The Other Side of Me (Collaboration) جانب مختلف من حياتي

السلام عليكم

كيف حالكم؟ و كيف الإجازة حتى الآن؟

اليوم أنا متحمسة مرررة لأن هالموضوع هو تعاون جديد مع مجموعة كبيرة من البلوقرز اللي أحبهم و أثق فيهم و لأن التعاون بيكون مميز اخترنا له هالتاريخ المميز ٨\٨.. و فكرنا نشارككم جانب بعييييد عن التجميل اللي تعودتوا عليه منا.. بيكون عن أشياء غير تجميلية نحبها و نفضلها سواء بشكل دائم أو في الفترة الأخيرة.. بس قبل ما أبدأ خلوني أعرفكم بالبلوقرز المشاركات معي في التعاون:

غادة من GhadaAbdullah09 - أشواق من TriagleAsh 

رغد من RoroBeauty - حنان من ChatWithHanan

مروة من MurMur_Blog - نورا من WhatAuraLoves 

المها من Almaha Blog - بيان من Bayanola92

و لازم بعد ما تخلصون قراءة موضوعي تروحون تشوفون موضوعاتهم و فيديوهاتهم عشان تتعرفون علينا أكثر و تشاركونا جانب جديد من حياتنا.. بس اضغطوا على الأسامي فوق و تمتعوا!

كنت بأبدأ بالقهوة بس أتوقع إنها معشوقة الجميع و أنا أولهم راح أخليها لموضوع ثاني بعدين لما أشتري ماكينة نسبريسو و ببدأ معاكم بلعبة صار لي ألعبها مممم ٤ سنوات يمكن؟ ما أفتكر بالضبط بس من زماااااان و اسمها Two Dots فيها مراحل كثيرة و في كل تحديث يضيفون لها مراحل زيادة و فيها تحديات تنزل لفترات مؤقتة ممتعة مرررة و فيه أدوات مساعدة أجمعها خلال اللعب.. مدري كيف أشرح لكم اللعبة باختصار لكن تقريبا هي عبارة عن ربط بين نقاط في عدد معين من الحركات و الحين وصلت للمرحلة ١٠١٠ و متحمسة مررررة للمراحل الجاية!! 

سماعاتي JVC Xtreme-Xplosivs برضو قديمة مرة و كان لونها أحمر ناصع بس لأنها عندي من ٧ سنوات أو أكثر و استخدمها كثير برا البيت مع الاحتكاك بالطرحة و العباية تغير لونها و صار عودي.. من يوم اشتريتها و أنا ما استخدم غيرها.. الصوت فيها بططططل ما شاء الله و جودتها عالية و تتحمل.. أتذكر أخذتها من إكسترا بحدود ٢٠٠ ريال عاد مدري للحين موجودة عندهم و لا لا لكن لقيتها لكم في أمازون لو حابين و يجي معها علبة صغيرة سوداء لكنها صغيرة مرة بالنسبة لي و لو كنت مستعجلة ما يمديني ألف السماعات زين و أدخلها جوا فصرت أحطها في هذي الشنطة الصوغننة من إتش أند إم.. و بصراحة أكررررررره لما تتقعد و تتداخل أسلاكها في بعض فلما أحطها بشكل مرتب في هالشنطة و بعدين في جيبي أو شنطة الدوام أو السوق أضمن تبقى بحال جيدة و بدون تعقيد! 

هذي معشوقتي في التصوير.. عدسة كانون 100mm الماكرو.. كل صوري الدقيقة و القريييبة في الإنستقرام اللي دايم تعجبكم تكون غالبا بهالعدسة.. اشتريتها بأول راتب لي في وظيفتي قبل ١٠ سنوات و كانت فرحتي فيها عارمة و للحين صامدة ما شاء الله و تبهرني في كل مرة أصور بيها

هذي المقلمية جديدة مرة لها تقريبا شهر عندي لكن حبيييييتتتتها و لازم أقول لكم عنها في هالموضوع.. كنت أدور مقلمية شفافة من فترة و لقيتها في فور إيفر ٢١ بـ ٣٠ ريال.. هي في الحقيقة شنطة مكياج لكن أنا خليتها للأقلام و هي بالطبيعة لونها فااااقع جدا و فيه منها أصفر و وردي لكن هاللون جذبني أكثر.. 

