السلام عليكم و رحمة الله
كيف حالكم؟ اليوم بأكلمكم عن ماركة ستار سكن الكورية و أركز على أفضل ٣ منتجات جربتها و في نهاية الموضوع فيه مفاجأة يا رب تعجبكم
في البداية حابة أعطيكم معلومات عن الماركة.. هي ماركة كورية/سويسرية تأسست سنة ٢٠١٥ و تعبر جديدة مقارنة بغيرها لكن القايمين عليها لهم خبرة ٢٠ سنة في مجال العناية.. و في سنة و نص من تأسيسها فازت بـ١٥ جوائز غير التزكيات من المجلات الكبيرة مثل فوق و قلامور و ماري كلير.. متوفرة في الخليج في محلات سيفورا و بأمريكا موجودة في بارنيز و بأوروبا موجودة في سيلفريدجز و دوقلاس و هارفي نيكلز..
ببدأ بأول منتج حبيته من أول استخدام و هو قناع الـ ٧ الصباحي.. هذا القناع مستوحى من نظام المرآة الكورية و خطوات العناية الكثيرة اللي تسويها عشان بشرتها بتكون صحية و نضرة : تقشير و مساج و تونر و ترطيب و سيروم و قناع و برايمر قبل المكياج!
الفرق إن هذا المنتج واحد بس لكن يختصر عليك كل هالخطوات في ثواني قليلة.. بصراحة لو وقتك ضيق مرة في الصبح و مشغولة جدا أنصحك فيه..
يحتوي على ٢٠ قطعة و أول ما تفتحون العلبة تلاقون ملقط صغير عشان تاخذين قطعة كل صباح بدون ما تتأثر البقية في العلبة و تستخدم هذي القطعة على بشرتك بعد غسلها و تجفيفها مباشرة.. بتلاحظون فيها جهتين.. جهة خشنة شوي على و جهة ناعمة.. تستخدمين الجهة الخشنة على الوجه و الرقبة و بعدين تقلبين القطعة على الجهة الناعمة و توزعين باقي المنتج على الوجه.. شخصيا أحس القطعة الوحدة فيها منتج كثيييير و صرت إذا خلصت من وجهي أمررها على اليدين و الذراعين لين تنشف تماما ههههههه.. و فعلا ما عاد أحتاج أحط أي شي بعده و بشرتي ناعمة و مترطبة
المنتج الثاني اللي جربته هو قناع تقشير القدمين.. حاولت أصوره بحالة جيدة لكن العلبة وصلت ليد بنتي أسرع مني ههههه.. موجود فيه شراب مع مادة مقشرة و يستخدم مرة وحدة على قدمين نظيفة و ناشفة من ٦٠ لـ ٩٠ دقيقة و بعدها تغسل القدمين زين.. مكتوب النتيجة تبان في مدة تتراوح بين ٧ و ١٠ أيام
مشيت ع التعليمات بالضبط لكن الوسواس القهري قال زيدي الوقت كمان ٥ دقايق هههههههه.. أول نص ساعة ما حسيت بشي بعدين بديت أحس بحرارة بسيطة و راحت لما خلصت المدة و شلته و غسلته.. أول يومين أو ٣ ما شفت أي نتيجة بس رجلي شكلها جاف جدا!! تواصلت معاهم و قالوا اليوم الخامس بتشوفين النتيجة و يبدأ الجلد يتقشر لكن ما صار شي!! جاني شوي احباط و رحت أبحث في قوقل عن حل و لقيت كثير ناس يقولون لازم ألبس شرابات بعد العلاج هذا لمدة أسبوع و قلت ليش لا.. و فعلا مع الشرابات في ٣ أيام تقريبا أغلب الجلد الميت و الجاف تقشر و بدا يظهر الجلد الجديد الناعم اللي تحته.. مكتوب إنه يستخدم مرة بالشهر أو مرة واحدة كل شهرين.. ناوية اشتريه بعدين و أجرب استخدمه و ألبس شرابات علطول..
المنتج الثالث نصحتني فيه الخبيرة في إيفنت سيفورا الأخير لما شرحت لها مأساة شعري (طويل - تالف - مصبوغ) و قالت راح يعجبك و يرجع الرطوبة و الحياة لشعرك.. لما ذكرت لي إن أهم مكون فيه هو زيت جوز الهند وقعت في الغرام مباشرة لأني أحبه كثيير لشعري و إضافة عليه فيه زيوت مغذية ثانية ما أعرف أساميها بالعربي لكن موجودة ع الغلاف الخلفي للقناع بالصورة..
يجي في العلبة مغلف الزيت و غطاء للشعر و يستخدم مرة وحدة.. لشعري الطويل أحس الكمية مناسبة بس لو شعرك قصير أتوقع يكفيك استخدامين أو ثلاثة.. ضروري يسخن الزيت قبل الاستخدام بطريقتين إما تحطين المغلف قبل الفتح في المكرويف لمدة ٢٠ ثانية أو تحطينه قبل الفتح في كوب موية حارة لمدة ٣٠ ثانية.. انتظري شوي يبرد الملغف و افتحيه و وزعيه على الشعر من الجذور للأطراف و غطيه و خليه على الأقل ٢٠ دقيقة و يفضل يحط بالليل لين الصبح و يغسل مرتين عشان ينظف الشعر منه.. حطيته بالليل و نمت و صحيت و غسلت شعري و حبييييت النتيجة مرة!!
فيه منتجين لسا ما جربتهم بس أحسهم حلوين لسهرة بنات لأنها دانتيل و تحمس حقيقي
الفترة الماضية كنت مشغولة جدا و عندي مشاوير ما تنتهي و ما قدرت أجرب منتجات أكثر لكن ستار سكن حبيت تعطي ٣ من متابعاتي فرصة تجربة المنتجات بأنفسكم و و يعيشون جو المتعة مثلي..
و هذي هي الشروط عشان تشاركون في السحب على الهدايا:
١- تكونين من السعودية أو الكويت أو الإمارات
٢- تتابعين حساب ستار سكن @StarSkinBeauty و حسابي @terter_thinks على الإنستقرام
٣- تختارين صورة واحدة فقط من موضوعي هذا و تنزلينها في حسابك على الإنستقرام مع تاق لستار سكن و لي و منشن لـ ٣ من صديقاتك تحت صورتك
٤- يكون حسابك حقيقي و مستخدم و يكون مفتوح يوم ٥ مايو عشان السحب
٥- ممكن تضاعفين فرصة فوزك إذا خليتي صديقاتك و أقاربك يشاركون
أتمنى لكم التوفيق و لا تنسوني من دعاكم
PEACE
