The Body Shop Smoky Eye Palette

 

 

 

 

 

السلام عليكم..

اليوم راح أكلمكم عن بالت من ذا بودي شوب نزل من سنة ممكن.. يساعدك تسوين لوك سموكي.. و ممكن تسوين منه لوكات طبيعية بعد..

فيه منه درجتين درجة دافية اسمها سموكي كوبر رقم 01
 و درجة باردة اسمها سموكي مون ستون رقم 02

(للتوضيح دافية تكون التون حقها أقرب للأحمر و البرتقالي و البارد أقرب للرمادي)

 

 

احترت كثير.. بس اخترت الألوان الباردة لأن فيه لون مميز ما عندي مثله في مجموعتي
اللي هو بني غااامق جاي شوي ع رمادي.. عجبني للسموكي أو لكسرة العين..
الدرجة الدافية مرة حلوة ألوانها بس عندي كثير من نفس الدرجات  

و عشان بس تشوفون الدرجتين سوا جبت لكم هالصورة من مدونة أجنبية

اضغطوا عليها تكبر :)

 

 

 

عموما البالت زي ما تشوفون فيه أربع ألوان كلها بلمعة و معها فرشتين صغار
سعرها ما أذكر بالضبط بس حدود 100 ريال

 

 

 

قوام الظلال بودرة بس كأنها كريمية.. يوم جربتها بالفرش مم مدري ما عطتني نتيجة مثل ما كنت متخيلة.. بس يوم جربت أحطها بأصبعي مرررة حبيتها..
طبعا هي ممكن تستخدم جافة و رطبة.. بس رطبة تطلع قوية و أجمل كثير خصوصا البيج الفاتح و هو رطب بطططللل..

 

اللي يخليني أحسها مفيدة أكثر و اخترتها و تركت الدرجة الثانية
 إن نفس اللون اللي مميز و عاجبني فيها ممتاز لتعبئة الحواجب
و لأنه فيه شيمر خفيف يطلع الحواجب طبيعية مو مطفية مرة

 

 

بخصوص الثبات أنا في كل حال أستخدم برايمر قبلها فما عندي مشكلة معها

 

نجي للفرش.. معها زي ما قلت فرشتين.. عادية و مشطوفة..
العادية ما فيها شي مميز و ما حبيتها كثير بصراحة .. لكن المشطوفة ممتاااازة
أستخدمها للحواجب مع هذاك اللون.. و لأن حجمها صغير نفعتني كثير في الشنطة
و صرت أستخدمها مع أي بودرة أو ظل أو واكس للحواجب

 

و بس..

سووا لي فولو ع تويتر @TaRaNeeM
و ع انستقرام @terter_thinks
و شاركوا المدونة مع صحباتكم و أقاربكم و قروباتكم في الواتس

و لا تنسوني من دعاكم

 

 

Peace

 

 

 

 

 

 

 

 

e.l.f HAUL :D

السلام عليكم..

أعتذر و بشدة عن التأخير بس الظروف تلخبطت حولي كثير و حصلت كثير شغلات
و الله يعين بس..

استغليت من فترة خصومات موقع إيلف عشان أشتري منهم مجموعة منتجات ما قد جربتها.. و دايم لما أروح ع هالموقع أصير مجنونة و أشتري كل شي جديد من رخصه خخ.. بس هالمرة حاولت أشتري الأشياء اللي لفتت انتباهي أكثر و لا قد جربتها
يعني اللي بتشوفونه لسا ما جربته زين و لا كونت رأي عنهم لسا
إلا حاجتين رجعت أشتريهم من جمالهم..

.

و إذا حابين تعرفون عن الخصومات سجلوا إيميلاتكم في موقعهم
أو تابعوني في انستقرام لأني كل ما نزلت خصومات و كذا أعطيكم خبر ..

.

نبدأ بالمكياج و من اليمين لليسار :

.

إيلف من فترة نزلت ظلال و بلشرات و برونزرات من النوع البيكد..
و تحمست كثير لهم و شفت سواتشات كثير و قررت أختار ظل و بلشر أجربهم
اللي فوق ظل لونه بين البني و البرونز و شوي مشمشي ع وردي..
لون مميز و تكلمت عنه في انستقرام .. أنصحكم كثير فيه.. اسمه toasted
و الحين مطلعين ألوان جديدة بعد من هالنوع و أكيد بأشتري لي كم واحد

.

البلشر اللي بعده لونه برونز معاه شوي برتقالي مشمشي و هو أغمق لون موجود ع الموقع.. و فيه شيمر.. يعطي لوك جميل و أنا حطيته أمس مثل الكونتور ع الخدود و مديته شوي مثل البلشر
و حبيت النتيجة و الله.. لسا يبي لي أجربه أكثر عشان أحكم..

