Less Stuff, Less Stress

السلام عليكم..

كيف حالكم؟ اليوم حابة أتكلم عن موضوع خارج عن التجميل شوي و يا رب يعجبكم و يا ليت تقولون لي بعد القراءة هل تبون أستمر أحط موضوعات من الحياة زي كذا مستقبلا و لا لا؟

أختي من ثلاث سنوات تقريبا صارت عايشة نمط الـ minimalisim.. و هذا النوع من أنماط الحياة يعتمد على امتلاك الشخص أشياء ضرورية و أساسية فقط يعني بشكل عام يكون عنده أشياء قليلة.. لهذا النمط من الحياة شرح كثير على النت و أفكار مالها حصر فما رح أتوسع كثير في هالنقطة لكن من بعد ما صارت أختي minimalist و أنا تغيرت نظرتي للأشياء.. ما أقول إني صرت زيها لأن ما شاء الله هالشي يبي له قوة جبارة.. لكن حاولت أحسّن نمط حياتي و أحاول أقلل من اللي عندي و لاحظت حياتي صارت أسهل و صرت مسترخية أكثر.. في هذا الموضوع بأعطيكم بعض النقاط اللي قرأتها و سمعتها و ساعدتني في ترتيب حياتي و تقليل الأشياء و الفوضى من حولي و يمكن بعضها معروف بس لا مانع من التذكير.. و عشان أهيء لكم جو ممتع للقراءة حطيت لكم بعض اللقطات اللي صورتها و يا رب تعجبكم..

لا للأشياء الكيوت!
هذي أهم نقطة ساعدتني أخفف من الأشياء و الفوضى و بديت فيها من ٤ سنوات تقريبا.. كنت زمان إذا رحت السوق أشتري مشبك "كيوت" و لا تحفة حلوة أو أوراق رسائل و أظرف ملونة أو أكواب جميلة.. دبدوب صغير أو ميدالية عليها رسمة أو شكل عجبني !! و صارت الأشياء هذي تتجمع عندي و ما أستخدمها و حتى مرات ما أشوفها كثير لأنها محبوسة في الأدراج.. صرت شجاعة و تخلصت من معظمها في أماكن متفرقة بين الأصحاب و الأهل و بعضها استخدمتها في المدرسة مع طالباتي.. و الحين إذا رحت السوق و شفتها خلاص أشبع عيني منها هناك و أخليها ما أشتريها و بكذا الحمدلله وفرت مساحة في بيتي بالمرة وفرت فلوسي!


لا للأشياء الكيوت! (الجزء الثاني خخ)
من ضمن الأشياء اللي تسبب الفوضى في البيت هو الاحتفاظ بتغليفات الهدايا و علبها الكيوت.. مو بس الهدايا كمان مرات نشتري شي و نستمر نحتفظ في الكرتون حقه أو الكيس.. بالنسبة لي مثلا المكياج.. أحيانا تعليب المنتجات يكون حلو و يعجبني و أجمعه في درج لين اكتشفت إن هذا الدرج عبارة عن زبالة حقيقة!! ليش يا أمل ليش!! و الغريب إني محتفظة فيها بدون ما أرجع لها يعني تقريبا هي منسية مالها داعي.. و الحل إني رميتها كلها بقلب جامد و صار عندي درج فاضي يفيدني و يوسع علي.. أستثني من هذي النقطة علب الشنط و الجزم الـ high end الغالية والفخمة لأن علبها مصنوعة عشان تحافظ عليها و في حالة بغيتي تبيعين شي منها فالأحسن تبيعينها بالعلبة حقتها عشان ما يقل سعرها و بالتالي تستفيدين..



بلاش ديكورات
يالله قد ايش صار البيت مريح لما صارت أسطح الطاولات فاضية و الرفوف ما فيها إلا المهم من الكتب و الأدوات!! التحف و اللوحات الكثيرة بالنسبة لي عبء مع الوقت.. تجمع الغبار و الزغب و تنظيفها ياخذ وقت كان أولى أسوي فيه شيء مفيد لنفسي أو استرخي ع الأقل.. في بيتي كله الحين ما فيه إلا ٤ تحف!! ٢ منها عزيزة علي لأنها هدية من إخواني و الحمدلله تنظيفها سهل و الثالثة اشتريتها من زمان و تعني لي الكثير.. الرابعة قاعدة أفكر جديا إني أتخلص منها قريب.. و ممكن تزينين بيتك بديكورات مفيدة فعلا!! يعني مثلا علبة مرتبة في الصالة تستخدمينها للمفاتيح أو الفواتير ..شمعة شكلها حلو و بالمرة تعطي جو و ريحة للمكان.. أو علبة مناديل جميلة.. و لو حابة و لابد من التحف و الزينة فحاولي قدر الإمكان تكون سهلة التنظيف و عددها قليل..


