Aug 13, 2015

50 under 50 (A Collaboration)

السلام عليكم و رحمة الله..

كيف حالكم..؟ هاه مستعدين للدوامات؟ XD

اليوم أنا مررررة متحمسة لهذا الموضوع لأني تعاونت فيه مع مدونتين تعرفت عليهم من النت و أحبهم و و أثق فيهم و كثير استفدت منهم في السنوات الماضية.. مدونة That Red Lip لأسماء المالكي و مدونة غادة عبدالله .. راح يكون موضوعنا المشترك عن ٥٠ منتج بين التجميل و العناية و سعر الواحد منهم ٥٠ ريال أو أقل.. و بيكون مناسب أكثر للموظفات و كمان للطالبات و ميزانيتهم و تساعدهم في الاستعداد للدراسة إن شاء الله..

 طبعا ما رح تكون المنتجات كلها في موضوعي لأنه بكذا راح يكون طويل و كلامي كثير خخ.. فقسمنا المنتجات بيننا.. في موضوعي راح تلاقون خيارات متنوعة بالنسبة للمكياج و المناكير و في موضوعات أسماء و غادة بتلاقون منتجات أكثر عن العناية بالشعر و الجسم.. فبعد ما تخلصون من موضوعي لا تنسون تزورون مدوناتهم حطيت روابطهم فوق و كمان في نهاية الموضوع ()


يالله نبدأ؟



زبدات ذا بودي شوب للشفايف من المنتجات اللي تعجبني كثير و فيه منها نكهات مختلفة حسب ما تبين.. فيها لون أبيض خفيف يبان ع الشفايف و عشان كذا أحب أحطها قبل النوم و ممكن هاللون الأبيض يفيدك لو تحطينه فوق محدد أو روج غامق يخليه أفتح شوي.. 
و فيه خيار ثاني و هو زبدة الشيا بالحجم الصغير من لوكستان.. الحلو فيها إنها مو بس للشفايف.. تنفع برضو للمناطق الجافة في الجسم أو تخلطين منها شوي مع اللوشنات عشان تزيد ترطيبهم.. لونها شفاف و مالها ريحة.. 

☁ ☁ ☁ ☁ ☁ 



سليك من الماركات اللي جودتها ممتازة و أسعارها مناسبة و الحمدلله صارت متوفرة في صيدليات وايتس.. عندي منها البلشرين هذي (اليمين روز قولد و اليسار سهارا) و أنصحكم فيها لأن البلشرات ألوانها حلوة و مركزة و فيه منها مطفي و بلمعة.. و حجمها صغير جدا ممكن تاخذينها معاك الدوام أو السفر.. و كمان أرواج سليك تعجبني و فيه منها مطفي و كريمي.. حجمها كمان صغير و حلو للشنطة.. 

☁ ☁ ☁ ☁ ☁ 



أما الظلال راح أعطيكم كذا خيار لبالتات عشان تكون جامعة كذا لون و سعرها أوفر..أول خيار هو بالت الظلال من فلورمار رقم P045 و سبق و سويت عنه موضوع كامل هنا.. ممكن نسوي منه لوكات كثيرة و ناعمة و الدرجة الغامقة في البالت حلوة للحواجب كمان.. أما البالت الثاني فهو من سليك و أتوقع تعرفون إن عندهم بالتات كثيييييرة بألوان مختلفة ترضي الجميع (البالت في صورتي اسمه Sunset)..
 و من ضمن الخيارات السريعة في الظلال هي أقلام الظلال الكريمية و من ضمنها هذا القلم من مكياجي مجموعة صبايا.. لونه بني دافي أو زي ما يسمونه "طوبي".. و اللي يعجبني فيه إني لما أكون مستعجلة أحطه بشكل عشوائي ع الجفن و أدمجه بأصبعي أو بفرشة و يعطيني لوك سموكي ناعم و ثابت طول النهار..هذي الدرجة رقمها 03 ..


☁ ☁ ☁ ☁ ☁ 



أكحال قولدن ليدي الألمانية من أفضل الأكحال اللي جربتها و عندي كل الألوان تقريبا زي ما تشوفون..ثااابتة و اللون مركز و واضح.. اللون المفضل عندي هو البني رقم 009.. فيه بنات قالوا لي إنها تحرق جوا العين.. بس شخصيا ما جاني منها أي ضرر.. ممكن تستخدمونها برا العين من تحت أو من فوق لو خايفين تسبب لكم مشاكل.. كتبت عنها زمان في هالرابط


☁ ☁ ☁ ☁ ☁ 




للأسف بالصورة طالع البرونز هذا كأنه صغير.. بس بالواقع حجمه ضخخخم و اقتصادي جدددا!! هو من ماركة فلورمار التركية و اللون اللي بالصورة رقم 5.. ليش هالدرجة بالذات لأن التون حقها بارد و مناسبة جدا للكونتور.. فيه كمان درجات ثانية لو أنت تبين اللون مايل للبرتقالي أو البرونز.. صحيح فيها قليتر صغير بس ع الخد ما يبيّن.. تقدرون تشوفون حجمه و تفاصيل عنه و عن بودرات برونز ثانية في هالرابط 


☁ ☁ ☁ ☁ ☁ 





لو متابعيني من زمان تعرفون قد إيش أحب إيلف و عندي كثيييير أشياء ممكن تدخل في موضوعنا و سعرها أكيد أقل من خمسين ريال.. لكن اخترت أكتب لكم عن هالمنتجين بالذات لأنكم دايم تسألوني عن إضاءات سعرها رخيص و ذات جودة.. ع اليمين النوع الكريمي و حجمه صوغنن لكن يدووووم معاك كثير و لمعته قوية جدا ما تحتاجين إلا نقطة.. ممكن تستخدمينه لوحده أو تخلطينه مع الأساس أو لوشن الجسم و يعطيك لمعة جميلة..أما ع اليسار فهي علبة برونز أصلا بس أفتح درجة و شخصيا أشوفها حلوه كثير كإضاءة للوجه.. إذا تبون تشوفون وش أحب من إيلف كمان ارجعوا لصوري في الانستقرام دايم أحط عن منتجاتهم هناك :)



