منتجاتي للحواجب My eyebrow products

السلام عليكم و رحمة الله و بركاته

كيف حالكم؟

بالنسبة لي أأأأأأككككرررره الحواجب المحددة جدددداااااا

و دايم أحب تكون مبينة طبيعية سواء ليل و لا نهار في الدوام و لا في مناسبة

بس في المناسبات أحب أخليها أغمق شوي من المعتاد..

و ما فيه منتج محدد أستخدمه.. كل فترة شي حسب المزاج خخ

أول منتج هو علبة الحواجب من ماركة إلف الأمريكية

هذي ما استغني عنها أبد.. خلصت ٣ علب و اللي تشوفونها الرابعة 

 استخدم مرات الدرجة دارك dark و مرات ميديم medium 

و اللي يعجبني فيها أني ما أحتاج فرشة خارجية لأن فرشتها حلوة

أستخدم الطرف المشطوف منها للجل أول و أعبي فيه حواجبي

إذا أبي فيهم لمعة طبيعية خليتها كذا و إذا أبي مطفي أحط

من البودرة بالطرف الثاني للفرشة.. البودرة حلوة كظل

كثير أستخدمه لكسرة العين.. البالت ممتاز و ثباته حلو

و تكلمت عنه زمان هنا في المنتجات العشر اللي ما استغني عنها

المنتج الثاني هو علبة ذا بودي شوب المشهورة

حلووووة مرررة بس عيبها الفرشة اللي تجي معها شينة خخ

لازم فرشة خارجية.. الدرجة اللي عندي رقم ٣ أغمق درجة..

أستخدم منها اللون الفاتح كل يوم و في المناسبات أدمج معاه شوي

من اللون الغامق.. ثباتها زين و سعرها ٧٠ ريال و متوفرة بكل مكان

و برضو يمدي تستخدمونها ظلال..
لو تحسون هالدرجة غامقة عليكم فيه درجتين أفتح منها

و أخيرا الظلال..
 أحب استخدم الظلال لأن تركيز اللون فيها قوي 

و تكون ثابتة مدة أطول.. ما عندي ظل معين أستخدمه 

أي ظل بني غامق التون حقه بارد أستخدمه.. سواء مطفي أو شيمر..

صورت لكم مثالين من اللي استخدمهم بالعادة..

 بالت فلورمار هذا سويت عنه تقرير كامل هنا

أستخدم اللون الغامق منه لحواجبي.. و كمان هذا الظل من ماركة

مورفي رقمه 26.. و غيرهم كثييير كتبت عن بعضهم بعد في تمبلر

قبل أبتدي المدونة.. شوفوه هنا   

و بالنسبة للفرشة اللي أحب استخدمها مع بودرات الحواجب

هي من سيقما رقمها E15 .. فيه لها بدايل كثير بس مهما أستخدم

أرجع لها و ألاحظ الفرق.. 

و بس..

ما تعجبني أقلام الحواجب أحسها تطيح الشعرات و دايم ناشفين

و جربت المسكرات الملونة و مدري ما حبيت النتيجة كثير..

اللي ما جربتهم للحين التاتو الكريمي زي حق نكس و ميك أب فور إىفر
ودي أجربهم بس أخاف ما يعجبوني خخ

عموما

لو فيه أقلام تمشي بسلاسة و كريمية و مسكرات حلوة و واضحة 

اكتبوا لي أساميهم في التعليقات تحت.. 

أخيرا.. ترى اشتريت بالت حواجب سليك..
 راح أجربه و أقول لكم عنه في موضوع جاي

لا تنسوني من دعاكم

PEACE