Jul 3, 2013

Sephora So Colorful and GIVEAWAY..!!! :D

مرحبا..
يوم 19 يونيو من الشهر الماضي دعتني سيفورا لحضور الإيفينت حق مجموعاتهم الجديدة
ما أخفيكم إني قرأت عنها كثير قبل و كنت متحمسة لها مرررة..
و أهمها مجموعة الظلال الجديدة و راح تكون بدال المجموعة القديمة
و مجموعة قولد فور إيفر و فيها ظلال توكن الأربعة token مع أربعة جل لاينر بنفس الألوان
و 3 تاتو مؤقت بأشكال جميلة
و من المجموعات الجديدة 52 لون مناكير جديدة و 8 مناكير تأثيرات..

أول ما وصلنا ع مقر الإيفينت و كان سيفورا رد سي جدة .. كنت ثاني وحدة واصلة عند الباب
و أنتظر متى يفتحون المحل.. و شوي شوي كان المكان يزدحم خصوصا إن سيفورا قدمت هدية
لأول 10 أشخاص يدخلون المعرض..! لأني بلوقر دخلت قبل و صارت لي فرصة أشوف
المجموعات و أصورهم قبل..


أول شي رحت له هي ظلال توكن من مجموعة قولد فور إيفر


زي ما تشوفون بالصورة عبارة عن 4 ألوان و أكثر لونين متحمسة لهم هم الذهبي و الفوشي
فيهم لمعة مرة قوية و يصلحون للسهرات..
أساميهم : الذهبي gold casino و الأزرق blue casino و البنفسجي purple casino
و الوردي 
pink casino

فيه الجل لاينر (الأكحال الكريمية) بنفس الألوان حقت الظلال بس للأسف نسيت أصورها
 و أسعارها حلوة حسب ما أذكر حدود 70 ريال


و آخر شي من مجموعة قولد فور إيفر هي التاتو..
 

مرة حبيتهم.. في الأصل هم 3 أشكال مرساة و نجمة و جمجمة.. بس ما جابوا الجمجمة عندنا

و التاتو ع صورة المودل حلوة شوفوا :
 

و كمان على يد موظفة من سيفورا عشان تشوفونها ع الطبيعة .. سعره تقريبا 60


و شفته وحدة حاطته ع الخد جنب عينها و عجبني و الله بس ما قدرت أصور وجهها ههههههه..

بعد كذا رحت بسرعة ع الظلال.. أنا من قبل تعجبني ظلال سيفورا بس كيف بعد ما طوروها
و زادوا فينيش جديد لها اللي هو الميرور mirror..
خلونا نشوف الصور

 


أول شي لاحظته في علب الظلال الجديدة إنها صارت أنحف شوي من قبل بس الكمية نفسها
و العلبة صار فيها فتحة ع جنب تقدرون تطلعون اللون من العلبة و تحطونه في بالت
البالت من عندهم تاخذينها مجانا إذا شريتي لونين ظلال.. (راح أوريكم شكله في نهاية البوست)

الظلال عبارة عن 4 أنواع :
قليتر إيفكت glitter effect : و هو شيمر مع قليتر صغير ..و منه 23 لون
مات إيفكت matte effect : ظلال مطفية و هي 16 لون
شيمر إيفكت shimmer effect: ظلال بلمعة و هي المفضلة عندي و الأكثر عدد في المجموعة 34 لون
ميرور إيفكت mirrior effect : و هذا النوع الجديدة اللي ابتكرته سيفورا و عبارة عن 4 ألوان
صعب وصفه حقيقة بس تقريبا أقول لكم إنه مزيج بين شيمر قوي و قليتر صغير مرة..
سعر الظل الواحد 76 ريال بالضبط  و لقيت لكم فيديو فيه سواتشات لكل الألوان
شوفوه و تمتعوا :$


نجي ع المناكيرات... طبعا غيروا العلب و شكلها.. و صارت اسطوانية تقريبا
 

و سعرها 36 ريال.. و مثل ما قلت لكم صار عدد الألوان 52 لون منها الشيمر و الكريمي و المعدني
و فيه بعد مناكير تأثيرات top coats و هي 8 أنوع :
2 منهم تأثير التكسير و ألوانهم فضي و أسود
2 تأثير جلد التمساح و ألوانهم ذهبي و أسود
1 تأثير رخامي أتوقع أسود
1 يعطي تأثير الجل مانكير
1 قليتر ذهبي متعدد الأحجام
1 يعطي تأثير الأومبريه (راح أحكي لكم عنه في ريفيو قريب إن شاء الله ع الانستقرام)



و الظريف إن كل الموظفات في سيفورا كانوا حاطين ألوان مختلفة من  المناكير ع أظافرهم..
مرة حبيت الحركة و دخلت في مود الألوان و الله
 
 
آخر شي كان فيه ركن للتصوير مرة جميل و جنبه زي الستاند فيه زينات
 
 


و فيه كمان شي ذووووبني.. مسوين كوكيز على شكل علب ظلال ..
شوفوهم في الستاند :
 
 

و فيه كب كيك صغير بأشكال أنثوية.. أرواج و شفايف و فرش و مناكير و في النص اسم سيفورا
 
 
 
 
هالشغلات الحلوة هذي أشرفت عليها علا الجندي من أو لا لا Oh! lala
و هذا موقعهم لو حابين تنظمون حفلات أو مناسبات
www.ohlalaboutique.com


سيفورا كانوا لطيفين معنا و أعطونا لونين ظلال و بالت..
 