   واحد غالي و لا عشرة رخاص
هنا أتوقع الأغلب راح يوافقني.. بدل ما نشتري مجموعة شنط و جزم و اكسسوارات و ساعات رخيصة و تخرب بسرعة و تاخذ حيز بالدواليب نشتري غالي و مرتب يعيش و ما رح ياخذ مساحة كبيرة.. هالنقطة راح تعودتك تدربين نفسك ع التوفير عشان تجمعين اللي يكفي لشنطة الأحلام بدل بعزقة الفلوس يمين و يسار..


مو عيب نهدي الهدية
لا ننكر إننا كلنا سوينا هالشي في مرحلة من مراحل حياتنا.. كم مرة جتك هدية و كانت شيء تكرهينه؟ أو مو مقاسك؟ مو على ذوقك؟ كثيييير تصير.. و مو معقول يعني أحتفظ فيها كلها بالرغم من عيوبها عشانها هدايا من ناس نحبهم؟ الفكرة من الهدية هي إنك تشعرين بحب الشخص هذا و امتنانه لوجودك في الحياة أو رغبته إنه يسعدك أو يبين لك إنه يتذكرك.. و شعور الحب و الاهتمام هذا وصلك خلاص مع الهدية.. إذا الهدية عاجبتك و على ذوقك خير و بركة و شيء جميييييل.. و إذا لا خلاص تصرفي فيها إما أهديها أو عطيها أحد يبغاها أو تبرعي فيها و وفري مساحة في بيتك لشي أهم.. تذكري مو عيب نهدي الهدية.. العيب هو تجميعها عندنا و هي ممكن تفرح و تسعد غيرنا و تفيده أكثر..



الفلوس راحت و لا راح ترجع
ياما اشترينا أشياء ما تناسبنا سواء مكياج أو ملابس.. و للأسف في الخليج سياسة الترجيع و التبديل في المحلات غالبا مو مرنة و ممكن ترجعين أشياء قليلة عكس برا كل شي ممكن يرجع أو يتبدل.. المهم في موضوعنا إنه إذا اشتريتي شي و ما أعجبك أو مو على مقاسك من الملابس رجعيه بسرعة قبل انتهاء مدة الترجيع (اللي هي ٣ أيام بالعادة) و خذي فلوسك أحسن.. لا تتأخرين و تضطرين تبدلين أو تنتهي المدة و تبتلشين في هالقطعة.. و لو صارت ظروفك ما تسمح و قعدت القطعة عندك حاولي تشوفين أحد ممكن ياخذها منك أو تبرعي فيها للمحتاجين و لا تقولين غالية باحتفظ فيها عندي!! لو خليتيها عندك ما رح ترجع الفلوس و لا راح تستخدمينها.. حرام خلي وحدة ثانية تستمع فيه و تحلل قيمته و نفس الشيء بالنسبة للمكياج و العطور لو ما ناسبك منها شيء علطول أعطيه غيرك قبل يخرب و تنتهي صلاحيته..!!! صحيح تخسرنا فيها بس هذي الخسارة قد تكون فوز لشخص ثاني و كمان درس لنا نكون أحكم و أكثر رويّة في الصرف و الشراء..


ما راح أقراه مرة ثانية
من الأشياء اللي كنت أجمعها و احتفظ فيها هي الكتب.. بس لمتى يعني كل كتاب أشتريه أحتفظ فيه!! ما عاد عندي مساحة في مكتبتي و منطقيا ما رح أشتري غيرها لأن بيتي جدا صغير و لا راح أوقف قراءة لأن ما عندي مكان!!! و اتخذت قرار إني أتخلص من كتبي و أخلي غيري يستفيد و يتنوّر.. فاحتفظت بالكتب المرجعية اللي أحتاجها في شغلي و بعض الكتب اللي من جد أرجع لها و أقراها دايم.. و الباقي أخذته للمدرسة للطالبات و بعضها أعطيته صديقاتي و زميلاتي في الدوام.. و فيه حساب جديد وجدا و جميل يستحق الدعم على الانستقرام يساعدك تتخلصين من الكتب الفائضة عن حاجتك و تعطينها اللي مهتم فعلا يقرأها.. هنا الرابط و فيه شرح مفصل لكل شيء يهمكم تعرفونه 


