Pierre René Cosmetics

السلام عليكم و رحمة الله..

كيف حالكم؟ 

قبل أبتدي حابة آخذ رايكم في خلفيتي الخشبية الجديدة.. أحس فيها تغيير كبير عن خلفيتي البيضاء المعتادة.. عموما قاعدة أحاول في الفترة الأخيرة أجدد في طرق التصوير ع المدونة مدري أعجبتكم و لا لا :$ ؟ اكتبوا لي رايكم في التعليقات و لو فيه اقتراحات لخلفيات تصوير أو أفكار اكتبوها لي بعد..

طيب اليوم حابة أكلمكم عن ماركة مكياج جديدة بالنسبة لي و يمكن شفتوها في سنابي قبل فترة.. اسمها (بيير رينيه) أو (بييغ غينيه) و ما لقيت شي واضح عن الدولة المصنعة في موقعهم لكن غالبا هي إما ماركة فرنسية أو بولندية.. في كل الأحوال هذي الماركة تباع في فروع مركز العناية بالشعر و الجسم بالسعودية..

في هذا الموضوع راح أشارككم مفضلاتي من هالماركة.. 

أول منتج أبهرني هو كريم الأساس أدڤانسد ليفت بخلاصة الورد و فيتامين A و E مع حماية من الشمس بنسبة ١٥.. الأساس تغطيته متوسطة لخفيفة و هالنوعية تعجبني كثير لأنها تعطي شكل طبيعي و صحي للبشرة و كأني مو حاطة شي.. و لاحظت إنه يرطب البشرة و ما يجففها و بالتالي أشوفه مناسب للبشرات الجافة و العادية أكثر.. بشرتي مختلطة و استخدمته عادي بس حطيت فوقه شوي بودرة.. ثباته حلو من ٤ لـ ٦ ساعات و ممكن يظل لمدة أطول لو حطيتوا برايمر كويس قبله أو بخاخ مثبت بعده.. سعره ٩٥ ريال و درجتي رقمها ٠٥ ناتشورال

ثاني منتج أعجبني هو البرونز.. العلبة كبيرة زي ما تشوفون و سعرها نفس الأساس بـ ٩٥ ريال.. هذي الدرجة رقم (٠١ لايت برونز) و أتوقع إنها أفتح درجة في البرونز من هالماركة.. لونها أغمق من بشرتي بدرجتين تقريبا و فيها لمعة خفيفة حلللللوووووة ع الوجه و مدري ليش أحسها تشبه بودرات أور قلاس (ما جربت بودراتهم بس عندي شعور إنها تشبه لها خخ).. 

استخدمت البرونز هذا بفرشة منفوشة و حطيته ع خدودي و أعطى وجهي دفء و  إضاءة ناعمة.. 

المنتج الثالث اللي أعجبني هو البلشر.. الدرجة اللي عندي رقمها ٠٧ و لونها وردي مايل للطوبي و المشمشي.. صحيح في العلبة تشوفون قليتر صغير بس ع الخدود مع الاستخدام يختفي تماما.. حبيت إنه اندمج بسهووولة و بدون جهد ع البشرة و ثباته ممتاز و الله..  سعره ٨٠ ريال

و آخر منتج أعجبني هو هالروج.. لونه وردي غامق و جميييل و يبان كأنه شفايفي صحية و متوردة بس مشكلته نوعه (فروست) يعني كريمي لكن فيه شيمر خفيف فضي.. هو حلو بس بيكون أحلى لو كان كريمي بس بدون شيمر.. ثباته زي أي روج تقريبا من ساعتين ل ٥ ساعات لو بدون أكل كثير و شرب.. هذا اللون رقمه N02 و سعره ٧٥ ريال..

و بس يا حبيباتي.. لو لكم تجارب مع هالماركة من قبل خبروني في التعليقات تحت عشان نستفيد كلنا..

و لا تنسوني من دعاكم 

PEACE