☁ ☁ ☁ ☁ ☁ 




أرواج نكس NYX المطفية أحببببهم.. اللون فيها يبان من مسحة وحدة ع الشفايف و قوامها كريمي و ناعم بس مظهرها ع الشفايف مطفي.. ثباتها حلو و سعرها حلو و كل شيء فيها حلو خخ.. موجودة في سنتربوينت و ممكن تلاقون ألوان أكثر لو اشتريتوها من النت.. أنصحكم بلون ميرلو Merlot (أول واحد بالصورة) لونه مزيج بين الفوشي و الأحمر و الموف و البني.. فخم جدا و مميز!! 


☁ ☁ ☁ ☁ ☁ 





أرواج ويت آند وايلد طبعا الكل يعرفها.. هي تباع بأمريكا بأقل من ٣ دولار بس صاروا التاجرات و المحلات عندنا يوفرونها و صار سهل للبنات إنهم يحصلون عليها.. لونها حلو و واضح و ثباتها ممتاز و قوامها شبه مطفي.. سويت عنها تقرير مفصل هنا..  


☁ ☁ ☁ ☁ ☁ 




مناكير ذا بودي شوب من أفضل تركيبات المناكير عندي.. اللون واضح و طبقتين بالكثير تكفي و تنشف بسرعة و لها لمعة جميلة.. و ألوانها متعددة و متوفرة في كل مول.. حبيت أوريكم أكثر لون مميز فيهم و اسمه Hemp over Heels و كل ما حطيته تجيني أسئلة عنه.. زيتي فاتح مايل للتفاحي و الأصفر.. حلو و الله و جربوه بالمحل في أقرب زيارة للسوق..

☁ ☁ ☁ ☁ ☁ 




من المناكير اللي أحببببها بعد هي مناكير فلورمار.. اللون قوووي و واضح و تنشف بسرعة و سعرها جدا رخيص بس جودتها عالية.. سويت تقرير زمان عنها مع سواتشات لبعض الألوان هنا.. بس مبدئيا أنصحكم تجربون هاللون الكحلي رقم 433 يهببببل ()


☁ ☁ ☁ ☁ ☁ 





مناكيرات سيفورا تهبل و حجمها نقطة و عندهم تنوع كبير في الـ top coats.. اللون فيها قوي و تنشف بسرعة كمان.. و المناكير الميتالِك عندهم تجنن و خصوصا هاللونين.. ع اليمين فضي مايل للذهبي شوي و مطفي رقمه 73 و ع اليسار فضي لممممااااع رقمه 74.. فيه عندهم لون ذهبي بعد ناوية آخذه في المستقبل رقمه 72..


☁ ☁ ☁ ☁ ☁ 





و أخيرا فرشة الـ وت برش The Wet Brush عندي إياها بالحجمين الكبير و الصغير و كل الإثنين سعرهم أقل من خمسين ريال.. ميزتها تفك التشابك بسرعة و تستخدم مع الشعر جاف أو مبلول و فيه منها كذا لون عند صيدلية وايتس.. أنا حبيت الصغيرة منها لسببين.. الأول: إن حجمها مرررة حلو و مناسب للشنطة.. و ثانيا: ألاحظ دايم الفرش الصغيرة للشعر ما تمشط زين لكن هذي العكس تماما!!

☁ ☁ ☁ ☁ ☁ 


و بكذا خلص جزئي في موضوع ٥٠ منتج بـ ٥٠ ريال أو أقل.. إن شاء الله أعجبكم و استفدتوا.. لا تنسون تروحون ع مدونة أسماء و مدونة غادة عشان تكملون بقية المنتجات.. و لو فيه عندكم اقتراحات أكثر لمنتجات حلوة و أعجبتكم اكتبوها لي في التعليقات تحت سواء تجميل أو عناية..


لا تنسوني من دعاكم 
PEACE

10 comments

  1. البوست جمييل ق٢٢ ، وفكرة التعاون مرره عاجبتني ماقصرتوا الصراحة ابدعتوا

    ReplyDelete
  2. جميل جميل جميل! ما شاء الله الفكرة كثير اعجبتني و موضوع مررررة يشد بس ياليت حطيتي اسعارهم... اذا تعرفين و ماركت سليك اول مرة ادري يبيعونها بوايتس، مشكورة!

    ReplyDelete
    Replies
    1. هي كل الأسعار تحت ٥٠ ريال..
      بحاول خلال هاليومين أضيفها و لا يهمك :)

      Delete
  3. البوست رائع و جدا مفيد استمتعت و انا اقرأ، مشكورة

    ReplyDelete
  4. يعطيك العافيه شغل ممناز وحلو التعاون اللي كذا
    تعليقي على فرشه الشعر في منها في نزيه بــ 15 ريال نفس فرشه وايتس

    ReplyDelete
    Replies
    1. الله يعافيك..
      نفس الماركة قصدك و لا نفس الفكرة؟؟

      Delete
  5. انا من متابعات اسماء
    حبيت فكرة التعاون
    يعطيكم العافية

    ReplyDelete
    Replies
    1. هلا و الله حياك الله..
      و إن شاء الله تعجبك مدونتي كمان
      ()

      Delete

© ●terter thinks● | All rights reserved.
BLOG TEMPLATE HANDCRAFTED BY pipdig