالي و أنثوي مرة.. مكوناته المسك و الفانيليا و الباتشولي و الكاكاو و البرغموت و اليلانق يلانق.. علبته فخمة و فيه منه كمان زيت عطري.. ثباته ٦ من ١٠ و سعره يختلف حسب السعة و الحين مطلعين منه تصميم خاص نزلت صورته في انستقرامي هنا.. 


White Musk Libertine by The Body Shop
العطر هذا له ذكريات عزيزة علي و كل ما بخيته أشعر بالسعادة.. نزل بسنة ٢٠١١ ريحته سويت و دافية من مكوناته طبعا المسك زي كل عطور هالمجموعة من ذا بودي شوب إضافة إلى ورد الجوري و اللوز و العسل و الفانيليا.. ثباته متوسط تقريبا ٦ من ١٠.. ما أستخدمه كثير عشان ما أتعود على الريحة و تفقد مكانتها عندي.. فيه أحد مثلي؟

Red Musk Oud by The Body Shop

هذا العطر نزل سنة ٢٠١٥ و كان يوافق شهر رمضان و بالتالي كل ما استخدمته افتكر هالشهر و التراويح و الأجواء الروحانية.. هو إصدار شرقي من العطر اللي بأتكلم عنه بعد شوي لكن أنا أحسه عطر مختلف تماما.. مكوناته المسك طبعا و الباتشولي و اللبان و القرفة و التبغ.. شخصيا لما أشمه أحس فيه ريحة عنبر واضحة لكن مو مكتوبة مع المكونات.. أعتبره خيار ممتاز للناس اللي تبي عطر هادي بين الشرقي و الفرنسي.. ثباته ٧ من ١٠ و فيه منه زيت عطري كمان استخدمه لشعري..

Red Musk by The Body Shop

هذا الإصدار الأساسي من العطر اللي فوق و نزل قبله بسنة.. هو مكتوب بالموقع إنه نسائي لكن أنا أحس ريحته تميل للرجالي أكثر.. مكوناته بسيطة جدا مسك و قرفة و تبغ و فلفل!! أنا نادرا أستخدمه لوحده و أفضل أخلطه مع العطور الثانية عشان يعطيها حدة و قوة.. ثباته ٨ من ١٠

Tobacco Flower by The Body Shop

هذا من العطور اللي كنت استخدمها أيام الجامعة و له ذكريااااات عندي.. في النت في إشاعات إنه راح ينقطع و هالخبر شوي مخيف بالنسبة لي لكن ذا بودي شوب أكدوا لي إنه موجود و ما رح ينقطع.. مكوناته كثيرة و مميزة منها الورد و زهور التبغ و الزنجبيل و الهيل و الصندل و العنبر و المسك و حمضيات.. منعش و أحسه مناسب للجنسين.. ثباته متوسط تقريبا ٦ من ١٠

Fuji Green Tea by The Body Shop 

نزل هذا العطر سنة ٢٠١٥ و في نظري مناسب للرجال و النساء و أبسط وصف له إنه فووااح و مننننعععععععششششش!!! مرات أحسه قوي شوي و أحط منه شوي مع عطر ثاني.. مكون من الشاهي الأخضر و البرغموت و الليمون و اليوسفي و زهور الكاميليا و الياسمين و البنفسج.. ثباته ٨ من ١٠

Secret Garden by Mikyajy

مكياجي نزلوا مجموعة عطور اسمها لايف ستايل فيها أكثر من ١٠ عطور بس هذا أكثر واحد عجبني.. ريحته قوية و أنثوية و تنفع للسهرة و المناسبات و يشبه عطر ديور أدكت بس فرق السعر طبعا لأن هذا ب ٦٠ ريال بس!!! مكوناته فانيلا و بذور التونكا و خشب الصندل و اليوسفي و الورد و زهور البرتقال.. ثباته ممتاز مقارنة بسعره أعطيه ٧ من ١٠ و حجمه صغير حلو للشنطة

