Feb 19, 2016

Busy Mamas (Collaboration)

السلام عليكم و رحمة الله
كيف حالكم؟

في الفترة الأخيرة حسيت إني مضغوووطة مرة بعد الأمومة و رجوعي للدوام هذا غير التدوين و التزاماته اللي ما تنتهي.. و مهم بالنسبة لي بصراحة إني أظهر بمظهر مرتب و جميل لأن هذا الشي بينعكس ع نفسيتي و أدائي خلال اليوم.. 

فتعاونت مع البلوقر غدير من : www.ghadeers.com و اليوتوبر بيان من قناة: www.youtube.com/user/bayan2sjj عشان نقدم لكم أفكار تفيدكم كأمهات عاملات أو حتى لو كان وقتك ضيق جدا ومحتاجة نصايح تفيدك و توفر وقتك.. 

غدير بتتكلم عن الموضوع من ناحية الأزياء و المظهر هنا.. و بيان بتشرح لنا كيف نسوي فطور سريع و صحي هنا..  و أنا بأوريكم الموضوع من ناحية المكياج و أدواته.. أتمنى تقرؤون موضوعاتنا و تعجبكم و تطبقونها إن شاء الله..

اليوم بأتكلم عن مكياج يومي ممكن تسوينه بعشر دقايق.. طبعا تركت خطوات كثيرة عشان توفير الوقت.. لكن لو عندك وقت إضافي ممكن تحطين مكياج أكثر حسب ما تحبين..  


أهم خطوة في المكياج بالنسبة لي هي الكونسيلر على الهالات حول العين لأنها تغير اللوك ١٨٠ درجة و تخلصك من آثار التعب و الأرهاق.. كونسيلر ميك أب فور إيفر الجديد هذا ممتاز و مناسبني جدا خصوصا بالنهار لأنه خفيف مو ثقيل فأحتاج منه كمية بسيطة و يتوزع و يندمج بالإصبع في ثواني و مو بس يخفي الهالات!! كمان يعطي تنوير و إضاءة حلوة تحت العين!! هذي الدرجة رقمها Y33



ثاني خطوة مهمة هي الحواجب لأنها تحدد الوجه و مو حلو تكون باهتة.. و أشوف تعبئة الحواجب بالبودرة المخصصة أو الظلال أنسب شيء و ما تحتاجين معها إلا فرشة و خلاص.. ممكن البعض يفضل القلم بس أنا أحس القلم يحتاج وقت أطول عشان ترسمين الشعرات و أخطاء الرسم بالقلم تكون واضحة لو استعجلتي.. هذي بعض الخيارات اللي عندي: بودرة ذا بودي شوب للحواجب - ظل من مورفي رقم ٢٦ - الدرجتين الغامقة من بالت نيكد بيسكس ٢.. 

أما العيون فبالنسبة لي أسرع لوك ممكن أسويه و يبان متكلف و كأني تعبانة عليه هو السموكي البني!! إيه السموكي البني وما رح تحتاجين كثير أشياء.. حطي نفس الظلال البنية المطفية اللي استخدمتيهم لحواجبك بس بفرشة منفوشة و وزعيها بسرعة و مو لازم دقة بس ركزي ع منابت الرموش فوق و تحت.. هاللوك بيحدد عيونك كمان و ممكن يغنيك عن الكحل..
صديقتي رنيم من مدونة: www.raneemism.blogspot.com و انستقرام @raneem_ism سوت لنا اللوك عشان يكون واضح للجميع و استخدمت بس ظل Buck من بالت إربن ديكاي نيكد ١ و بدون هايلايت تحت الحاجب.. شوفوا عيونها ما أحلاها ما شاء الله..



