Jun 8, 2014

IMATS part 3 : Tips

السلام عليكم و رحمة الله
اليوم راح أقول لكم شوي نصائح في حال خططتوا تروحون لمعرض الآيماتس 
بس قبل ما أبدا أتمنى ترجعون للجزء الأول و الجزء الثاني فيه تفاصيل مفيدة لكم



قبل الآيماتس Before the IMATS



اشتري التذاكر من بدري Buy your ticket early
بمجرد ما تقررين تروحين لاااازم تشترين التذكرة
لأن أحيانا تخلص التذاكر قبل موعد المعرض بشهر!!
بالنسبة لي اشتريتها قبل ٤ شهور من الآيماتس



اطبعي الخريطة Print the floor plan map
أي معرض آيماتس يكون له صفحة في الموقع الرسمي هنا حسب المدينة
و في الصفحة هذي موجود فيها خريطة بالمعرض و الأركان و أماكنها
و حلو تكونين عارفة الأماكن عشان يسهل عليك التسوق




اكتبي قائمة بالمشتروات و الأسعار
 Write your shopping list with retail prices
في نفس الرابط حق الخريطة موجود جواته روابط لكل الماركات 
مهم جدا تحددين وش تبغين من كل موقع و تكتبين سعره الأصلي 
عشان تكونين مستعدة لمرحلة ضبط الميزانية 
كتابة القائمة تخليك مسيطرة ع الوضع
لأن هناك ممكن تنسين نفسك و تصرفين بدون شعور خخ
و تضيع فلوسك و أنت ما أخذتي الأشياء الضرورية
بالنسبة لي كتبت في نوتة و خليت كل ماركة في صفحة مستقلة
مثلا انجلوت في ورقة و مورف في ورقة و ألكون في ورقة..
و راح أقول لكم ليش بعد شوي




حطي ميزانية Set a budget
بعد ما عرفتي وش تبين بالضبط و كتبتي القائمة.. اجمعي الأسعار..
في الايماتس راح تكون الأسعار أرخص أكيد من السعر الأصلي
بس عشان تكونين مستعدة لأسوأ الاحتمالات سجلي السعر الأصلي 
و خذي معاك بسسسس اللي يكفي القائمة و أضيفي مثلا ٧٠ دولار زيادة 
عشان لو  اكتشفتي شي جديد هناك و حبيتي تشترينه 
لأن أغلب الماركات تدشن منتجاتها الجديدة في الآيماتس




جهزي بطاقة أعمال Take your business cards
لو كان عندك موقع أو تجارة لها علاقة بالتجميل 
أو كنتي مدونة أو عندك قناة يوتيوب.. 
جهزي بطاقات أعمال بموقعك و بيانات التواصل معاك
و حساباتك في المواقع الاجتماعية 
هناك راح تحتاجينها إما تعطينها لمشاهير اليوتيوب يدعمونك
أو لأصحاب الأركان هناك و يمكن إذا عجبهم شغلك يتعاونون معاك




شوفي فيديوهات ع اليوتيوب Watch YT videos about IMATS
هي مو ضرورية هالخطوة.. بس حلو تشوفين الوضع كيف بيكون
و تشوفين وش اشتروا الناس و وش جربوا و وش صار لهم..




في يوم الآيماتس AT the IMATS day 



إلبسي شي بارد و خفيف Wear lighter clothes
خفيف و ليس شفاف هههههههه.. يعني خامته باردة 
في نص اليوم و مع تجمع الناس و كذا الجو بيصير حاااار و مكتوم
فـ عشان تنبسطين و ترتاحين البسي شي خفيف و مريح
و حتى الشنطة لو تكون صغيرة و خفيفة أحسن



إلبسي جزمة مريحة Wear comfy shoes
راح تكونين واقفة و تمشين طول الوقت.. 
مهم جدددا جدددددا جييييدددددداااا تكون جزمتك مريحة
يعني باختصار كعب لا خخ



خذي إثبات هوية Take your ID
هم كاتبين كذا في موقعهم و أنا خذيت جواز السفر 
بس يوم وصلنا هناك ما أحد طلبه.. بس احتياطا خذيه
ما يسوى عليك توصلين لين هناك و ما يدخلونك عشانه



خذي معاك صرف فلوس Take some money change
خذي معاك فراطة.. صرف يعني دولارات منفردة و عشرات 
لأن مرات يكون الركن هذا ما عنده صرف و أنت بس تبين شي واحد 
و تضطرين تتركينه و ترجعين بعدين إذا صار معاك صرف..
 أو يقولون لك اشتري أكثر شوي لين تكملين المبلغ اللي عندك.. 