Love Spell by Victoria`s Secret

من العطور الهادية و الخفيفة نزل سنة ٢٠٠٠ بفكتوريا سيكرتس و متوفر من نفس الريحة منتجات جسم كاملة.. من مكوناته المشمش و التفاح و زهور الكرز و الياسمين و التمر الهندي و المسك و مايل شوي على ريحة البودرة.. حجمه حلو و سعره معقول و ثباته ٥ من ١٠.. سعره بين ٦٠ و ٧٠ ريال تقريبا

Amber Romance by Victoria`s Secret

هذا العطر برضو من فكتوريا سيكرتس و فيه منه مجموعة جسم و ريحته سويت يعني حاااااالية مرة من مكوناته الأساسية الفانيلا و العنبر و الكرز و الصندل و زهرة البابونج.. ثباته ٥ من ١٠

Musk Jovan

هذا أرخص عطر عندي و موجود في السوبرماركتات و محلات المكياج الصغيرة و الشعبية منه كذا إصدار بس أنا أحب هذا اللي علبته حمراء نحيفة شوفوا صورتها هنا و سعره بين ٢٥ و ٣٥ ريال..  هذي العلبة الرابعة أو الخامسة اللي استخدمها.. ريحته نظااااااافة زي شامبو الأطفال.. المسك هو المكون الأساسي و فيه شوي برغموت و ياسمين.. ثباته مو قوي لكن منعش و أبخ منه كذا مرة باليوم عادي لي و لبناتي .. ثباته ٥٤ من ١٠ 

Aqua Bloom by Mikyajy

هذا العطر نزل جديد عند مكياجي تقريبا ٢٠١٧ و بصراحة أنا مبسوطة من تطورات مكياجي الفترة الأخيرة.. هذا العطر منعش و فواح و من مكوناته الياسمين و الليمون و المسك و شوي ورد.. و خالتي شمته عندي و اشترت زيه اليوم الثاني.. ثباته ٦ من ١٠ و علبته حلوة و سعره ١٠٠ ريال

Exotic Paradise by Mikyajy

هذا العطر كمان من مكياجي و نزل السنة اللي فاتت و ريحته فخمة و سويت بنفس الوقت.. من مكوناته العنبر و الفانيليا و العسل و التوفي و الكرامل و خشب الصندل و الياسمين و اليوسفي.. ثباته ٦ من ١٠ و حبيت شكل قزازته كمان و سعره ١٠٠ ريال برضو

Powder Blue by Sunset Cafe

هذا العطر قديم جدا و معروف و محبوب عند الأغلبية و يباع في المحلات الشعبية.. هو مخصص للأطفال و أستخدمه لي و لبناتي.. ما أعرف مكوناته بشكل محدد لكن باختصار ريحة نظافة و بودرة أطفال و فيه مسك شوي.. فيه كذا حجم منه بس أنا خذت أصغر واحد و ما كان سعره غالي أبدا و ثباته متوسط ٦ من ١٠ 

Frosted Cranberry by The Body Shop 

عطر الكرز المثلج من ذا بودي شوب نزل أول مرة سنة ٢٠١٤ و هو من العطور الموسمية اللي تنزل نهاية السنة الميلادية.. هذي ثاني علبة استخدمها من العطر.. ريحته كرز منعععش مرة و حالي و أشم فيه شوي حمضيات.. ثباته متوسط ٥ من ١٠و سعره حدود ٥٠ ريال

كنت مخططة يكون موضوع عطوري مقسم لقسمين لكن يبدو إني راح أضيف قسم ثالث بسيط لعطورات جديدة وصلتني الفترة الأخيرة و فيه كمان كذا عطر نسيت أصوره.. كثير من العطورات في هذا الجزء خفيفة و ثباتها متوسط و أحب أستخدمها للنادي و الدوام و في البيت أو بعد الاستحمام و تنفع للبنات الصغار كمان اللي ما يحبون الأشياء الثقيلة

أتمنى الموضوع أعجبكم و لو فيه عطر تحسونه بيعجبني اكتبوا لي اسمه في التعليقات و شاركوا الموضوع مع صديقاتكم و لا تنسون تشوفون الجزء الأول اللي حطيت رابطه في البداية..

PEACE