مرحبا
يا رب ما تهاوشوني يا رب..
يا رب ما تقولون تأخرتي علينا يا رب .. خخ..
و الله الأسابيع اللي فاتت كنت مضغوطة بالشغل ضغطططط...!!!!
غير إن معنوياتي مو مرة بصراحة و كثير شغلات كنت مخططة أكتب عنها بس أجلتها ..
و ما علينا.. ما بلاش نتكلم في الماضي >> راحوا الطيبين خخ
اليوم راح أتكلم عن المنتجات اللي استخدمتها بكثرة الشهر الماضي..
طبعا في شغلات مفضلة عندي كل الأوقات .. ما ذكرتها هنا..
نبدأ بالعناية ..
هالشهر رجعت أستخدم واقي و برايمر ميك أب فور إيفر..
يعجبني فيه ثباته و خفته ع البشرة ..و تكلمت عنه بالتفصيل زمان في التمبلر هنا
ثاني منتج هو كريم العناية بالبشرة المختلطة و الدهنية بالتفاح من ماركة نوريش سكن..
و كمان تكلمت عنه بالتفصيل في المدونة قبل كذا..
كنت أستخدمه في النهار بس .. الجين صرت أستخدمه قبل ما أنام.. مرتين في اليوم
و عجبني ترطيبه بصراحة و ريحته المنعشة ..
مرطب الشفايف الشهير كارميكس.. بصراحة أجرب كثير و أرجع له..
الحلو فيه مفعوله السرييييع..
و فيه شي يخليه ممم.. يعني زي شعور النعناع اللي يجي مع حلاو الحلق
بس اللهم في الشفايف >> عليك شرح..!!!! خخ
يسمونه هالشعور tingling ..
لأني من الناس اللي إذا انضغطت أو توترت أعض شفايفي كثير و تتشقق..
هالشعور مرة يريح و يعالج بسرعة..
نجي للميك أب ..
أكثر ظلين استخدمتهم هم من ماركة إنجلوت .. بيج و مشمشي.. كلهم مطفيين
أخلطهم سوا بصراحة لأن الهالات اللي ع جفني بالبيج لوحده تعطيني لوك شوي رمادي بعد كم ساعة..
فأحط بيج ويا مشمشي أخلطهم سوا ع الجفن كله و أحط من البيج لحاله تحت الحاجب مرات..
و جميل اللون كمان لما أخلطهم من خط الرموش للحاجب و أحط لون بني ع الكريس .. توووحفة..!!
المشمشي رقمه MATTE 368 و البيج MATTE 328
بعده الكحل البيج المشهور من ماكس فاكتر.. كنت أستخدم حق ماركة أون كثير ..
و الشهر اللي فات رجعت أستخدم هذا لأنه أفتح شوي.. و يعجبني ثباته بعد كذا طبقة ..
هالسنة قررت أستخدم قلوساتي الكثيرة اللي أشتريتها و كومتها.. بحكم إني أميل للأرواج لحالها أكثر..
المهم صرت أحاول أحط قلوسات أكثر .. فيه تركيبتين حبيتهم هالشهر..
الأولى نود.. و هي عبارة عن روج إيلف فانتزي من اللاين الأساسي بدولار..
مع قلوس ينفخ الشفايف من توو فيسد.. الدرجة اسمها Barely Legal
القلوس هذا جاني ضمن مجموعة شريتها من أسوس قبل سنة و شوي و ابتلشت فيه..
لونه فاااااتح مرة.. و كرهته و لا فكرت أعطيه فرصة
بس يوم قررت أجربه أعجببببني كثيييييييييير.. أحطه ع أي روج يفتحه
و بصراحة ينفخ الشفايف شوي و فيه نفس الشعور حق مرطب كارمكس.. حبيته كثير و الله
و تحسفت إني تاركته طايح ما استخدمته.. ناوية أجرب منه ألوان ثانية الفترة الجاية ..
التركيبة الثاني لونها توتي ع ما قالوا .. بس فاتح شوي يميل للفوشي الهادي..
و هي عبارة عن روج إيلف اسمه جيبسي .. مع قلوس لانكوم مدري من أي مجموعة بس رقمه 108
لونه نفس الروج بس أغمق درجة.. و يوم ينحط فوق الروج يندمج معاه و يعطيه لمعة..
آخر شي منتجين من شانيل.. بس ركزوا معاي شوي خخ
العلبة أصلا هي علبة البرونز اللي ع اليسار و كان المكان اللي جنبه مكان الفرشة اللي تجي معاه..
ع فكرة ترا الفرشة جميلة و لها جهتين ..
و كان عندي علبة بودرة شانيل مات لوميير و طاحت و انكسرت مني..
قمت أنا بحكم إني ذكية و ذهينة و ذا.. طلعت الفرشة من علبة البرونز ..
و حطيت البودرة مكانها
و جت مقاسها تمااااام.. كأنهم كذا موجودين من يوم شريتهم خخ..
البودرة هي شانيل مات لوميير.. فيها حماية خفيفة من الشمس و درجتي فيها 40
حلوة مرة إذا حطيتها خفيف ع الأساس أو الكونسيلر.. و فيها تغطية جميلة إذا استخدمتها لحالها..
هي مطفية ما فيها أي لمعة..
أما البرونز من شانيل .. أفتح درجة رقم 607 Terre D'OR .. الدرجة هذي من قريب فيها قليتر خفيف
بس هي مطفية أصلا و بمجرد ما ينحط ع الوجه يختفي القليتر لا تخافون..
الدرجة هذي تصلح بلشر أكثر من برونز.. لأنها مايلة شوي ع برتقالي
و تناسب البشرات الفاتحة و الوسط اللي تميل للفاتح..
نفس المنتج هذا منه درجات ثانية أغمق جميلة مرة و تصلح كونتور و بلش..
أختي لوتي عندها درجة أغمق شوي و مرررررررررررة تمدحها..
بالنسبة لي أحب أحطها إذا كنت حاطة روج غامق أو فاقع .. أو كان مكياج عيوني فيه ألوان
عشان ما يكون مرة صارخ و في نفس الوقت يبان طبيعي..
و الحلو في البودرة و البرونزر إنهم ممتازيييين كظلال للعين بعد..
و بس..
لا تنسون تسوون انضمام أو join للمدونة من الخيار اللي ع اليمين
سامحوني ع التأخير..
()
