Colourpop Pressed Eyeshadows

السلام عليكم..  كيف حالكم جميعا؟

اليوم راح أشارككم تجربتي مع ظلال كلر بوب المضغوطة اللي نزلت قبل فترة و سببت ضجة كبيرة في كل مكان.. قررت أطلب تركيبات مختلفة و بحثت عن سواتشات و تقارير في النت كالعادة قبل أي طلب عشان يكون عندي تصور واضح و تقريبي عن المنتجات.. طلبت في وقت كان عندهم خصم ٢٠٪ على الموقع كله.. سعر الظل الأساسي ٥ دولار و بعد هالخصم صار بـ٤.. قبل ما أنزل الموضوع بدقائق رحت أشوف الموقع لقيت الظلال لسا عليهم خصم.. يمكن يكون الخصم بسيط لكن يفرق في المجموع الكلي للطلب بالنسبة لي.. 

زي ما تشوفون أخذت ٣ ظلال بلمعة و ٣ مطفية راح أشرحهم لكم بالتفصيل من اليمين لليسار بداية بالصف العلوي و بعدين السفلي:

Come and Get it
هذا الظل مميز و من الأكثر مبيعا عندهم و كنت مترددة كثير فيه بس لما وصلني و جربته وقعت في غرامه.. تركيبته duo chrome يعني يعكس لونين ذهبي و وردي غامق مرة يجمل شكل العين و ممكن يستخدم في مدمع العين مع أي ظلال غامقة.. تركيبته ناعمة زي الزبدة و سهل التوزيع و الدمج.. من الدرجات اللي تستحق الاقتناء.. 

Double Date
خفت يجيني شيء لو ما طلبت بنفسجي ههههههه.. كنت متحمسة له جددددا و لما وصل طلبي و سويت له سواتش للأسف ما حبيت التركيبة.. ناشفة شوي مو ناعمة زي الدرجة اللي قبلها و لازم مجهود لين أوصل للون حلو و متساوي ع الجفن.. لكن لأنه رخيص نوعا ما تقبلته و استخدمته و مشى حاله لكن مو المفضل عندي

Boxer
هذا البني فيه نفس مشكلة Double Dare أحسه ناشف مرة و غير كذا ما يلمع على الجفن كثير كأنه ساتن مو شيمر.. خيب أملي مرررة..

Say I Do
هذا الظل حطيته بالسلة في آخر لحظة و الحمدلله إني طلبته.. وردي فاتح مطفي تركيبته نااااعمة مرررررة كأنه زبدة.. 

143
هذا الظل سيء بس ما أقدر أتحلطم عليه هههههههه.. هو لونه بنفسجي مايل للفوشي مررررة حلوة لكن مشكلته مرة ناشف لازم شغل كثير عشان يطلع حلو على العين.. ليه ما أقدر أتحلطم؟ لأن أغلب التقارير في النت تقول قوامه سيء لكن قلت في نفسي يا أمل جربيه يمكن يعجبك و يطلع حلو عكس كلامهم خخ.. يالله الحمدلله إنه رخيص ما خسرت فيه كثير

Paper Tiger
هذا اللون هو سبب طلبي من الموقع لأني من زماااان أدور على لون زي كذا.. بين الأصفر و البني و البرتقالي لأنه يناسب المكياج السموكي لما ينحط في كسرة العين و ممكن ينحط على كامل الجفن.. و الحمدلله توفقت فيه و جاء مثل ما أبي بالضبط.. قوامه مطفي و ناعم و سهل دمجه.. 

Tiger Paper - 143 - Say I Do - Boxer - Double Date - Come and Get it

حاليا أنا حاطتهم في Z palette و علطول يثبتون ما يحتاجون مغناطيس إضافي.. و فيه في موقع كلر بوب بالت مقارب و رخيص كمان يعني لو حابين مرة وحدة تاخذون ظلال و بالت بالمرة.. 

باختصار هي تجربة حلوة و أكيد لو لفتتني ظلال ثانية منهم راح أشتريها.. صحيح بعض الظلال ما أعجبني قوامها لكن مو سيء لدرجة تخليني ما أستخدمها!!! مع برايمر كويس و صبر بأحللها إن شاء الله.. عاد الحين الشيطان يوسوس لي آخذ بالت البلشرات الجديدة من مجموعة Fem Rosa بس مدري أتماسك و لا ما أتماسك خخ..

شاركوني تجاربكم مع كلر بوب و إذا عندكم لون معين حلو تنصحوني فيه يا ليت تكتبون لي اسمه في التعليقات.. و لا تنسوني من دعاكم

PEACE