 

الظلال اللي أعطونا إياهم رقم 60 و اسمه diamonds are forever
و هو ظل فضي فاتح بشيمر.. حبيته كثير.. و الظل الثاني من تأثير الميرور الجديد الخاص بسيفورا
و رقمه 56 و اسمه queen of the day رمادي غامق هو زي المراية من تركيز اللمعة ..
و فيه قليتر خفيف و في رأيي لما حطيته لحاله فوق برايمر ما عجبني كثير و ما عطاني نفس التأثير اللي بالعلبة
لكن لما حطيت كحل أسود كريمي ع جفني بعدين حطيت هذا فوقه طلع حلوووو مرة.. يعني أنصحكم دايم
تحطون شي كريمي قبله ظل أو كحل.. أو تستخدمونه رطب..
 
 
و عطونا البالت الفاضي.. زي ما تشوفون في الركن تحت فيه زي المفتاح صغير
يساعدك تطلعين الظل من العلبة .. تمنيت إنهم حطوا 4 خانات للظلال بدل ثلاثة
عشان يصير البالت مفيد أكثر في رأيي..

و خلونا نختار 4 ألوان مناكير من عندهم..  هذي المناكيرات اللي اخترتها

أول لون غريب شوي و جميل.. و لفتني جاي ما بين البنفسجي و الرمادي و البني..!
رقمه L17 و اسمه go for bad boys
 
 
ثاني لون مرة حبيته تركواز غامق مايل ع أخضر أو أزرق.. معه شيمر
رقمه 62 و اسمه full moon party
 
 
ثالث لون برتقالي فاتح .. هو لون مميز بصراحة ما أشوف برتقالي فاتح زي كذا كثير
بس ممم.. مو من الألوان اللي أميل لها في الغالب..!! تحسفت إني اخترته و تمنيت إني خذيت أسود
لأن ما عندي مناكير أسود سادة أو لو أخذت اللون الأخضر الفاتح أو التيفاني.. بس يالله ما عليه
هو كـ لون مو سيء.. بس أنا ما أميل كثير له في الوقت الحالي.. ممكن بعدين أحبه خخ
رقمه L37 و اسمه hot & spicy
 
 
آخر شي هذا مناكير تأثير الأومبريه أو التدرج أو الـ tie dye
لونه شفاف تقريبا بس فيه شوي أزرق.. انتظروني في ريفيو سريع عنه ع الانستقرام
حلوة المناكير  في قوامها و لمعتها و تنشف بسرعة .. بس  بعضها يحتاج طبقات عشان يطلع اللون مضبوط

و صورت لكم الزينة و الكوكيز ..
و الحين صاروا من الماضي أكلناهم أنا و أخواني بالعافية علينا خخ
كانت فرصة حلوة إني قابلت كذا بلوقر من جدة : جوجو و أختها.. و وفاء و سماهر.. يا ربي تسعدهم
شكرا لكم سيفورا :$
 
 
و لأني أحبكم كثييييير و حابة أشكركم ع وجودكم معاي طول الفترة الماضية
قررت أنا و سيفورا نعطي 3 بنات (فائزات) من السعودية فرصة لتجربة المنتجات الجديدة
كل عام و أنتم بخير..
راح تشمل الجائزة : بالت مع ظلين و مزيل مكياج العيون و 2 مناكير و 1 مناكير تأثير و مزيل مناكير..!!
بالله فيه عيدية أحلى من كذا..؟
كل اللي عليكم تسوونه هو تسوون فولو لي ع تويتر @TaRaNeeM
و تكتبون تغريدة عن مجموعة سيفورا الجديدة برابط الموضوع هذا
و تسوون لي منشن عشان أشوف التغريدة و أسجل أساميكم في المسابقة
و تدعون لي.. بس!! :$

المسابقة راح تبدأ من اليوم و إلى 31 يوليو.. و يوافق 23 رمضان.. يعني تقريبا معاكم 3 أسابيع
و هنا مثال للتويتة و ممكن تكتبون بأسلوبكم و بالإنجلش لو حبيتوا:
"مجموعة سيفورا الجديدة تشمل ظلال و مناكير مميزة شوفوا التفاصيل على (رابط هذا الموضوع)
@taraneem "
 
 
 
يالله أنتظركم.. و كل عام و أنتم و سيفورا بخير


7 comments

  1. بيكون قرعه ؟ يعني يصير اكتب اكثر من مره

    ReplyDelete
    Replies
    1. لا يكفي بس مرة وحدة .. إيه قرعة و بختار 3 إن شاء الله

      Delete
  2. جميل جدا تاتو النجمه
    و كل عام و انتٍ بصحة و سلامه


    ~ توافيق

    ReplyDelete
    Replies
    1. الله يجمل حالك...
      :$ :$

      Delete
  3. انا اشتركت بس كيف اعرف انو مشاركتي وصلتك؟؟

    ReplyDelete

© ●terter thinks● | All rights reserved.
BLOG TEMPLATE HANDCRAFTED BY pipdig