روحي مبكر Go there early
أنا وصلت قبل ما يفتحون الباب بساعة و صرت في الطابور الثاني!!! 
فمهم جدا توصلين بدري لعدد من الأسباب:
أولا تكونين مرتاحة نفسيا لأنك ما تأخرتي
ثانيا بعض الماركات تسوي هدايا و عروض خاصة لأول ٥٠ شخص يجيهم
ثالثا إذا رحتي بدري مثلي راح تتسوقين قبل الزحمة
لأن الزحمة تبدأ قبل الظهر بشوي.. 



اشحني جوالك أو كاميرتك Charge your phone or camera
مهم جدا لو بتصورين تشحنين جوالك و الكاميرا فل
و أحسن لو خذيتي الشاحن حق الجوال معاك 
بالنسبة لي ع آخر اليوم الساعة ٤ العصر جوالي قرب يطفي
و شحنته هناك لأني طالعة أتعشى و أتمشى بعد كذا



انتبهي ع أغراضك لا تنسرق أو تضيع
 Hold to your stuff like there is no tomorrow lol
فيه بنات في اليوتيوب انسرقت أكياسهم لما غفلوا عنها.. انتبهي :@ 
و سكري شنطتك زين و كل شوي تأكدي إن المحفظة و الجواز موجودين
لأن هناك زحمة.. بالنسبة لي ما صار لي شي منهم الحمدلله 



*

تذكرون لما قلت لكم اكتبوا أغراض كل ماركة في صفحة؟! 
طيب أقول لكم ليه.. فيه ماركات عندها طابورين..
طابور عشان بس تشوفين الركن و تجربين 
و طابور ثاني تحاسبين ع الأغراض اللي أخذتيها
و بعض الماركات زحمة مرة و ما يمدي تشوفين شي
هالشي فادني في انجلوت 
جيت ما لقيت مكان أشوف فيه المنتجات!!! زحمة و غفيص خخ
قطعت من النوتة الورقة اللي كتبت فيها الأشياء اللي أبيها من قبل
و عطيتها الموظفة علطول و جابت لي السلة فيها كل شي
وقفت في طابور الكاشير علطول و خلصت بسرعة




خذي راحة و شوفي وش اشتريتي 
Take a break and have a look at your purchases
هالشي فادني كثير.. لما جلست شوي و تفرجت في الأشياء
لقيت إني شارية ظلال وردية متشابهة من كم ماركة
و لقيت لونين مناكير بعد التأمل ما عجبوني
ففرصة إنك تبدلين و ترجعين هالأشياء قبل تتوهقين فيها
رحت لانجلوت بدلت الظل الوردي و خذيت ذهبي
و رحت ركن جولي جي بدلت المناكير 



خذي معاك سناك و موية Take some snacks and water
هذي النقطة بصراحة ضحكتيني ههههههههه
في اليوتيوب كلهم يقولون إنكم بتموتون من الجوع و العطش
و إن الأكل اللي في الايماتس مو حلو و غالي
أنا شخصيا خذيت معاي بسكوت و موية احتياط خخ
و لا حسيت بجوع صراحة ههههههه.. ما يمديك أصلا تفكرين في الأكل
يمكن آخر ساعة شوي جعت بس فكرت أخلص من الآيماتس
و أروح أحتفل في مطعم صاحي مع أخواني أحسن من إني أشتري منهم
و بالفلوس اللي ممكن ادفعها في الاكل اللي ينباع هناك أقدر اشتري فيه
ظل و لا روج خخ
فمدري قلت أقول لكم هالنقطة إبراءً للذمة هههههههه



احضري الدروس Attend some classes
فيه كذا درس في الايماتس حاولي تستفيدين و تحضرين بعضها ع الأقل
و بالمرة تريحين رجلينك شوي خخ



و أخيرا حاولي تستمتعين بالتجربة و تسولفين مع الناس هناك
لأن أغلب البنات رايحين و هم مهتمين بالموضوع مثلك 
تتشاركون خبرات و سوالف.. و تعرفت ع كثير بنات و ما طفشت
بس تمنيت إني ما كنت لوحدي يومها و كان معي أحد يشاركني التجربة
و آخذ برأيه و كذا.. يعني لو فيه أحد حاب يروح معاك خذيه خخ 




كلام كثيييير جدا أدري هههههه.. بس حبيت أفيدكم بهالخصوص
و عشان تكون رحلتكم للآيماتس ناجحة و تطلعون بذكريات سعيدة
PEACE

3 comments

  1. طيب من فين اشتري التذاكر

    ReplyDelete
    Replies
    1. من موقع الايماتس نفسه
      بعد ما تختاري المدينة اللي انت مخططة تروحين للآيماتس حقها

      Delete
  2. يجنن يجنن الموضوع مرره نفسي اروحه يارب يكتبلي يوم اروحه و الله يسعدك كتبتي كل شي من قلب ❤️��

    ReplyDelete

© ●terter thinks● | All rights reserved.
BLOG TEMPLATE HANDCRAFTED BY pipdig