ممكن كمان تستخدمون أقلام الظلال الكريمية و تدمجون بأصابعكم.. كتبت عن هالنوعية من الظلال قبل فترة في هالرابط


 آخر شي في مكياج العيون هو المسكرا.. حطي كذا طبقة من فوق و مسحتين ع الرموش من تحت و خلاص.. و هذي صورة فيها أفضل المسكرات اللي جربتها.. (مسكرة لوريال هي الوحيدة اللي مو متوفرة بالسعودية أخذتها من أمريكا)





نجي لمكياج الوجه.. عشان أخلص بسرعة أحب استخدم منتجات كريمية أوزعها بأصابعي ع السريع بعد مرطب الوجه علطول.. و طبعا ممكن تستخدمي بلش بودرة بس كذا راح تضطرين تنتظرين شوي لين تتشرب بشرتك كريم الترطيب حقك و تحطين بودرة وجه و بعدين البلش أو البرونز البودرة و بياخذ منك دقايق إضافية.. اخترت لكم أربع منتجات كريمية.. ٢ منها كونتور و ٢ بلشرات: أساس ميك أب فور إيفر الستِك رقم Y505/177 - كونسيلر إل آي قيرل الدرجة toast - تنت تشاتشا من بنيفت - بيبي دول من إيف سان لوران (و سويت عنه تقرير مفصل هنا)




آخر شي الشفايف و أكثر منتج سريع و يثبت مدة طويلة هي الأرواج السايلة المطفية اللي هابين فيها الناس هالفترة بس أنا أكرهها لأني شخصيا ما توفقت في نوع كويس و ما ينشف الشفايف مرة.. فلو عندكم اقتراحات اكتبوا لي في التعليقات تحت..عموما أنا مررررة أحب استخدم التنت و خصوصا هالنوعين لأنهم ثابتين و ما ينشفون الشفايف: إيف سان لوران قلوسي ستاين (درجة ٢ و ١٠) وسيفورا روج إنفيوجن (رقم ١٣)..



و عموما الأرواج أنصحكم تستخدمون الألوان الغامقة شوي.. نود غامق و وردي غامق و عودي فاتح شوي و لو جريئة حطي أحمر.. لأن هذي الألوان تخفف البهتان من البشرة و تطلع حلوة بدون كريم أساس و تعطي شكل فخم و ما يبان إنك مستعجلة لما حطيتي الروج و خلال اليوم يبقى أثر لها ما يروح بسرعة.. زي هذي الدرجات مثلا:   


و بس..

يمكن تنفجعون من الموضوع لأنه طويل شوي بس في التطبيق ترى ما ياخذ حرفيًا أكثر من ١٠ دقايق و غالبا أسويه في الدوام لو ما عندي وقت بالبيت (و إسألوا طالباتي و زميلاتي خخ) .. طبعا ممكن بدل الظل البني تحطين كحل.. و ممكن تحطين أساس خفيف أو بيبي كريم لو معك وقت.. 


شكرا لوقتكم حبيباتي و لا تنسون تشوفون موضوع غدير و فيديو بيان كمان و إن شاء الله تستفيدون و يعجبكم طرحنا و شاركوا الروابط مع صحباتكم و قرايبكم..

PEACE

7 comments

  1. ماساء الخير
    مرررره جبيت التدوينة و خصوصا اتمحست لي الكونسيلر حق ميك اب فور ايفر الجديد بس ان شاء الله ينزلوا دراجات مناسبة للسمر
    مررره عبجتني فكره ال Collaboration)
    و ان شاء الله دايما تسويها

    ReplyDelete
  2. ماشاء الله حبيت الموضوع وفكرة التعاون الي بينكم
    مررره مختصره الخطوات وفي نفس الوقت تخيلتها شيء أنثوي ناعم ماياخذ وقت 💕
    💕 جاية من عند بيان

    ReplyDelete
  3. حبيت البلوق مالج عرفته من غدير, بس ودي اعرف البشره الحساسه شنو افضل فاونديشن لها ؟

    ReplyDelete
  4. حبيت البلوق مالج عرفته من غدير, بس ودي اعرف البشره الحساسه شنو افضل فاونديشن لها ؟

    ReplyDelete
  5. جربي ارواج ذا بالم المات او واو تبع وجوه مرريحين ع الشفايف

    ReplyDelete
  6. جربي ارواج ذا بالم المات او واو تبع وجوه مرريحين ع الشفايف

    ReplyDelete
  7. يا حياتي توني أدري صرتي ماما , الحمدالله عالسلامه متأخره و ربي يبارك بما اعطاكم
    صح السموكي البني يجمل العين و سريع احسه يخلي الوجه بيبي

    مشكوره حبيبتي حبيت التدوينه و الله يعطيكم العافيه

    ReplyDelete

© ●terter thinks● | All rights reserved.
BLOG TEMPLATE HANDCRAFTED BY pipdig