بعده علبة الحواجب و هذي مو جديدة عليكم و ممكن هذي رابع مرة أشتريها
لسا ما فتحتها من كرتونتها لأن اللي عندي لسا ما خلصت .. ما رح أحكي لكم عنها كثير
شوفوها هنا بالتفصيل

. 

تحتها البلشر الكريمي اللي يعتبر بديل لبلشر ميك أب فور إيفر
فيه درجات ناعمة كثير بس أنا مجنونة و قلت خليني أجرب هذا أشوف وش وضعه
للحين ما جربته ع خدودي لأني خااااايييييييييييفة موت هههههههه..
توقعت بما إنه أرخص من ميك أب فور إيفر ما بيكون مركز مرة لكن طلعت غلطانة
أقسم بالله حطيت نقطة قد حبة السمسم ع يدي بس أجرب.. ما أبالغ من جد نفس حبة السمسم.. طلع اللون غاااامق .. فوووشي ع عنابي..!! يا لهوي هههههههه.. ليتني خذيت لون فاتح خخ
بس جربته روج و طلع حلوووو الحمدلله.. و حبيته مثل التنت للشفايف يعني بس أطبطب شوي منه ع شفايفي نفس فكرة بيني تنت من بينفت..

بس أنا لازم أتحدى نفسي و أجربه ع وجهي و ألاقي طريقة مناسبة له..

.

تحته قلم روج مطفي.. فيه كذا لون بس اخترت هاللون اسمه Praline
لونه نود غامق مرة حلو.. و طعمه لذيذ خخ.. ما توقعت أحبه كذا
مطفي بس ما ينشف الشفايف .. و ثباته طيب.. عطاني لون شفايفي بس أغمق شوي
أنصحكم فيه كثير..

.

آخر شي بالصورة برايمر الوجه.. فيه الشفاف و فيه الأخضر و الموف و اللي يعطي إضاءة..اخترت اللي يعطي إضاءة.. ممم كبداية ما حبيته :(

هو لونه ذهبي شيمر حلو و ينفع تحت الأساس
أو ع عظمة الخد.. بس المشكلة فيه قليتر ذهبي..!! لو الشيمر بس كان بيطلع حلووو
حقيقة ما جربته تحت الأساس و إذا القليتر بيروح منه إذا نشف ع وجهي و أو بيغطيه الأساس.. مدري للحين ما أقدر أفيدكم لأنه جربته ع يدي بس.. إذا ما نفع للوجه ما رح أرميه  طبعا.. باستخدمه للجسم في المناسبات و الأفراح..

.

.

تعرفوني أحب أي شي له علاقة بالعسل .. و اشتريت هذي المناديل المرطبة
فيها لوشن يعني تمسحين فيها ع الجسم يرطبه ترطيب خفيف.. مكتوب عليه إنه فيه فيتامين إي و زيت اللوز و زبدة الكاكاو و حاجات ثانية و في العلبة 15 منديل..
للحين ما جربتهم .. فيه نكهات ثانية جبت لأختي بالمنقا و لأمي بالشيا و بمجرد ما نجربهم راح أتكلم عنهم إن شاء الله

.

بعدها اللي مثل الرول أو الـstick هذا مرطب للجسم.. ذكرني بنفس اللي ينباع في بودي شوب.. سمعت عنه كلام كثير.. للحين ما جربته و الله

.

اللي بعده مقشر الشفايف.. معه مرطب و طعمه مرة لذييييذ ههههههه..
المهم استخدمته مرة وحدة للحين و حبيته كثير.. بس أحسن أجربه أكثر و أشوف..

.

بعدين قلم مزيل المكياج.. حسيته راح يفك أززززممممة إذا انحاس الكحل أو تلطخت المسكرة .. ما جربته لسا بس حدددددي متحمسسسسة له

.

آخر شي فرش الستبلنق و هذي مو أول مرة أجربها.. أحبها للمنتجات الكريمية
و للبلشرات البودرة العادية اللي لونها قوي و مركز تساعدني أحطه بنعومة..
و أحط فيها كمان الهايلايت.. و عشاني أحتاجها كثير شريت منها وحدة ثانية
فيه مقاس أصغر منها و ناوية عليها إن شاء الله ..

.

كل اللي فوق بالأساس سعره بـ 3 دولار للقطعة.. يعني 12 ريال تقريبا..
إلا البرايمر و المرطب الرول بـ 6 دولار يعني حول 24 ريال

خذيتهم في الخصم بنص السعر ..

.

إذا حابين أي ريفيو عن منتج معين منهم خبروني..

.

تقارير من نفس الماركة :

بلشرات إيلف.. بيقمنت من إيلف
بودرة إيلف .. قلم مثبت الروج

.

سووا لي فولو ع تويتر @TaRaNeeM
و ع انستقرام @terter_thinks
و شاركوا المدونة مع صحباتكم و أقاربكم و قروباتكم في الواتس خخ

.

و لا تنسوني من دعاكم

Peace