تفتكرون هذي الأقلام؟ أول ما عرفتها كنت في ثاني متوسط شفتها عند بنت اسمها فوزية.. هذي البنت في فترة وجيزة صارت صديقتي الصدوقة و للآن على تواصل معها و لو إنه قليل لكن الحمدلله ما انقطع.. المهم خطها الرقعة جمييييل ما شاء الله و تبهرني مرة لأن وقتها كان هالخط الحلو بس الكبار يعرفونه هههههههه.. كانت تستخدم هذي الأقلام و كنت أحسها تخلي الكتابة سلسة و الخط حلو.. خطي ما تحسن عليها طبعا مع الأسف الشديد خخ.. لكن أحب استخدمها بين فترة و الثانية و تذكرني بأيام الدراسة.. لقيتها في جرير علبة كاملة فيها كل الألوان اللي تشوفونها يمكن بـ٣٥..

كثير من الناس مهتمين استخدام الأجندة في السنتين الأخيرة و للبعض تعتبر الأجندة هواية تساعدهم على الاسترخاء خصوصا لما يقضون وقت ممتع في تزيين الصفحات و تلوينها و تنسيقها حسب المناسبات و المواسم.. أنا حاولت أندمج في موجة الأجندات لكن ما قدرت لكن اللي دايم أسويه من سنوات هو أشتري أي دفتر مسطر عادي يعجبني شكله و استخدمه لكل شي ممكن مثل أهم الأعمال اللي لازم أنجزها سواء في البيت أو المدرسة أو السفر أو للمدونة و الإنستقرام و أكتب أفكاري و أرسم فيه doodles بعد.. ما له تقسيم معين عندي كل ما امتلت صفحة قلبتها للثانية و هكذا.. المهم أختي جابت لي هذا الدفتر هدية ما أعرف من فين بالضبط.. جلد أسود و مطبوع عليه بالذهبي و من داخل مسطر زي ما أحب.. لسا جديد لكن راح أستخدمه قريب إن شاء الله 

الحاجة اللي ما يعرفها الكثير عني هو إن مشروبي المفضل على الإطلاق هو الموية.. و هالشي اكتشفته بعد سلسلة من التحاليل أيام المتوسط و الثانوي و اتضح عندي عيب خلقي بسيط في الكلية اليمنى و لازم أكثر من شرب الموية.. و يوم عن يوم صرت أحبها و استمتع فيها و خصوصا بعد ما قطعت المشروبات الغازية و قللت من المشروبات المعلبة و ما عندي خيارات باردة كثير.. و ما فيه ألذ من الموية في كوب آيكيا MJÖD العملاق هذا! عندي منه ٢ في بيتي و ١ في بيت أهلي لأنه كبير أعبيه مرة وحدة بموية باردة مرة و أرتاح من المشاوير للمطبخ ( كسولة خخ) و أتذكر مرة شافته بنت خالي و قالت لي وين غطا الجك هذا؟ هههههههههههه.. عاد الحلو في هالكوب إنه رخيص مرة بـ٧ ريال بس!!!! 

لو وصلتوا لهنا في القراءة فـ من جد شكرا لكم و خلاص باقي شوي و أخلص ههههه.. اللي عندها أطفال أكيد تعرف إنه مستحيل يكون عندها كيبورد نظيف مدة طويلة فـ أتمنى تتجاهلون هالشي خخ.. في الشهور الأخيرة صرت مدمنة فيديوهات الـ decluttering تعني التخلص من الأشياء الزايدة اللي تسبب الفوضى.. بلا مبالغة كل ما شفت نفسي فاضية فتحت يوتيوب و كتبت في البحث decluttering makeup و لا decluttering my house.. أحس بالحماس و أشوف كم شيء تخلصوا منه و كيف صار الوضع بعدها و مرات أقوم أرتب بعدها ههههههه.. و الشي الثاني اللي اشوفه ع اليوتيوب هي قناة تعتبر جديدة نوعا ما.. لكن أبهرتني ببراعتها في المكياج و حبيت أختم لكم الموضوع بقناتها: RawBeautyKristi

أتمنى يكون الموضوع أعجبكم و لا تنسون تشوفون بقية موضوعات و فيديوهات التعاون اللي حطيت لكم روابطهم في البداية..

لا تنسوني من دعاكم

PEACE