وين فردة الشرابات الثانية؟ 
فيه أشياء حولنا في البيت مالها داعي و تزيد الفوضى و من ضمنها الشرابات (الدلاقات socks) اللي فيها فردة ضايعة و تقعد في الدرج فترة على أمل ربي يجمعها بنصفها الثاني هههههههه.. هذي الفردة المسكينة تخلصي منها خلاص إذا من جد ما لأختها أثر.. كمان دليل الإرشادات للأجهزة.. غالبا راح تلاقينها أونلاين في ملف PDF في حال احتجتي ترجعين لها.. للإحتياط ابحثي قبل ترمينها لو لقيتي خلاص ارميها و خففي على نفسك.. و كمان البروشورات و بطاقات دعوة الزفاف و غيرها من الأشياء اللي ماهي مفيدة حقيقي بس نحتفظ فيها أو ننسى نتخلص منها..



كوني صادقة مع نفسك
من الأشياء اللي كانت تخلي دولابي حايس و مليان هو كثرة القطع اللي عندي و اللي فعلا ما أحبها و لا تناسبني!! و السبب اللي خلاني أشتريها زمان هو تأثير اللي معي بالسوق وقتها.. أنا أحب ألبس غامق أسود عودي كحلي رمادي و مرات ألبس نيلي و أحمر بس قليل مرة.. بس في السوق مع صديقاتي و لا أهلي يقولون لي جربي هذي البيضاء بتطلع حلوة..جربي البيج.. جربي جربي جربي..!!!! و حقيقي كنت أقول أوكي بأجرب و في النهاية ألبسها مرة مرتين و أتحسف.. الحين خلاص القطعة بالسوق مو عاجبتني من داخل ١٠٠٪ و مو مقتنعة فيها كفاية ما رح أجربها لأن هالتجربة فيها خسارة فلوس و زيادة فوضى بالدولاب..


تحدي الشهور 
هذي الفكرة جدا ممتازة ابتكرتها المدوِنة حنان من Chat with Hanan.. فكرتها تناسب اللي عندهم منتجات عناية و عطور و مكياج كثييير.. تبدين الشهر بتحديد ٣٠ منتج و عيّنة و ممكن أقل حسب قدرتك و تحاولين تركزين عليهم خلال هالشهر و تخلصينهم.. و إذا ما خلصتيهم تاخذينهم معاك للشهر اللي بعده مع منتجات ثانية و هكذا.. حنان صار لها ٦ شهور تسوي التحدي و تقريبا خلصت أكثر من ٢٠٠ منتج ما شاء الله!!!! أنا بديت معها شهر في ٢٠١٦ بعدين انشغلت بأمور كثيرة بس ناوية أقتدي فيها هذي السنة بأبريل و مايو و يمكن استمر كمان.. عموما هذي مدونتها chat-with-hanan.blogspot.com و فيها كل المعلومات مع وسائل التواصل الاجتماعي لو حابين تستفيدون منها أكثر.




سرقت قلبي و شغلت عقلي و تفكيري
هذي آخر نصيحة و هي مضحكة بس حقيقي تجيب نتيجة معاي داااائما!! إذا رحت محل و لقيت شيء حلوووو مرة مرررة مرررررررة و عاجبني كثييييير بس أحس إن عندي يشبه له أو مو مهم جدا أطلع و ما اشتريه و أرجع البيت و أشوف لو نسيته معناته ما أحتاجه و حتى لو ذكرته يكون ماله تأثير كبير.. بالتالي تخلصت من شيء كان ممكن يسوي لي زحمة.. لكن إذا حسيته سرق قلبي و شغل عقلي و تفكيري لأيام و مو قادرة أطلعه من بالي خلاص أروح أشتريه و أسعد نفسي و ممكن أتخلص من كم حاجة عندي عشانه..   

.       .       .


هذا كل اللي عندي بهالخصوص (حاليا).. 
من أهم أهداف هذا النمط من الحياة إنك بدل تجميع الأشياء عندك تستثمرين فلوسك و وقتك في تجارب حقيقة و مغامرات تسعدك و تبقى في ذاكرتك أحسن من أشياء تكتمك و بغبار و تنظيف و ترتيب كل شوي.. كل ما قلّت الأشياء قلّ الترتيب و قلّ التنظيف و قل التوتر!

 أتمنى لو فادكم الموضوع تنشرونه و تتفاعلون معاي في التعليقات و تذكرون لي طرق ساعدتكم تخففون من هوس تجميع الأشياء أو حتى مواقف طريفة صارت معاكم مع الفوضى هههههه.. و أخيرا أترككم مع مقطع كوميدي عن الأشياء الكثيرة..

PEACE