MY Current Obsession : Eyeshadow Pencils!

السلام عليكم و رحمة الله و بركاته

يمكن لاحظتوا من الانستقرام و السناب إني هالفترة طايحة بأقلام الظلال الكريمية.. بصراحة أنا أحبهم من زمان بس الحين صرت مهووسة فيهم مرة خخ.. أحسهم حلوين و سهل استخدامهم و إذا كان ضد الموية يا سلام أحطه و أنساه!! 
الموضوع طويل و مفصّل يعني لو كنتِ واقفة اجلسي و اشربي لك حاجة :$ :$

راح أوريكم المجموعة اللي عندي حاليا:

راح أبتدي بالأربع اللي ع اليمين:

 بشكل عام تركيبتهم ضد الموية و ثباتهم عااالي.. يعني شخصيا ما احتجت استخدم برايمر قبلهم و لا له داعي ظلال بودرة فوقهم.. مع إني بعض المرات أحب أحط شوي ظل بودرة عشان يعزز اللون.. و هالنوعيات بالذات حلوة لو كنتِ مشغولة مرة و ما معاك وقت لخطوات كثيرة.. مجرد حطي منها ع الجفن و موهي الأطراف باصبعك و خلاص!!! و لو كان قلم الظل غامق استخدميه ع الجفن و تحت العين ع خط الرموش و راح يغنيك عن الكحل و يحدد عينك أكثر..
و الحين أشرح لكم كل درجة منهم بالتفصيل


Sephora Jumbo Liner 12HR wear و اسم الدرجة 09 kaki
هذي الدرجة حلوة و مميزة لونها زيتي لماع بقليتر صغير فضي.. و هو من أقدم الأقلام اللي عندي.. صار له تقريبا ٣ سنوات و شوي و للحين ما نشف و لا تغير!! سويت عنه تقرير مفصل زمااااان أول ما فتحت مدونتي بـ2012 تلاقونه هنا..
سعره بحدود ٧٠ ريال.. و الخبر الحلو إنهم من فترة نزلوا في سيفورا من نفس الأقلام هذي درجات مطفية تجنن و بنفس الثبات.. نزلتها ع انستقرام و ناوية أشتري الوردي.. و يمكن يمكن البني :$ :$

Sabaya Line & Shade و الدرجة رقم 03 
أنا بصراحة للحين مبهورة بهالمنتج من محلات مكياجي!!! كنت أشعر بيأس من هالمحل ما أخفيكم.. لكن هالمنتج و بهالدرجة بالذات يستحق الاقتناء.. لونه بني دافي مطفي و قوامه كريمي جدا سهل دمجه.. و إذا نشف ما يتحرك من مكانه.. صار خياري الأول لما أبي لوك سموكي سريع و ناعم.. سعره ٤٩ ريال.. و ع فكرة فيه منه لون أسود عجبني كمان..

Make Up For Ever - Aqua Matic 
عندي منها درجتين رمادي فاتح بلمعة و قليتر فضي صغير و رقمه D-12.. و الدرجة الثانية وردي غامق مايل للبيج بلمعة و رقمه ME-54.. هذي المجموعة من الأقلام نازلة جديد من كم شهر و مختلفة عن النوعية القديمة اللي عندهم.. قوامها كريمي و سهل الدمج و ضد الموية زي ما قلت لكم.. الدرجة الوردية استخدمتها مرة ع عيوني من الجفن للحاجب مع شوي لاينر بني و مسكرة و طلع اللوك رووعة مرة و الأهم من كذا سريع!! سعرها ما أتذكر بالضبط بس حدود ٨٠ ريال..


يالله نشوف السواتشات و نكمل؟

الحين نجي للأربع اللي ع اليسار:
هذي الأقلام عادية مطفية.. مو ضد الموية.. و قوامها كريمي جددددا.. أحب استخدم النوعية من الأقلام كأساس للبقمنت أو الظلال الفاقعة أو الفاتحة مرة.. لأنها تخلي الظل يمسك بالجفن أكثر و تقوي لونه.. بس مهم تحطون بعين الاعتبار إنه لاااازم قبلهم تحطون برايمر للعين و فوقهم تحطون ظلال بودرة عشان ما تتكتل و تخطط فوق العين.. ممكن تستخدمونها داخل العين عادي بس ما رح تثبت كثير..

بالنسبة لي أحب أستخدم اللون الأبيض أكثر شي بالذات تحت الحاجب قبل الهايلايت.. أما اللون الأسود حلو مع الظلال الدوو كروم اللي تعكس كذا لون و مناسب كمان قبل اللوك السموكي عشان يعطي عمق أكثر..


لأن مفعولهم واحد ما يحتاج أشرح كل قلم بالتفصيل بس باكتب لكم الماركات و الدرجات و الأسعار من اليسار لليمين:

L.A. Girl Pro Primer و اسم الدرجة GEB197 black سعره ٤ دولار
 The Body Shop Matte Kajal الدرجة black و سعره ٤٩ ريال 
 The Body Shop Matte Kajal الدرجة white و سعره ٤٩ ريال
NYX Jumpo Eye Pencil الدرجة اسمها 604 milk و سعره ٥ دولار

إذا جربتوا أقلام ظلال غير اللي ذكرتها هنا اكتبوا لي في التعليقات عشان أقرا عنها و يمكن أشتريها خخ.. 


لا تنسوني من دعاكم

PEACE